Tiimooti Buuluswa Siilaaswa geeb shagaamiya
16
01 Buuluswa Siilaaswa,
Darbaabwa Liistaraawwa iktimna.
Beentooy kwiriyaataayi gaal <<Tiimooti>> iidneeb iifi.
Barooh tuundi Yahuudiitu aree aamananaatu,
ubaaba aree Yoonaaniibu.
02 Y'aamanana Liistaraaywa Ikoonyoomwa iifiin Tiimootiib daayiinaayt hooy hadiidiyaan.
03 Buulus aree baruuh geeboohna iibaabiyeet yhariw.
Iyahuudi been oomhiin ikwiir Tiimootiib ubaaba Yoonaaniib iiktiyeet toona iktiinna.
Aflaay Buulus barooh ikwishib.
04 Malya Buuluswa aarawwa madiinaat madiinaatii ibeen.
Alguduseeb iifiin ilinguumiyaawwa y'eegrimaawwa imkirneeb oomkir oodehay w'aamaniib sooyaan.
Uudehay een ibhali isnaakiirneet toona sooyaan.
05 Aflaay tikanaayis w'iimaaniib y'akirna,
imb'eebka aree y'adadaah gwuudiyaan.
Buulusiit tehawsu Magadooniyaay
06 Buuluswa y'arawaahwa Firiigiyaabwa Galaatiyaaywa geebii hasamiyaan.
Aashuuk Itageega laakiin bareeh Aasyaay bhaliisaab kiikeen.
07 Baraah Miisiyaay yhiduud iktimnihoob,
Beetanyaab mabay yhariwna.
Laakiin Yasuu'iib Aashuuk bareeh yhabiin.
08 Aflaay baraah Miisiyaay iibaabiyaaniit Taroowaas ibeen.
09 Been whawaad Buulus hawsoot hawsooya.
Baruuh tehawsooteeb tak Magadoonyaay ingid rhiya,
aree bariiyooh winneet yhariwaayt,
<<Tooy Magadoonyaay m'aa!
Shama hoon!>>
idi.
10 Buulus tehawsu rhiyani har'ii,
gaalhoob Magadoonyaay mabayee dehaay nimar.
Ukwaasana usakana udaayiib beentooy soonayi jillaayi waliikaayoon ikatiyeet toona nikan.
Liidiya W'ankwana aamanta
11 Hinin Taroowaasee markabt n'amaayt,
Saamootraak nibi.
Oomb'i ooraaw aree Niyaaboolis niktim.
12 Beentooysii tumadiina Fiilibii beeti iibaabna.
Fiilibi Magadoonyaayt tumadiina toowintu.
Laakiin Roomaani abkaab iiktini haashu.
Beentooy aree gwidaat yina nis'a.
13 Malya toosab tumadiinaati dheefaay nifir'a,
aree oobhari dar nibi.
Beentooy siileelti mhiin hooy nimiireeb hiisna.
Malya m'at beentooy ammarriya iifiint hadiidsamna.
14 Gaat bateesooh Liidiyaabtu.
Batuuh tumadiina Tiyaatiiraay y'aatu,
adaru halaaka alyaab tiidlib.
Batuuh Ukwaasana t'ibid takatu.
W'ankwana han Buulus iideeb ibhali batooh agbilisiya.
15 Malya batuuhwa indhiwaayaahwa itoomaasnihoob,
ugawiyooh tehadar hoon,
<<Baraak sidik ani W'ankwanaayt aamanana akatiyeet toona tikteeniineek,
m'aanaat ugawiyu geebu s'aana.>>
tidi.
Aflaay tuwaliiktooh agbilna.
Buuluswa Siilaaswa whabis daayaan
16 Yint gaat hinin toosiileelti mhiin bayee,
oot kishiyaat nimri.
Batuuh toona tigayii tiiktiit sooyiin jin tiibri.
Oon ushagaay aree y'ankwanaayeeh gwida mhallaga rayiista.
17 T'oor tukishiya Buuluswa hinin eerawwa timooraam hoon,
waliikee aree <<Aan aanda Ukwaasana Utageegaanaay shagaamanaaba!
Kak aree midhhan timeerneeb sooyeen hookna.>>
tidi.
18 Batuuh beet toona gwidaat yina sakta.
Malya Buulus yhasee,
nakamiyaayt aree eejinee dehaay,
<<Yasuu'a Umasiihi simii bhaliisamani hookna,
toon t'oor ishna giigaana!>>
idi.
Aajin gaalhoob t'oor y'ishna giigiyaan.
19 T'ooti ankwana shaawti mhallagaab imaar biidiineet toona ikannihoob,
Buuluswa Siilaaswa y'abikniit tumhaakama beeti irfifna.
20 Baraah yhaakmaayee dehaay,
<<Aan aanda Yahuudiiba.
Tumadiinaatiib aree ribshaayt ikwasiin.
21 Hinin Iroomaani,
t'aadaateeyoon harramamaani tari atoorbiinaayti d'uuy sooyeen hoon.>>
idiin.
22 Uudehay uugwida bareeyooh geeb Buuluswa Siilaaswa ithab'ana.
Yhad'a shaawti eenda imalooyi halaaka shatatiyaaniit,
kwirbaajii jasaayeeneet toona sooyaan.
23 Aanda amaag jasaamiyaani har'ii,
oosjin daayaan.
Usijni daabit aree bareeh akraab ingw'iideet toona soomamiya.
24 Udaabit toona tusoomamaab iiktiyeet id'i.
Bareeh usijniit hooyteeb daasiya,
iragada aree akraat shinshiltii hindi kehii yhaakwir.
25 Whawaadi tarabeeb Buuluswa Siilaaswa siileeliyaan,
Ukwaasanaay hamaadiit shiilaat iidna.
Uudehay uuraaw usijniib iifiin bareeh isniikarna.
26 Gaalhoob,
tuubuut idhtaayt usijni asaas kassuuh digamiya.
Idheefa ingalna,
tishinshila aree kasseeh y'abuukiyaayee dhadhibiyaan.
27 Usijni daabit ib'ar.
Udheefa nagaal akay rhiyahoob,
y'abuukiya ifoorneeb hiisiya.
Baruuh shaawti b'adhdhooh il'ibaayt ishuukeeyooh madar yhariw.
28 Laakiin Buulus barooh waliikiyaayt,
<<Ishuukeek baa'adaaya!
Hinin kassaan tooy neefi.>>
idi.
29 Usijni daabit lambaat yhariwaayt oosjin shuumiya.
Baruuh mirkwaayii idhee Buuluswa Siilaasi suurii dhibiya.
30 Malya bareeh usijnii ifir'at har'ii raatiya,
<<Yhaana,
oomidhhan imaar andiyeek,
ibakii naan sakani?>>
idi.
31 Baraah dehaay igwibiin,
<<W'ankwana Yasuu'a aamana,
malya oomidhhan imaar tindiya!
Baruukwa dhiwaayaakwa oomidhhan timeerna.>>
idiin.
32 Malya baraah W'ankwanaay ibhali barooh sooyaan.
Bariiyeeh indhiwa eeraw kasseeh han sooyaan.
33 Been whawaadiib,
usijni daabit bareeh haay giigiyaayt,
bareeteeh tijarhiinay ishaagwidh.
Shaawti baruuhwa kassaah indhiwaayaahwa itoomaasna.
34 Usijni daabit bareeh ugawooh haay ibaayt,
m'ariit suurii daasiya.
Baruuh Ukwaasana aamaniya akay winneet afirhiya.
Baruuhwa kassaah indhiwaayaahwa afirhiyaan.
35 Toolhaytooh yhaakma ikajareehna usijni daabit beeti diigwatiyaaniit,
<<Baliin eenda fidigaa!>>
idiin.
36 Usijni daabit Buulusii dehaay,
<<Yhaakma barookwa Siilaasi fiduug sooyaanheeb.
Oont'a fir'ana,
asgaa giigaana!>>
idi.
37 Laakiin Buulus ikajaree dehaay,
<<Hinin Roomaaniiba.
Iroomaani daabta mhaakamaat anu oodehayi suurii jasaayaan hoon.
Malya oosjin id'iin hoon.
Oont'a kwaabsiit hoon giigsitiib niyaameen han?
Abajoo!
Baraah aakna bay'iina siisarhooyt hooy nhariw.>>
idi.
38 Ikajar,
Buuluswa Siilaaswa Roomaaniib ikatiineet toona yhaakma sooyaanihoob,
bareeh mirkwaay hooy daaya.
39 Aflaay baraah eeyaaniit afoob hooy yhariwna.
Usijnii isfar'aniit,
tumadiinaatii giigeeneet toona hooy yhariwna.
40 Buuluswa Siilaaswa usijnii ifir'aniit har'ii,
Liidiyaay oogaw ibeen.
Beentooy aree W'ankwanaay aamanana imriina,
aree bareeh is'aakakirna.
Malya giigiyaan.