Niheemiya Oodehay Igirbaanee Waasamiya
13
Been oomb'i Muusaay Uuktaab uudehay maaswee winneet tageega hissii agriimamiya.
Uktaabiib aree Ammoonaayi tari Moo'aabaayi Ukwaasanaay umajlis biihadrayneet toona hooy kataabt akay timri.
2 Baraah Y'israa'iili m'ariitwa yameewwa ashshaab kiikeen.
Laakiin baraah Bal'aam ikriiniit Y'israa'iili aat kehii ikwasiyeet toona hooy yhariwna.
Ukwaasanaayuun aree w'aat deharaab ikwaas.
3 Uudehay oon whag imaasiwnihoob,
oodehay igirbaanaay taas Israa'iilee itfilna.
4 Toon toonaati hankaay,
Alyaashiib ufagiiri Ukwaasanaayoon ugawi mikhsanaayi aabki iikti.
Baruuh Toobyaay ayaaytaku,
5 aree bariiyooh dehaay win gaw isoomir.
Been oogaw suur wharrooy miyaawwa,
libaanwa,
udiini gawi gadh'iiwwa hooy daasamiin.
Masi aree wharrooyt tamnaat takweewwa,
gayi haabwa saliitwa,
hooy daasamiin.
Malya Ilaawiiwwa,
ifannanwa,
udheefaay gw'aadiigaawwa aree ittiyiwna.
Masi aree ifagiiriyaayi miyaaw iiktiin.
6 Laakiin tuun tuuna kastuuh tiiktiyihoob,
ani Alguduseeb kaahaay.
Whad'a Artashiish Baabilyooni had'a iiktiyeekka mhay tamuunwa malu hawla iiktiyihoob,
ani whad'aay dehaay agar.
Shalik doori har'ii aree whad'aay w'idin raatan.
7 Malya Algudus beeti y'an.
Beentooy aree Alyaashiib ikwaaseet toomaag akan.
Baruuh Toobyaay dehaay Ukwaasanaay gawiit dangaltiib gaw isoomireet toona akan.
8 Ani winneet ahasaayt,
Toobyaay oogawi gadh'i kasseeh ugawii barraab geedan.
9 Igawa atehareeneet toona sooyan.
Malya Ukwaasanaay oogawi gadh'i hooy agir.
Wharrooyt karaamaawwa,
oolbaanwa han geeb agir.
10 Masi aree,
w'adhidh Ilaawiyeeb iiktiib han attiyeewiyaab biikaayneet toona akan.
Ilaawiiwwa,
ifannanwa ishaga abkaab kassaah yhasheehna eekna beeti y'agarneet toona han akan.
11 Aflaay ani idaabta adaanin.
Bareeh raatan,
<<Ukwaasanaay uugaw naanhooy itoo'aash?>>
adi.
Malya bareeh waliikanaayt,
ishagaayoohna agir.
12 Kassaah Yahuudaay uudehay wharrooyt tamnaat takweetwa,
gayi haabwa saliitwa imikhsana beeti haay eeyaan.
13 Imikhsanaayeeb gw'aadiigaab ad'i.
Shalamiya ufagiiriiwwa,
Saaduug w'aalimwa,
Ulaawi Fadaaya iidneebwa,
imikhsana as'abik.
Haanaan Sakkuuri oor,
Mattaniyaay oor aree bareeyooh shamaamiiga akwaas.
Aan aanda aree amiina da iiktiin.
Baraah udehayiib m'ariit y'adhidhna.
14 Yaa Ukwaasanaayu,
toon toonaati jillaay sh'aaheeb.
Ukwaasanaayu oogawwa ushagaayoohwa sidkii shagaamaneet toona baabaadhiina!
15 Baliin eemb'i Yahuudaay Toosab inab eetiin da rhan.
Weer dehay aree,
eemak harroob iriibna.
Haabwa,
inabwa,
tiinwa,
weenaawwa,
imaki kehii irbiiniit Algudus beeti haay giigiyaan.
Aflaay ani bareeh Toosab naat han biidaliibneet toona winneet sooyan.
16 Tiiroosi da iiktiin Alguduseeb ikwiir baliin,
aashoobwa gwida jinsaayi b'iishraawwa haay y'iin.
Malya Toosab aree Yahuudaay udehayiib Alguduseeb iidlibna.
17 Ani Yahuudaay isuurkina adaanin,
<<Tuun baraak tid'aneet tuumaag naanaatu,
Toosab yiwaashiisteena han?
18 Hoobaakna teen teena teekna d'iyaab kiikeena han?
Aflaay Ukwaasanaayuun een igwirha kasseeh hininwa toon tumadiinaawwa kehoon kwaasaab kiiki han?
Oont'a baraak Toosab yiwaashiistaaniit,
Israa'iili kehii akra gadab yayakisteena.>>
adi.
19 Tusabti hankaay tehimniiti l'andala Alguduseeb idheefaayi kehii iiktiyihoob,
ani Tuusab hasamtiniyeeb ookiik idheefa biinigaalneet toona sooyan.
Aneeb ooknaayu da iiktiin aree gwadib idheefa asigw'ad.
Shaawti Tusabtiit yin rabeeb han biishuumsayneet toona bareeh sooyan.
20 Gaal door tari malu doora aatjarwa kasseeh ijinsaayi gadh'i b'iishraayanaawwa,
Algudusee ifir'aniit naayaan.
21 Laakiin ani bareeh winneet sooyan,
<<Whawaad naanhooy ukirraay naateena?
Toon toona masi tid'aneek,
w'ayi kehookna daasi andi.>>
adi.
Beenaay har'ii shaawti baraah Toosab y'aab kiikeen.
22 Malya Ilaawi igarooyeehna atehareetiit,
Toosab mugaddast iikwsiini jillaay,
giigeetiit idheefa ingw'iidneet toona sooyan.
Yaa Ukwaasanaay,
toon tunaatiib han sh'aaheeb,
ureerook oowin t'iiteena rhamaat rhisaaheeb.
23 Masi aree baliit teeyina,
Yahuudaay da m'at Ashduudiitwa,
Ammooniitwa,
Moo'aabiitwa d'iraab rhan.
24 Y'araahna itarab Ashduudi bhali hadiidiin.
Tari oodehay irawi bhali gal hadiidiin.
Yahuudaay ibhali aree kak hadiidameeneeb kiikanna.
25 Ani bareeh adaaninaayt,
aat kehii ad'i.
Daab gwadib athab'a,
malya tehamooteehna antif.
Baraah Ukwaasanaay dehaay halafooyeeneet toona akwaasiit,
<<T'arteekna bareeyeeh y'ar baasid'irna,
t'arteehna han y'areekna baasid'irna.
Tari baraakna iknaayaakna han bareeteeh t'arit baad'irna.
26 Israa'iileeb whad'a Suleemaan maagnaayt hooy id'iyeeb usabab,
een eed'ar t'iiteeb kiikeena han?
Gwida hashi bitik aree barooh t'iiti had'a kiihaay.
Ukwaasana barooh areeya,
malya Ukwaasana barooh kastooh Israa'iileeb had'aab ikwaas.
Laakiin baruuh girbaat takati sabbii maagnaayt id'i.
27 Oont'a baraakna toon tumaagnaay kastooh sakee neemsiiw,
girbaat m'at safeetiit Ukwaasanaayoon timgwashiishna han?>>
adi.
28 Yooyaad'a Alyaashiibi ufagiiri oowinnaay oor,
y'areesooh gaal Sanbalaat Hooraanaayiit oot d'iraabu.
Ani barooh fidnaab hoosu giigsan.
29 Yaa Ukwaasanaayu,
bareeh sh'aa!
Baraah ifagiiriyaayi shaga imigna.
Ifagiiramti galadwa Ilaawi galadwa han yiwaashiisiyaan.
30 Aflaay ani ifagiiriyaawwa Ilaawiiwwa kastooh tugirbanaatii ateharanaayt,
bareeh gaalka ooknaay shaga as'abik.
31 Ani masi atoolwaat karaamaati hindi ikatiin han daayi door haay y'eeneet toona ataakwikw.
Uudehay aree wharrooy awwal firaaywa,
tisamaraati awwal firaay ibashikwwa karaamaat haay y'eeneet toonaati.
Yaa Ukwaasanaayu,
toon toona kastooh dehaay daayiinaaytii sh'aaheeb!