Ifagiiriyaayi Gaddasti
29
01 Haaruunwa yꞌaraahwa fagiiriyaab aneeb shagaameen ikatiini jillaay,
ibakii toon toona bareeh sooya.
Dis yoobwa malu arginaawwa gwihaab baabariibwa yaksa.
02 Daayi gamhi bꞌuukii fatiiri hadhi shagaama.
Saliitiib hathaak keekwa,
saliitiib amhatiya fatiiri aafwa dꞌiyaa.
03 Bareeh jaambiiliib daasaat anii dehaay firꞌa.
Ooyoowwa yꞌargina imaloowwa han geeb firꞌa.
04 Malya Haaruunwa yꞌareehwa Umajlisiit Tukheemaati dheefaay haay mꞌaat bareeh yamee shigwidha.
05 Haaruun ugamiiswa tujibbaawwa,
eefoodiib whalakwa,
eefood ooknaawwa,
iginheet sideeriiwwa sitookwa.
Whalak bariiyooh kehii imilbabi shaash udaawriinaay winneet widida.
06 Bariiyooh ugirmaay kehii shaal daasa,
ootaaj umugaddas kehii s'abika.
07 Shimuuti saliit yaksaat bariiyooh ugirmaay kehii fifaat shaamita.
08 Yꞌareeh haay mꞌaat aree jibbaat sitookwa.
09 Bareeh igirmaayi kehii koofiyayt daasa.
Malya Haaruunwa y'areehwa milbabi shaash kehii haakwira.
Ifagiiramti aree diimaab bareetooh waajibt tikati.
Oontꞌaaneet aree Haaruunwa yꞌareehwa fagiiriyaab kwaastiit waastiniya.
10 Ooyu aree Umajlisiit Tukheemaati suurii haay mꞌaa.
Haaruunwa yꞌaraahwa bariiyooh ugirmaay kehii yꞌayeehna daaseen.
11 Ooyu Umajlisiit Tukheemaati dheefaay Wꞌankwanaay suurii harida.
12 Ooyooy booyii shalikna yaksaat tikaraamaati mhiini dꞌaayi kehii ugiibalaayiisook naat dꞌiyaa.
Oobooy ooraaw aree tikaraamaati mhiini asaasiib fifa.
13 Malya tehooyteeb teefeet toosmuum kastooh yaksa,
tooseewwa,
titinkwilꞌa mhalliteeh tuusmuum hooy haayeewwa yaksaat tikaraamaati mhiiniib liwa.
14 Laakiin ooyooyt shaawwa,
whakoowwa,
imanaawwa umꞌaskarii barraab liwa.
Beet tuuna aree idanuubeet karaama tikati.
15 Argin gaal yaksa.
Haaruunwa yꞌaraahwa aree bariiyooh ugirmaay kehii yꞌayeehna daaseen.
16 Wꞌargin harida,
malya oobooy yaksaat tikaraamaati mhiin kasseeh idaraayi kehii safaa.
17 Wꞌargin rifita,
tehooywa iragadaawwa shigwidha,
ugirmaawwa toosha tooraawwa geeb daasa.
18 Malya wꞌargin kassooh tikaraamaati mhiin liwa.
Tuun batuuh Wꞌankwanaayt atoolwaat karaama tikati.
Wꞌankwanaay oorda iyawt atoolwaat karaama ikatiin.
19 Wꞌargin ooraaw yaksa.
Haaruunwa yꞌaraahwa aree bariiyooh ugirmaay kehii yꞌayeehna daaseen.
20 Wꞌargin harida,
shalik booy hooy yaksaat Haaruunwa yꞌareeyoohwa y'angwil imaygwadiineet tifadteeb hatiya.
Masi aree yꞌayeehna imaygwadiini giibalayeeb hatiya,
iragadaayeehna imaygwadiini giibalayeeb hatiya.
Malya tikaraamaati mhiin kasseeh idaraayi kehii oobooy ibaagi fifa.
21 Tikaraamaati mhiinii shalik booy yaksa,
shalik shimuuti saliit han yaksa.
Malya Haaruunwa yhalaakaayeehwa,
yꞌareehwa yhalaakaayeehwa kehii fifa.
Aflaay baruuhwa yꞌaraahwa yhalakaayaahwa W'ankwanaay dehaay mugaddasaab ikatiin.
22 Oon wꞌargin toosmuum hooy yaksa,
toosmuumti niiwaawwa,
tehooyteet simuumwa,
tooseewwa,
mhalliteeh titinkwilꞌaawwa toosmuum kehii teefeetwa,
uragad umaygwadiibwa yaksa.
Uun w'argin aree waasamaat karaamaati argin ikati.
23 Hamiir anu daamaab ujaambiiliib eefeen yhadhi Wꞌankwanaay suurii daasamaab gaal hooy yaksa,
saliitii daama keek gaal yaksa,
fatiiri aaf aree gaal yaksa.
24 Teen tikaraama kasteeh Haaruunwa yꞌareeyoohwa y'ayeeb daasa.
Baraah aree W'ankwanaay suurii digeena,
aree digameent karaama ikatiin.
25 Malya bareeyooh yꞌayee tikaraama nuunamaat,
atoolwaat karaamaati geeb tikaraamaati mhiini kehii liwa.
Taan bataah Wꞌankwana ardiisiini shakwnuun ikatiin.
Wꞌankwanaay dehaay nꞌeetii daamaat karaama ikatiin.
26 Haaruunii dehaay waasamaab wꞌarginii iginha yaksaat W'ankwanaay suurii digaa.
Aree digameent karaama ikatiin.
Been baruuh aree bariiyook w'adhidh ikati.
27 Oon w'argin uwaasamaanaay itarab Haaruunwa yꞌareeyoohwa ikatiin.
Iginha idigamaabwa uragad utikaramaateebwa bareeyooh ikatiin.
28 Toon toona diimaab Yꞌisraaꞌiili Haaruunwa yꞌareeyoohwa dehaay ifar'aneeb w'adhidh ikati.
Teen bateeh Yꞌisraaꞌiili um'asgiit tikaraamaateesoohna Wꞌankwanaay dehaay ifarꞌana.
29 Haaruuniib yhalaka imugaddasa bariiyooh utaasiib ikatiin.
Aflaay baruuh iyaayyeenaay harꞌii yꞌaraah ameeshmaattiit yhalaka eetkwiin.
30 Wꞌoor bariiyooh harꞌii fagiiriib ikati shagaamti jillaay Umajlisiit Tukheema beeti yꞌiini.
Malya Oomhiin Umugaddasiib een yhalaka asarama bꞌi eetkwi.
31 Wꞌargin uwaasamaanaayt sha mugaddas mhiiniib tikwiya.
32 Haaruunwa yꞌaraahwa Umajlisiit Tukheemaati dheefaay wꞌarginiit sha tameena,
yhadhi ujaambiiliib eefeen han tameen.
33 W'afooyt t'aduumaatiib bareeyooh iwaasamtiiwwa igaddastiiwwa jillaay daamaat tikaraama baraah ood'oohna tameen.
Taan tikaraama mugaddasaatayt,
weer gaal han bateeh tami kiidi.
34 W'argin uwaasamaanaayt shaatii tari yhadhiyee fajir ookiik naat han timhi ikatiyeek,
batooh liwna.
Beet tuusha mugaddastuuyt,
ibakii katamamta.
35 Ani sooyaneetook toona kastooh Haaruunwa yꞌareeyoohwa dehaay d'iyaa.
Bareeh asarama b'i waasa.
36 Idanuubeet karaamaateeb w'afooy jillaay,
ibakii b'eebka yoob harida.
Tuun tuuna tikaraamaati mhiin atehartini.
Malya mugaddas ikatiyi jillaay saytuuni saliit kehii hatiya.
37 Toon toona asarama bꞌi dꞌiyaa.
Malya tikaraamaati mhiin winneet mugaddas iikti indi.
Barooh tatehiiniibka mugaddas iikti indi.
38 Tikaraamaati mhiiniib diimaab b'eebka far'eet tikaraama aree bak ikatiin:
malu hoob hawil ibariin karramama.
39 Hoob gaal fajir,
ooraaw aree himniit karramama.
40 Whu w'awwaliinaay geeb kiiloot n'akw b'uukiit,
litir nhas saytuuni saliitiib hathika,
gw'ameent karaama akay aree litir haab hooy fifaat karramama.
41 Whu ooraaw himniit fir'a,
wana saktaneet toonaatiit oob'uukwa,
isaytuuni saliitwa,
whaayt karaamaawwa geeb fir'a.
Beet tuuna W'ankwanaay oorda iniiw shakwnuun tikati,
atoolwaat karaama W'ankwanaay dehaay daamaat ikatiin.
42 Taan tikaraama t'atoolwaat diimaab taas taasii daameen.
Umajlisiit Tukheemaati dheefaay W'ankwanaay suurii karramameen.
Ani beentooy imaar hookna andi,
aree bhaliisami hookna andi.
43 Ani masi Y'israa'iili beentooy imaar andi.
Uumhiin aree aniib umatuunii mugaddas iikti indi.
44 Aflaay Umajlisiit Tukheemaawwa,
tikaraamaati mhiinwa mugaddasaab iikwasi andi.
Fagiiriyaab akeetiit aneeb shagaameeni jillaay,
Haaruunwa y'areehwa han mugaddasaab iikwasi andi.
45 Malya Y'sraaꞌiilaayi bitik ikwaar andi,
aree Ukwaasanaayoohna iikti andi.
46 Aflaay bareeh Masreeb whaashii isfar'a Wꞌankwana Ukwaasanaayoohna akatiyeet toona iikan iyadna.
Aflaay ani bareeyooh bitik ikwaar miyaadiib asfar'a.
Ani Wꞌankwana Ukwaasanaayoohna akati.