Ifagiiriyaayi Halaka
28
01 Usanook Haaruunwa yꞌareeh Naadaabwa,
Abiihuuwwa,
Alꞌasaarwa,
Itaamaarwa waliika.
Bareeh Y'israaꞌiili irawee waasa.
Aflaay baraah anii fagiiriya ikatiin.
02 Usanook Haaruunii dehaay mugaddasa halaka d'iyaa,
yhalaka barooh is'aliina,
aree gibil iyawna.
03 Yhalakaayi ista ani fagarandiit hiiyyeeb kasseeh sooya.
Baraah Haaruun mugaddas ikatiyeet toona isookiin halaka dehaay shagaameen.
Baruuh fagiiriib akeetiit anii dehaay shagaamiini.
04 Baraah een yhalaka bak shagaameena:
sideeriitwa,
eefoodwa,
halakwa,
gamiis amhaydaabwa,
shaashwa,
imilbabi shaashwa ikatiin.
Baraah een yhalaka imugaddasa usanook Haaruunwa y'areeyooh dehaaywa shagaameen.
Aflaay baraah fagiiriyaab akeetiit shagaameen.
5 Baraah yhalaka hayuudiib dim'araay lilwa,
samaawiibwa,
adaarhamaashwa kirkimiyaay n'akw naayloonii shagaameen.
Eefood
6 Eefood dim'araabwa,
samaawi lilwa,
adaarhamaashwa kirkimiyaaywa n'akw naayloonii shagaameena,
aree kanaaniiga haaydi shagaameen.
7 Maloot harkaayi mhallee irikwna taktak is'abiikt dehaay daameena,
aflaay whalak daayiib itehakwiir.
8 Whaba w'usta shagaamaab ikatiyi aree teen teena tiknaatee shagaamamiini:
n'akw naayloon dim'araabwa,
samaawi lilwa,
adaarhamaashwa kirkimiyaywa lilee shagaamamiini.
9 Malu alya awi yaksaat Israa'iileeb y'ari sima hooy naggasha.
10 Aweeb gaalnaay asagwir sima naggasha,
w'awi uraawiib aree asagwir sima naggasha.
Tufraytiisoohna taariikhiit hay'aatii taakwikwa.
11 Israa'iileeb y'ari sima y'awi imalooyeeb naggasha,
w'usta ukhaatim naggashiiniib t'iiteena naggasha.
Malya y'awi dim'araab hooy kwilila.
12 Y'awi imalu gaalka wharkaay eefoodi kehii hakwira.
Baraah Israa'iileeb y'areet sh'aniit ikatiin.
Haaruun ismaayeehna yharkaayeeh kehii itfayiik,
aree W'ankwanaay suurii sh'aniit ikatiin.
13 Dim'araayt kwiluuli shagaama,
14 aree maloot shinshila nhas dim'araayt tuyaaytiit ameedhiwiyaat d'iyaa.
Bateeh idim'araayt kwiluuliitiib haakwira.
Iginheet Sideeri
15 Malya Ukwaasanaay mikir iteharriiwihoob titookwkwiit iginheet sideeri kanaaniiga haaydi shagaasiisa.
Batooh eefoodiit kwaasa:
dim'araabwa,
samaawi lilwa,
adaarhamaashwa kirkimiyaaywa n'akw naayloonii shagaamamtini.
16 Batuuh maloot m'adhadhaayee daayaat marab'a tikati,
22 sentimitir gwimadt tikati,
22 sentimitir mar'a tikati.
17 Malya fadhig safa alya aweeyeeb kehii d'iyaa.
Oosaf w'awwaliinaay yaaguutwa,
agiig adaroobwa,
luulaatwa daayeen.
18 Oosaf umalyaay bahramaanwa,
yaaguut hadalwa,
agiig eeraabwa daayeen.
19 Oosaf umhayaay soomiyaatwa,
alaatwa,
adaarhamash siigw'eebwa hooy daayeen.
20 Oosaf ufadhigaay sabarjadwa,
jad'i aweewwa,
yashabwa hooy daayeen.
Aan y'awi kassaah idim'araayt kwiluuliitiib daameen.
21 Y'awi tamna maloob ikatiina,
aweeb gaalnaayka Israa'iileeb y'areeb gaalnaay sim kehii naggashamiini.
Ukhaatim unaggashamaab t'iiteena,
aweeb gaalnaayka tigabiila titamna malooti sim gaal kehii naggashamiini.
22 Iginheet sideeriitii dehaay nhas dim'araay tuyaatiit ameeliwiyaat shinshila d'iyaa.
23 Malu dim'araay fay shagaama,
eefay aree iginheet sideeriiti rikwna haay s'abika.
24 Tishinshila timalu iginheet sideeriitiib eefeen eefay haay s'abika.
25 Tishinshila teeraw idim'araayt kwiluuliyaateeb shuumsa.
Bateeh wharkaay kehii eefeeb eefoodiib s'abika.
26 Malu dim'araay fay shagaamaat iginheet sideeriiti rikwna eeraw,
eefoodiib oofaad tehooyti ginnaaliib s'abika.
27 Malu fay warib shagaamaat bareeh eefoodi suurii yharkaayi kehii eefeen yhalaka tehooytee s'abika.
Eefoodi whabaay mhakwal tusilhaayti daraag s'abika.
28 Iginheet sideeriiti fay adaarhamaash luulii eefoodiib ifayeeb hakwira,
whabaay aree s'abika.
Aflaay iginheet sideeri eefoodiib daayiib ibik tindi.
29 Haaruun Oomhiin Umugaddas shuumiiniyeebka,
Israa'iileeb y'ari sima iginheet sideeriiti kehii ugin'iyooh daasi indi.
Beet tuuna diimaab W'ankwanaay suurii sh'aniit tikati.
30 Masi aree iginheet sideeriiti kehii Uuriimwa Tummiimwa daasa.
Aflaay baraah Haaruun W'ankwanaay suurii ingadiyeebka ugin'iyooh daasiini.
Haaruun Y'israa'iilaayee dehaay W'ankwanaay suurii mikir ikwasiyihoob,
diimaab bareeh ugin'iyooh bak daasi indi.
Ifagiiriyaayi Halaka Aaraw
31 Eefoodiib whalak kassooh samaawi halakaayee shagaama.
32 Ugirmaay dehaay bitkeesii til'iit hooy daatni.
Beentooy amhayda ginnaal t'alaati mhakwariit yakaab tutil'iiti kwayaay daayiini.
Aflaay batuuh shatatami kitdi.
33 Rummaanaat samaawiit,
adaarhamaashwa kirkimiyaaywa whalaki faadiib d'iyaa.
Bateeyooh bitik dim'araayt way'a eebtik d'iyaa.
34 Idim'araayt way'aawwa tirummaaniyaywa whalakiit fardaatiib d'iyaa.
35 Haaruun W'ankwanaay suurii shagaamiiniyihoob,
oon whalak ibakii eetkwi.
Baruuh W'ankwanaay suurii Oomhiin Umugaddas shuuminiyihoobwa itfar'ihoobwa tiway'aati hissa itmassiiwna.
Aflaay baruuh whalak eetkwiyeek,
iiyyi kiidi.
36 Nhas dim'araay shhaan shagaama.
Bariiyooh aree ukhatimiit kehii naggasha:
W'ankwanaay dehaay mugaddas ikati.
37 Samaawi luulii aree Haaruuniib ushaaliib suuriisii s'abika.
38 Uushhaan Haaruuniit tubiitiitiib daayi indi.
Aflaay Y'israa'iili danuub d'iitiit ifar'aneet tikaraama timugaddasa hooy yaksi indi.
Baruuh ibakii Haaruuniit tubiitiitiib diimaab daayiini.
Aflaay W'ankwana bareeh gabbalami indi.
39 Haaruuniib ugamiiswa ooshaalwa n'akw naayloonii shagaama.
Imilbabi shaash aree kanaaniiga haaydi shagaamiini.
40 Haaruuniib y'aree dehaay han gamiswa,
milbabi shashwa,
daawriit koofiyaywa shagaama.
Taan taana bareeh takweet iyawna aree is'aliin.
41 Een yhalaka usanook Haaruunwa y'areehwa sitookwiit har'ii,
bareeh saytuuni saliitii shaamita aree ushagaay dehaay waasa.
Baraah fagiiriyaab akeetiit shagaameeni jillaay mugaddasaab kwaasa.
42 Bareeh iraboob ikwabis naaylooni sirwal dehaay shagaama.
Isirwal ilibbiyee tikwilbaati mhakwal ookiik ikatimna.
43 Haaruunwa y'araahwa Umajlisiit Tukheema shuumeeneebka ibakii een isirwal eetkwiina,
tari Oomhiin Umugaddasiib tikaraamaati mhiin idawilneebka eetkwiin.
Aflaay baraah gwabab kwaastiit iiyyi kiidiin.
Tuun tuuna Haaruunwa utaasoohwa diimaab waajibtoohna tikati.