Atoolwaat Karaamaati Mhiin
27
Gabaati hindiyee karaamaati mhiin marab'a kwaasaat d'ira.
Baruuh 2 mitraawwa 25 sentimitirwa tageegaab ikati,
1 mitirwa 34 sentimitirwa gwimad ikati,
1 mitirwa 34 sentimitirwa mar'a ikati.
2 Fadhigee irikwna d'aab hooy d'iya.
Aflaay aad'aawwa tikaraamaati mhiinwa gaal kit'ani ikatiina,
aree tikaraamaati mhiin baloob sitookwa.
3 N'eetihaash giigseen ijardalaawwa,
titooriyaywa,
itashaawwa,
tushaati mik'abaawwa,
igidraawwa,
kasseeh balooy shagaama.
4 Balooyt shabaka fadhig fay tibariit d'iyaa.
Aree fadhig balooy fay shagaamaat fadhigee tushabakaati rikwnaayeeb,
gaalka rikwniib d'iyaa.
5 Tikaraamaati mhiiniib oorfuufi whii batooh daasa.
Aflaay batuuh tikaraamaati mhiini tarab asti kantiim.
6 Tikaraamaati mhiinii dehaay gabaati hindiyee aamuudaab shagaamaat bareeh baloob sitookwa.
7 Y'aamuuda ifayeeb shuumsa.
Aflaay tikaraamaati mhiin itfayyiikihoob,
baraah mhallee idarageeb daayeen.
8 Tikaraamaati mhiin harar kwaasa,
lhaab baabariib kwaasa.
Ani oorbaay kehii rhisaneetook tehay'aatiit ikati.
Whoosh
9 Tukheemaatii dehaay hoosh d'iyaa.
Us'iidiit tuujha 46 mitir gwimad ikati,
aree n'akw naayloonii hayadt sitaara dehaay daameen.
10 Tagwuugw kwil'iyaatwa tagwuugw balooy asaasi kehiiwwa yakeen.
Tisitaara t'ashteetiit allaagaawwa ifayi kehiiwwa sh'aga.
11 Tugiblaatiit tuujha han 46 mitir gwimad ikati,
aree sitaaraat ibariib ikati.
Tagwuugw kwil'iyaatwa,
tagwuugw balooy asaasi kehiiwwa yakeen.
Tisitaara t'ashteetiit allaagaawwa ifayeebwa sh'aga.
12 Whoosh uyindhibiit jhaatii 23 mitir mar'a ikati.
Aree tisitaara tamint kwil'i tamin asaasi kehii eefeenaateeb itish'iigna.
13 Whoosh uyintalawiit jhaatii han 23 mitir mar'a ikati.
14 Tisitaara udheefaay dar gaalnaay eefeent 6 mitraawwa 9 sentimitirwa gwimadt ikatiina,
aree mhayt kwil'i mhay asaasi kehii eefeenaateeb itish'iigna.
15 Oodar uraawiib eefeent tisitaara aree 6 mitraawwa 9 sentimitirwa gwimadt ikatiina,
aree mhayt kwil'i mhay asaasi kehii eefeenaateeb itish'iigna.
16 Whooshi dheefaay dehaay sitaaraat 9 mitir gwimadt shagaama.
Bataah samaawiitwa,
adaarhamaashwa,
kirkimiyaaywa n'akw naaylooni hayadt ikatiina aree kanaaniiga haaydi haydaab ikati.
Tisitaara fadhigt kwil'i fadhig asaasi kehii eefeenaateeb itish'iigna.
17 Whooshiib eefeent tikwil'iya kastaah ibakii ashteeti faywa allaagaatwa,
balooy asaaswa ibariint ikatiin.
18 Whoosh 46 mitir gwimad ikati,
23 mitir mar'a ikati.
Tisitaara n'akw naayloonii daamaat ikatiina,
2 mitraawwa 3 sentimitirwa gwimadt ikatiin.
Tikwil'iyaati asaas aree balooy daameen.
19 Tukheemaatiib haay shagaameeneeb igadh'i aaraw kassaah,
id'aneenaatiika ibakii balooy daameen.
Tukheemaati gasaneewwa,
whooshiit taaseewwa kassaah balooy daameen.
Tulambaati Saliit
20 Y'israa'iili saliit nhas saytuunii assaramaab,
tilamba buubsiiniib haay y'eeneetook toona sooya.
Aflaay tilamba diimaab balooleen.
21 Umajlisiit Tukheemaatiib,
tusitaaraatii barraab,
been Ugaladi Sanduuki fiireeb,
Haaruunwa y'araahwa W'ankwanaay suurii fajrii himniit ookiik tilamba baloolseen.
Tuun batuuh Y'israa'iilaayi bitik diimaab taas taasii waajibtoohna tikati.