Tukheema
26
Tukheema tamin nꞌakw naaylooniit sitaaraatii d'iyaa.
Batooh aree samaawiibwa,
adaarhamashwa adaru hamooyeewwa daamtini.
Aree kanaaniiga haaydi Ikaroobiima batiiyooh shagaamiini.
2 Tisitaara kastaah aree nadiir ikatiina,
12 mitra gwimadwa 2 mitra marꞌatwa ikatiin.
3 Ayt sitaara taktakeeb hayida,
tꞌay sitaara teeraw han bak tꞌiiteena kwaasa.
4 Tisitaaraati agiyaay dar gaalnaay ginnaaliib samaawiit sh'oogi hooy d'iyaa.
Tisitaara teeraw han bak tꞌiiteena d'iyaa.
5 Sitaaraat gaanaatiib ay tamuun sh'oogi d'iyaa,
aree tisitaara teerawti agiyaay han ay tamuun sh'oogi d'iyaa.
Tish'oogi taktaki fiireeb daayeen.
6 Malya ay tamuun dimꞌaraay birrag dꞌiyaat,
tisitaara taktak haay sꞌabika.
Aflaay tukheema gaana tikati.
7 Tukheemaati kehii aree yaati hamooyee asseenaay ikatiint sitaara shagaama,
kastaah hiddaab tamna gwit ikatiin.
8 Tisitaara titamna gwit kastaah nadiir ikatiina,
13 mitra gwimadwa 2 mitra marꞌatwa ikatiin.
9 Ayt sitaara gaal halakiib hayida,
tꞌasagwit teeraw aree weernaay hayida.
Tusitaara tꞌasagwira aree tukheemaatiit footeeb malu doora kisisa.
10 Majmuu'aat gaanaatiib ay tamuunt sh'oogi shagaamaat sitaaraati agiyaay uginnaaliib d'iyaa,
tumajmuu'a tooraawtiib han tisitaaraati ginnaaliib han ay tamuunt sh'oogi d'iyaa.
11 Malya ay tamuun balooy birrag shagaamaat tish'oogiyaateeb shashuumsa.
Baraah tukheema taktakeeb yhakwirna gaat ikwasiin.
12 Tukheemaatiit sitaaraati baagi aree sitaaraati tarab ikatiina,
tukheemaati agiyaay sh'aga.
13 Tukheemaatiit sitaara mhalleeh idaraayeeb ay tamuun santimitra ikatiina,
ibaagi imhiyaab aree tukheema hammiyi jillaay tukheemaatiit fardaateeb sh'ooga.
14 Tukheemaatii dehaay argini sar adaru sibaakiib takwaaynaay asseenaay shagaama.
W'asseenaay ooraaw aree nꞌakw galooy shagaama.
15 Tukheemaati daraayeeb gabaati hindiyee daama khashabi lha shagaama.
16 Oolha oongaalka aree 4 mitra gwimad kwaasa,
66 santimitra marꞌa kwaasa.
17 Taktaki kwayaay eefeen malu gasani dꞌiyaa.
Tukheemaati lha kasseeh aree bak shagaama.
18 Tukheemaati sꞌiidii dehaay tagwuugw lha dꞌiyaa.
19 Bareeyooh whii aree fadhig tamuun ashteeti asaas dꞌiyaa.
Oolha gaalnaay dehaayka malu asaas d'iyaa,
gasaneeb w'asaasiib shuumeen d'iyaa.
20 Oodar ooraaw tukheemaatiit giblaatiib tagwuugw lha dꞌiyaa.
21 Fadhig tamuun asaas,
oolha gaalnaayka malu asaas taktaki whii dꞌiyaa.
22 Tukheemaati dar uyindhibiinaay tufardaatiib aree asagwir lha dehaay dꞌiyaa.
23 Tufardaati agiyaay irikwnaayeeb aree malu lha dꞌiyaa.
24 Een imalu rikwnaayeeb ibakii whiisii imhakwal ookiik malu doora ikatiina,
aree gaal mhakwariib shuumeen.
Mhallaah irikwna bak ikatiin.
25 Aflaay beentooy asimhay lha daayeena,
tamna asagwir ashteeti asaas daayeena,
oolha gaalnaay whiika malu asaas daayeen.
26 Masi aree gabaatii taras d'iyaa:
ay lha tukheemaati dar gaalnaay dehaaywa,
27 ay taras oodar ooraawii dehaaywa,
ay taras tukheemaati lha uyindhibiib eefeenee dehaaywa shagaama.
28 Ting'ati taraas faad gaalnaay ooraaw ookiik daayiini,
ilhaayi bitik daayiini.
29 Eelha dim'araab hamiya,
dim'araay fay itaras yakseen aree shagaama.
Itaras han dim'araab hamiya.
30 Ani oorbaay kehii sooyaneetook tehay'aatiit tukheema yaksa.
31 Samaawiit sitaara d'iyaa,
adaarhamaashwa,
kirkimiyaaywa,
adaroobwa n'akw naayloonii shagaama.
Aree kanaaniiga haaydi Ikaroobiima batiiyooh shagaamiini.
32 Tusitaara dim'araayt allaagaateeb sh'aga,
gabaatiit kwil'i fadhigt dim'araab hamaynaati kehii d'iyaa.
Fadhig ashteeti asaasi kehii aree daameen.
33 Tusitaara ibirrageeb sh'aga,
tusitaaraati gidehii Ugaladi Sanduuk daasa.
Tusitaara Oomhiin Umugaddaswa,
Oomhiin Winneet Mugaddaswa tisfalli.
34 Oomhiin Winneet Mugaddasnaay eefeeb Ugaladi Sanduuki kehii asseenaay daasa.
35 Tutarabeesa tusitaaraatii barraab tukheemaatiit giblaatiib daasa.
Tulambaati m'abak aree batiiyooh ifiireeb oos'iidiit jhaatiib daasa.