Tukheemaatiit Karaama
25
01 Wꞌankwana Muusaay dehaay,
02 <<Yꞌisraaꞌiili sooya,
anii dehaay karaamaat ifarꞌaneet toonaati.
Baruuk anii dehaay tikaraama nuunamtiniya,
uginꞌuuh mhaltiib sooyiiniyi takka barook iniiw.
03 Teen tikaraama aree baruuk hooy tiniina:
dimꞌaraabwa,
ashteetwa,
baloobwa,
04 nꞌakw naayloonwa,
kirkimwa adaarhamaashwa adaru suufwa,
yaati hamooyi halakaawwa,
05 hakoob arginaayeeb adaru sibaakiib takwaywa,
bhari shꞌaay hakoowwa,
gabaati hindiiwwa,
06 lambaat buubsiini saytuuni saliitwa,
shimuuti saliitiit hadalt shakwiinwa,
shikwaan libaanwa,
07 alya aweebwa,
wari jawhara eefoodiib daayeenwa ufagiiriit sideeriyaaytiib daayeenwa hooy tiniina.
08 Malya uudehay anii dehaay ibakii mugaddast Kheema shagaameena.
Ani aree bareeyooh bitik ikwaar andi.
09 Toon Tukheema shagaamaana,
kasteeh tifarshaateeh ani rhisi andiyeet teh'aaytii shagaamaana.
Ugaladi Sanduuk
10 Gabaati hindiyee ugaladi sanduuk bareeh shagaasiisa.
Usanduuk 110 santimitra gwimad ikati,
66 santimitra marꞌa ikati,
66 santimitra tageegaab ikati.
11 Tehooywa tisaradwa aree nhas dimꞌaraab kwaasa,
dimꞌaraayt silt aree kasseeh idaraayeeb d'iyaa.
12 Fadhigt dimꞌaraay tillal dꞌiyaat aree fadhigee iragada haay haakwira.
Malu fay dar gaalnaay d'iyaa,
malu fay aree oodar ooraawiib d'iyaa.
13 Malya gabaati hindiyee aamuud shagaamaat bareeh dimꞌaraab kwibila.
14 Malya yꞌaamuuda ifayeeb shashuumsa,
usanduuki dariibka shuumseetiit haay itfayyiik.
15 Yꞌaamuuda oon usanduuki fayeeb itoo'iishna.
Baraah ibakii kahantaayaana.
16 Malya Tibadeha ani aniiweeteek usanduukiib daasa.
17 Tirhamaati kwirsi,
nhas dimꞌaraay asseenaay shagaama.
Uun wꞌasseenaay 110 santimitra gwimad,
66 santimitra marꞌa ikati.
18 Malu karoobiima atookwita dimꞌaraay shagaamaat wꞌasseenaayi agiyaay d'iyaa.
19 Karoobiim gaal faad gaalnaay d'iyaa,
ukaroobiim umalya oofaad ooraawiib d'iyaa.
Ikaroobiim w'asseenaayi kit'ani gaalnaay d'iyaa,
mhalleeh ifadeeb d'iyaa.
20 Ikaroobiim y'anbiraahna asti itbariirna,
w'asseenaay haay l'andalaatseen.
Ikaroobiim w'asseenaay beeti asti taktak eegwiriirna.
21 W'asseenaay ugaladi sanduuki mhakwal daastiniya.
Eelha Tibadehaateeb ani iyaaw hook andiyeeb aree usanduukiib daasa.
22 Malya ugaladi sanduuki kehii eefeen ikaroobiima imalooyi bitik w'asseenaayi mhakwal,
beentooy imaar hook andi.
Yꞌisraaꞌiili aniiweet tiwaseeti kasteeh iyaaw hook andi.
Tim'ari
23 Gabaati hindiyee tarabeesaat shagaama.
Tutarabeesa 88 santimitra gwimad tikati,
44 santimitra marꞌat tikati,
66 santimitra tageegaat tikati.
24 Batooh nhas dimꞌaraay kwibisa,
dimꞌaraayt silt aree oodar d'iyaa.
25 Masi aree giibaabt eetniit silt oodar kwilila,
tuusil 75 millimitra marꞌat tikati.
26 Tutarabeesaatii dehaay fadhig dimꞌaraay fay shagaama.
Fadhigee irikwina,
fadhigee iragadaayi mhiin aree haay haakwira.
27 Aafay toosil dawil ikatiina,
tutarabeesa yakseen yꞌaamuuda yꞌabikna.
28 Tigabaati hindi aamuuda dꞌiyaat bareeh dimꞌaraay kwibisa.
Bareeh aree tootarabeesa haay fiyaka.
29 Tikwoobaawwa eeshhanwa aree nhas dimꞌaraay d'iyaa.
Tikwibbaywa eekaswa whaayt karaama haay gw'ameeneeb han nhas dimꞌaraay d'iyaa.
30 Tikaraamaati hadhi toon tutarabeesaati kehii daasa,
kassoohoob aree anii suurii daasameen.
Tulambaati M'abak
31 Lambaati m'abak nhas dimꞌaraay shagaama,
uniiwaawwa ooyafwa kwita.
Daawrariimi faari kaaswa,
titadhaywa oofaarwa aree batiiyooh gaal kit'anii imshawawiin.
32 Tulambaati m'abak dariibka asagwir lꞌid yakeen.
Mhay dar gaalnaay yakeena,
mhay aree oodar ooraawiib yakeen.
33 Mhay kas aree loosi faar tꞌiiteeba,
tadhaaytwa faari geebwa aree lꞌiid gaalnaay daayeen.
Mhay aree oolꞌiid umalyaay daayeen.
Kassaah yꞌasagwir lꞌid tulambaati m'abakii han bak itbariirna.
34 Tulambaati m'abakiib aree beentooy fadhig kas loosiit fuuti t'iiteeb tadhaytwa faariibwa daayeena.
35 Tadhaayt gaat malu lꞌid tulambaati m'abakii itbariirni bitik daatni,
tutadhaay tumalya aree oodar umalyaay whii daatni.
Tutadhaay tumhaya aree oodar umhayaay whii daatni.
Kassaah aree asagwir lꞌid ikatiin.
36 Titadhaywa aalꞌidwa kassaah tilambaati m'abaki geeb gaal kit'ani ikatiina,
nhas dimꞌaraay aree itookwiitna.
37 Malya asaramaat lamba shagaamaat tulambaati m'abaki kehii d'iyaa.
Aflaay bataah suurii eefeeb oomhiin buubseen.
38 Tulambaati gadh'i nhas dimꞌaraay shagaama.
39 Tilambaati m'abakwa kasseeh een igadh'iiwwa aree 35 kiiloot nhas dimꞌaraay shagaamameen.
40 Digwagwa,
teen teena aree ani oorbaay kehii rhisaneetook tehayꞌaatii shagaama.