Oolbaaniit Karaamaati Mhiin
30
Gabaati hindiyee libaani laawiit karaamaati mhiin dꞌiyaa.
2 Uun uumhiin 45 santimitra gwimad ikati,
45 santimitra marꞌa ikati,
90 santimitra tageegaab ikati.
D'aab barooh ooknaay daamaab ibari.
3 Imhakwalwa kassaah idaraawwa,
aad'aawwa nhas dimꞌara sitookwa.
Dimꞌaraayt silt hooy kwilila.
4 Malu dimꞌaraay fay tikaraamaati mhiinii dehaay dꞌiyaa.
Mhalleeh idarag y'am'arriwaani whii d'iyaa.
Y'aamuuda barooh itfayiik haay im'abiikna.
5 Y'aamuuda gabaati hindiyee shagaama,
aree bareeh dim'araab sitookwa.
6 Tikaraamaati mhiin Ugaladi Sanduuki fiireeb teefeet tusitaaraati suurii daasa.
Ugaladi Sanduuki mhakwal eefeeb w'asseenaayi suurii daasa.
Ani been oomhiin imaar hook andi.
7 Haaruun tilamba isoomiirihoob,
ibakii tikaraamaati mhiiniib fajirka shikwaan libaan inliiw.
8 Baruuh himniit tilamba baloolsiiniyihoob ibakii masi libaan inliiw.
Aflaay uulbaan Wꞌankwanaay suurii diimaab taas taasii ituuliw indi.
9 Oon oomhiin weer libaan hooy baaliiwna,
tari warit atoolwaat karaama,
tari harrooyt karaama hooy baafirꞌana.
Gw'ameent karaama han kehii baafiifna.
10 Whawliib gaal door Haaruun bariiyeeh eedꞌa atehariini.
Uun tutahaaraati shaga aree ibakii idanuubeet karaamaati booyii ikati,
taas taasii daamiini.
Tuun tuuna Wꞌankwanaay dehaay winneet mugaddast tikati.>>
idi.
Umajlisiit Tukheemaatii Dehaay Imhallaga
11 Malya Wꞌankwana Muusaay dehaay,
12 <<Yꞌisraaꞌiili hansiibihoob,
gaalka itehasiibihoob ibakii Wꞌankwanaay dehaay umidhhaniyooh jillaay naat kwansiyeet toonaati.
Bareeh hansiibihoob aree nasiibeet han kehii daami kiidiin.
13 Unafar w'itehasiibka ibakii ashteeti mhallagaayee shalikna kwansi,
W'ankwanaay dehaay mugaddasaat karaama ikatiin.
Oomhiin umugaddasi sheekaliit tehay'aatiib,
beet tuuna tagwuugw girsha tikati.
14 Baliin kassaah hasabtiit hasameen aree tagwuugw hawla tari imhakwal ikatiin ibakii Wꞌankwanaay dehaay karaamaat ifarꞌana.
15 Uudehay igaba Sheekali tarabi mhakwal ibakii iyawna.
Uudehay imiskiina aree umidhhaniyoohna jillaay Wꞌankwanaay dehaay karaamaat ifarꞌanihoob,
shalikna biifir'aneet toonaati.
16 Een imhallaga Yꞌisraaꞌiilaayee nuunama.
Baraah aree Umajlisiit Tukheemaatiit khidmaatiiba.
Wꞌankwanaay suurii Yꞌisraaꞌiilaayee dehaay shꞌaniit ikatiin.
Baraah een imhallaga umidhhaniyoohna jillaay ikweesna.>>
idi.
Shagwadhi Tasha
17 Malya Wꞌankwana Muusaay dehaay,
18 <<Balooy tash shagaama,
ootash asaasi kehii dꞌiyaa.
Tikaraamaati mhiinwa Umajlisiit Tukheemaawwa eebtik daasaat yam hooy dꞌiyaa.
19 Haaruunwa yꞌaraahwa aree yꞌayeehwa iragadaayeehwa een iyamee ishagwidhna.
20 Baraah Umajlisiit Tukheema shuumeeneebka,
biiyaayni jillaay iyamee ishtagwiidna.
Masi aree baraah atoolwaat karaama fir'atiit shagaameeni jillaay tikaraamaati mhiin idawilnihoob,
21 biiyaayni jillaay yꞌayeehwa iragadaayeehwa ishagwidhna.
Tuun tuuna aree Haaruunwa utaasoohwa diimaab taas taasii waajibtoohna tikati.>>
idi.
Shimuuti Saliit
22 Malya Wꞌankwana Muusaay dehaay,
23 <<Teen tishakwiina yaksa:
6 kiiloot yameema mirwa,
3 kiiloot shikwaan girfaabwa,
3 kiiloot shikwaan aggaabwa,
24 aree 6 kiiloot shakwiint hadaltwa,
4 litra nhas saytuuni saliitwa hooy shaawa.
25 Een bareeh mugaddas shimuuti saliitiib dꞌiyaa,
shakwiinaati kanaaniiga shagaamaab ikatiyeet shakwiintiib aree shaawa.
Beet tuuna mugaddas shimuuti saliit tikati.
26 Malya toon batooh Umajlisiit Tukheema haay shimita.
Ugaladi Sanduuk han haay shimita.
27 Tutarabeesaawwa kasseeh igadhꞌeehwa,
tilambaati m'abakaawwa igadhꞌeehwa,
oolbaaniit karaamaati mhiinwa,
28 atoolwaat karaamaati mhiinwa,
kasseeh igadhꞌeehwa,
ootashwa w'asaasoohwa haay shimita.
29 Teen teena mugaddasaat tikwasiya.
Aflaay bataah winneet mugaddasaat ikatiina,
aree bateeh tatehitniina kastuuh mugaddast tikati.
30 Haaruunwa yꞌareehwa shimita,
aree mugaddasaab kwaasa.
Aflaay baraah fagiiriyaab akeetiit aneeb shagaameen.
31 Yꞌisraaꞌiilaayee dehaay,
<Uun baruuh mugaddas saliiti shimuut ikati,
taas taasii aree daamiini.
32 W'aadami garooy kehii baafiifa,
ikati saliitka han oont'aaneet baashagaama.
Uun baruuh mugaddasu,
aree geebookna mugaddas ikatiyeet toonaati.
33 Shakwiint batooh tꞌiiteet dꞌiitiit fagiiriib baakaay haay shammiitka ibakii udehayiisooh itkit'a indi.>
diyaa.>>
idi.
Oolbaan
34 Malya Wꞌankwana Muusaay dehaay,
<<Shikwant shakwiina yaksa:
milukwtwa,
dufraatwa t'afwa yaksaat nhas shikwaan libaaniib shaawa.
Aan baraah kassaah nadiir awdinameen.
35 Een bareeh shakwiintiib shaawaat shakwiinti kanaaniiga shagaamaab ikatiyi shikwaan libaan haay d'iyaa.
Miilak hooy shaawaat aree nhaswa mugaddaswa kwaasa.
36 Shalikna hooy huugaat bꞌuuk kwaasa,
malya Umajlisiit Tukheemaatiib Ugaladi Sanduuki suurii daasa.
Ani beentooy imaar hook andi.
Beet tuuna winneet mugaddast dehook iikti tindi.
37 Barook ooknaayook dehaay aree oon oolbaan tꞌiiteeb baashagaama.
Tuun tuuna Wꞌankwanaay dehaay mugaddast tikati.
38 Shakwnuuni jillaay oon oolbaan tꞌiiteeb shagaamiiniibka ibakii udehayiisooh itkit'a indi.>>
idi.