Yakoobo ki⁄araa dosi tongoo da Beteelige
35
1 Qariqaaqari Iliitleemu gi kaay sa Yakoobo tuba, “Tlayii, taa⁄a ibinaa kay tongoo da Beteelige, taysi la sini tlehhinay kayda masabaahu sa ana, ana Iliitleemu gwaa ilii ca⁄u ugu, qatlay gaa ilii lakiikimite nankooguna gu didiru Esaaw.”a2 Yakoobo gi kaay sa hida goõ gu aya gosi haa hhakee goõ gwaa sliimaa waaree haa ina tuba, “Kwakwahha sanaamamuu goõ gu iliitleemamee gu kabiraa waka, da waara tla⁄aã googunay, langu ilabuusliday unkuray kilakokuna, layii fookiday qayroo kokuna gu hhoi loi. 3 Da hheꞌesi asu waaudani Beteelige, ana ma tleehhi teꞌesii masabaahu sa Iliitleemu, hiĩ gunaa iliiaw qatlay gu ibinaa dooi da maana, kara Iliitleemuki guũ waara haa ana daqeemoo sliimaa gaa kay.”
4 Inkoo, inay gi haysiri sa Yakoobo sanaamamuu koina goõ haa heleenanuu giyaay lu⁄uminiri eaa koinay, hiriisasuu koina pahha. Da hheꞌesi Yakoobo gigi tipi khanslaaoo pahha, kibiriĩ gu khaimoo wakuu, uma gosi na mualooni gu waara ilaciyaa haa Sekeemu. 5 Qatlay giyaa ilii tlaatleesiri waaudimoo, Iliitleemu sigiraagi khay tlaꞌamee looee goõ gu yaamu sliimaa, gwaa ilaciyaa waaree haa Sekeemu. Inkoo, gwaa sirakoniriiba Yakoobo sliimaa haa yaꞌay kosi.
6 Da hheꞌesi Yakoobo haa hida kosi hhakira gwaa sliimaa waaree haa ina, gi dayri Luusuge. Daqatee naa asu Beteeli, hhapee da Kanaanige. 7 Teꞌesii gi tleehhi masabaahu haa girigi ay uma daqatee na Eli-Beteeli,b sa gimba Iliitleemu gwaa iliica⁄i taysi, qatlay giyaa ilii lakiikimidiye Esaaw nankooina gu didiru. 8 Qatlaykeesii Deboora gi hhanti. Wakaꞌalee ina naa hadee daa omiimima Rebeeka. Dagagi tosaa qaasi kibiriĩ gu khaimoo gu mualoonige, hiihuuꞌuma gu wayee gu Beteelige. Inkoo, khaimokee dugurigi ay uma na Alooni-Bakuuti.c
9 Qariqaaqari Yakoobo giyaa ilii ki⁄i yadaa hhapee da Padaani-Araamugo, kara Iliitleemu gwaagi iliica⁄i teꞌesii Beeteelige, gugi ⁄aafi. 10 Iliitleemu gi kaay daqa dosii tuba, “Ugu dugwaa eteediidina na Yakoobo. Inkoo, uma googu na Israeeli.” Teꞌesii Iliitleemu gurigi ay, uma na Israeeli. 11 Da hheꞌesi Iliitleemu gi kaay sa ina tuba, “Ana na Iliitleemu gu kooma ⁄uuru goõ, laqwala haa hiiroogidaw. Hari amoo doogu daayii ca⁄i hhapee, hhapapu wa⁄a see, kara watemi yaay ca⁄iyay laqwaloo doogwaa. 12 Hhapeti gaa haysi sa Aburahaamu haa Isaaka, inkoo sugu hadisa ugu, kara balalu gwaa khocee gamaa hadisa sa laqwaloo doogu.” 13 Da hheꞌesi Iliitleemu gugi may Yakoobo daqateesii giyaa ilii gimaamisiye haa ina, gi ki⁄i rawge. 14 Yakoobo gi qadidisi tlaa⁄a, unguruiya pahha, sa hiislaslaw daqatee Iliitleemu giyaa ilii gimaamisiye haa ina. Da hheꞌesi gi hadisi sadaaka sa Iliitleemu, hari amoo da ilii tuutuqa unguruiyatee difaay da sabiibu, kara giyaa ilii tuutuqi du⁄iya. 15 Yakoobo girigi ay uma daqatee Iliitleemu giyaa ilii gimaamisiye haa ina na Beteeli.d
Benyamiini dugwaa ilii laqwali haa Raheeli hhamaraa dosi
16 Yakoobo haa hida gu aya gosi gi looyiri Beteeligo, gi yade khuꞌusiri Efuraatige (inkotii na Beteleheemu). Qatlay giyaa ilii kahhiyee dawaraa taysi, Raheeli gi tlaatleesidi arimaa slahhaaꞌamee da dihhi dayii dawaraa haa dagagi labaꞌasi hari khisla. 17 Slahhaaꞌamee gu ba⁄adaa giyaa ilii ilakoniri hari khisla sa hiidawaraa da daa⁄u gosi, laqwaliidisoꞌoo gi kaadi tuba, “Hhanti tlaꞌamuta, inkoo haanii daadi naw.”
18 Qatlay Raheeli giyaa ilii slaꞌade dafida himpoo dayii faakoo, hirigi aydi uma nankosi na Benooni.e Kara, taataa gosi gurigi ay uma nakee na Benyamiini.f 19 Da hheꞌesi Raheeli ginaa ilii hhanti, dagagi qaasi ilaciyaa haa amoo daa yaamu gu Efuraati khuꞌuuꞌumisa. 20 Yakoobo gi qadidisi tlaa⁄a aysa da Raheelige, ma tlaa⁄a da hiislaslaw tleehhiti, unguruiyatee da tlaa⁄a letuti naqatloo see wanta.
21 Da hheꞌesi Israeeli (Yakoobo) gi ilakoomi haa hhiyuuma dosi. Ina giyaa ilii cati hari tlankoo gu Edeeri, teꞌesii hari bara waka da tlankokee gii tluhhusi hemaa dosi. 22 Qatlay Israeeli giyaa ilii kahhiye hhapeteesii, nankosi Rubeeni gi gui haa Bilihhaa, hadee da afayi da taataa gosi, Israeeli gi akhasi gimbakee.
Yaꞌay gu hhawatee gu Yakoobo
Yakoobo yaa kona yaꞌay gu hhawatee mibi haa cada.
23 Yaꞌay gu hhawatee gu Leyaa yaa,
Rubeeni nanku badiisu gu Yakoobo,
Simi⁄ooni, Laawi, Yuuda, Isakaari haa Sabulooni.
24 Yaꞌay gu hhawatee gu Raheeli yaa,
Yoseefu haa Benyamiini.
25 Yaꞌay gu hhawatee gu Bilihhaa, tongitoꞌoo da Raheeli yaa,
Daani haa Nafutaali.
26 Kara yaꞌay gu hhawatee gu Siliipa, tongitoꞌoo da Leyaa yaa,
Gaadi haa Aseeri.
Hhaã na yaꞌay gu hhawatee gu Yakoobo, hhaã giyaa laqwali, giyaa ilii kahhiye hhapee da Padaani-Araamuge.
Isaaka gwaaꞌaraa dosi
27 Asunkuilee hiifaakoo gu hhiyuuma dosi, Yakoobo gi hada kay mara gu taataa gosii Isaaka taysi Mamureege, ilaciyaa haa Heburooni.g Teꞌesii na daqa slime Aburahaamu giyaa ilii ibiidi yaamulooay gooba pahha. 28 Isaaka koraraa kosi giyaa ilii dayri miyaa leẽ haa mibeeri gweleti, 29 gi hhami, hiĩ gaduudi tuku haa kona koraraa wa⁄a. Ina hingigi ilagaasi haa hida kosi gwaa giyaadee kaka⁄u. Da hheꞌesi yaꞌay kosi Esaaw haa Yakoobo gugi qaasiri.