Diina haa hida gu Sekeemu
34
1 Letu waka Diina, sagameeriya da Yakoobo, daa laqwali ha Leyaa hadee dosi, yaa ilii khookhocuu kaydi tigay gu hhapetee da Kanaani. 2 Sekeemu yaa nanku Hamoori. Hamoori yaati Hiifimoo, ina naa heedi gu didiru gu hhapetee. Sekeemu giyaa ilii arimi Diina, gigi ooy hari ⁄uuru haa gigi cihhi. 3 Sekeemu gi tlaatleesi slahhaahhaau Diina, gi ilaqinci hiifaafahharu haa laalaagiru. 4 Inkoo, Sekeemu gi cocoꞌomoo kay haa Hamoori, taataa gosi, sugugi kaay tuba, “Taa⁄a sini khabinte Diina, sagameeriyatee ma hadee dooi tleehhiti.”5 Yakoobo ginaa asu ilii akhasi tuba, sagameeriya dosi Diina, dagaã cihhi ha Sekeemu. Inkoo, ina yaa kaayiiba gimba lensee, sa gimba yaꞌay kosi yaa segenge wanay deꞌenay kuꞌunaanay. Da hheꞌesi, sigigi kaay giyaa ilii ki⁄iri ayage.
6 Da hheꞌesi Hamoori taataa gosi Sekeemu gi hada kay daqa Yakooboge, ma cocoꞌomoo kay haa ina gimbakee gu Diina. 7 Qatlaykeesii yaꞌay kosi Yakoobo yaati asu ki⁄iri deꞌengo. Qatlay giyaa ilii akhasiri gimbakee gu tlaku gu hotooina Diina, daa yondiidi ha Sekeemu, gi slahhaahhaairi haa gi qupimidiri hari khisla, sa gimba giyaa cihhi sagameeriya da Yakoobo. Ina yaati yondiidi gimba gu ilamuree hhapee da Israeelige, gimbaki yaati kitlaku.
8 Teꞌesii, Hamoori gi kaay sa Yakoobo haa yaꞌay kosi tuba, “Nankoy Sekeemu gi slai hari khisla sagameeriya dooguna. Hhooa ⁄imba, ma daga khabimi ha nankoy. 9 Hangu ila⁄imbidane, mangu wariikhabiibini. Dandiray ilakona khaboo sagameeru gu kabiraa dooguna, kara unkuray ma khabiibintiri sagameeru goori. 10 Hari amotee unkuray ibitay sliimaa haa dandiray, kara dangu ⁄imbi ibinaa daqa ga unkuray slaꞌadee hhapetii, naadintay haa kirigintay idadu, kiriga da hhapee see.”
11 Sekeemu gi asu kaay sa taataa gu Diina haa hhiee kosi tuba, “Sini ⁄imbidee firoo dooi, ma khabimi Diina hari muree, kara ana sangu hadisa idoo ga unkuray slaꞌadee. 12 Kara unkuray sini kaadee khooslay haa idoo ga slaꞌadee da haysaraa, gimati khooslay wa⁄a gu malee slanqasa. Gu lou, ana hagu hadisa, ma khabimi sagameeriyati, gi hadee dooi tleehhita.”
13 Teꞌesii yaꞌay gu Yakoobo gii coriri Sekeemu haa Hamoori, sa gimba Sekeemu giyaa hheꞌesi, giyaa cihhi haa giyaa muriidisi hhioo dooina Diina. 14 Inay gigi ilaki⁄isiri tuba, “Dandiray hiidahhasanaaba, hotoori dagama khabimi ha heedi da kahhiye daba⁄u. Teesaaqay laqaraa daqa doorii ti ilamuree da didiri. 15 Inkoo, bere hangu ila⁄ibidana, gii dahhasiday ⁄imbaraa gimbaki, kwanda hhawatee goõ tla⁄aã googunay digi daba⁄iye, gi dandiray pahha tleehhitay. 16 Teꞌesii hoo asu ⁄imbana unkuray, ma khabiibintiri sagameeru goori haa unkuray gi ⁄imbiday ma khabiibini sagameeru googuna, ha ibiidana sliimaa, gi hida gu hhapee leẽ tleehhidana. 17 Bere ha siꞌiday gimbaki gu daba⁄u, hangu afii⁄utlana sagameeriya doori, kara dandiray hay ca⁄ana, gi waaudana tiaa.”
18 Gimbakee koina gi muunaboo⁄eesi Hamoori haa nankosi Sekeemu. 19 Qaraimokee yaay kaaiiba coko⁄o see hiigaasaraa hiifadidukee gu daba⁄u, maꞌaana sagameeriyatee da Yakoobo giyaa slai hari khisla. Kara ina yaa kona muree da didiri daqa taataa gosii ba⁄ay da yaꞌay kosi wakinay goõ.
20 Inkoo, Hamoori haa nankosi Sekeemu gi hada kayri kaꞌafu gu yaamu koinay, giyoó ilii kurunkurimidiyee, gi cocoiyay haa looee da hhapee dooina tuba, 21 “Yakoobo haa hida kosi ti slaiyay deneꞌee koti tleehhida. Inay hagi kwahhasuusane, ma ibiidiri daqa gi inay slaiyee hhapee doorii, kiriginee haa naadiidinee idadu, sa gimba hhapee doori dii tlaakhwi, hindi buꞌudisida ibinaa dandiray gonkotaa. Sagameeru gooina guyii dahhasana khabiibiru, dandiray see sagameeru goori duguyii dahhasi khabiibiru ha inay. 22 Kara, inay ⁄imbiyay ibinaa sliimaa haa dandiray, gi raqa leẽ tleehhidana, bere haã ⁄imbani gimbaki, hhawatee sliimaa hagi daba⁄ana inay pahha. 23 Gu lou, bere taqay laqana, kuꞌunaanay haa khooslay gooina goõ, koti tleehhidiyaaii? Inkoo, sigi ⁄imbane, ma ibiidiri sliimaa haa dandiray.”
24 Hhawatee goõ gwaayii kurunkuridee kaꞌafukeesii, hingigi ila⁄imbidiri haa gimbakee gu Hamoori haa nankosi Sekeemu. Da hheꞌesi hhawatee sliimaa yaamuge digigi daba⁄i.
25 Qatlay daa ilii cati balalu tami, hhawatee hhakee daa daba⁄i kahhiyay yaa konay slahhaaꞌamee da daba⁄u. Hida gu yaamu hhakee yaa iliipaꞌaniriiba tuba, digaa ilii tlai ha hida. Qatlaykeesii yaꞌay cada gu hhawatee gu Yakoobo, Simi⁄ooni haa Laawi, hhiee kosi gu Diina, gii oyri pangaee koina, gii guniri yaamu hhakeesii, ma hiislarakhasiri ⁄imbu, gi cu⁄iri hhawatee goõ. 26 Tla⁄aã gu hhawatee hhakeesii giyaa cu⁄iri hari pangaa gu dihhu, Hamoori haa Sekeemu nankosi yaa wanay. Inay hirigi waaudiri Diina aya gu Sekeemugo, girigi tooinaa ki⁄iri yaamu koinay. 27 Qatlay daa ilii kaka⁄i hhawatee hhakee, yaꞌay wakinay gu Yakoobo gii guniri yaamu hhakeesii, gii oyri idadu, sa gimba taysi daganaa ilii cihhi Diina ha Sekeemu. 28 Inay gii oyri bee⁄u, aaraa, yakway haa daqwaai koina, sliimaa haa idadu wakinay goõ hhakira gwaa yaamuge waaree haa qaymamuuge. 29 Kara gii oyri khooslay gooina goõ gu kaaru hari khisla, maraai koinaa sliimaa haa yaꞌay haa tigay koina. Inay yaa mayriiba idoo lensee.
30 Da hheꞌesi Yakoobo gi kaay sa Simi⁄ooni haa Laawi tuba, “Unkuray haraani khaydiri sa ana ilii⁄aadaꞌada da tlakwi, hari amoo da yondukee kokuna. Inkoo, Wakanaani haa Wapereesi gu hhapetii waaree, hinoóti arinay ana na tlakwi haa noóti wakiyay hari khisla. Dandiray ti coko⁄o, inay bere hiikurunkuridiyay, hiidahhasiyay iliitlaꞌa dandiray, hindigi hhamisiyay ana haa hida koi.”
31 Teꞌesii, Simi⁄ooni haa Laawi gi ilaki⁄isiri, tay hiĩ slahhaahhaairi tuba, “Ti ⁄imbanaaba heedikee yondiida tlakwaroo hhioo doori ubee, slipalauutoꞌoo pahha!”