Yakoobo slaslaw gosi haa Esaaw
33
1 Yakoobo gi waratlaysi ilaa kosi, gi arimi, yuꞌudiyaa! Esaaw yaa khoci sliimaa haa hhawatee miyaa cigahha. Teꞌesii ina gi deehhimi yaꞌay kosi sa Leyaa, Raheeli haa sa tongee dosi cada da tigay. 2 Ina gi qaasi tongetee da tigay haa yaꞌay koina pandaage, aluũ koinaa Leyaa haa yaꞌay kosi, kara Raheeli haa nankosi Yoseefu gunaa hiifaakoo. 3 Da hheꞌesi, Yakoobo ina loi gi giyaadi pandaa dooinay. Giyaa ilii daadaauusi ciyoomoo gu nankooinay, gi keebeeꞌemidi hhapeege pandaa dosi waa fanqu.4 Cirakiray, Esaaw yaagi taa⁄adi sa amoodabaawa Yakoobo, gugi khambacimi, kara gii qaasi dabaiĩ kosi isa dosii haa gugi humbaꞌamidi, gonkoinaa gi ⁄aa⁄iri sa hhaꞌaloo. 5 Qatlay Esaaw giyaa ilii arimi tigay haa daaqay, ina gi maasi Yakoobo tuba, “Hhaã gu sliimaa waaree haa ugu niĩ miyaa?” Yakoobo gi ilaki⁄isi tuba, “Hhaã ti yaꞌay sinaa qay ana yondimiisay googu ha Iliitleemu hari cabuuma dosi.”
6 Da hheꞌesi, tongetee da cada da tigay haa yaꞌay koina gwaagi iliisatiri ciyoomooge, haa gi keebeeꞌemidiri pandaa dosii hari muree. 7 Kara Leyaa haa yaꞌay kosi yaagii satiri ciyoomooge, gi keebeeꞌemidiri pandaa dosii hari muree. Hiifaakoo da gonge, yaagi khayri Yoseefu haa Raheeli, inay see gi keebeeꞌemidiri pandaa dosii hari muree.
8 Da hheꞌesi, Esaaw gi maasi Yakoobo tuba, “Maꞌaana doogu na mala saani giyaadisidi raqoo hhanki sliimaa gu kuꞌunaanay, mangu slaslaayri haa ana amooge?” Yakoobo gi ilaki⁄isi tuba, “Ma slay ila⁄imba pandaa dooguu, looimoo goy.”
9 Esaaw gi kaay tuba, “Hhia goy ana see ha kooma khooslay wa⁄a hari khisla, khooslaykee ga konte ti koogu, karahhasaku sa ugu.”
10 Yakoobo gi ilaki⁄isi tuba, “Teesaaqay gooba hhia goy. Hhooa, bere ana haã slay hhoinay gu didiru pandaa dooguu, ⁄imbi idotee sugwaani qay daa dabaiĩ koi dahha. Maꞌaana arimaa da pandaa doogu, ti arimaa da pandaa da Iliitleemu pahha, maꞌaana haniĩ kwahhasuusidi ana hari qasaw. 11 Hhooa ooy idotee gaani leehhisi sa ugu, sa gimba Iliitleemu siniĩ laqami hhoinay gu didiru hari amoo da slawaraa kuꞌunaanay wa⁄a haa idadu wa⁄a ga slae.” Yakoobo gi ilakoomi tlaatlaqamisu Esaaw, ina gi ⁄imbi, gi ooy idadu hhakee. 12 Da hheꞌesi Esaaw gi kaay sa Yakoobo tuba, “Poo ilakone haa hhiyuuma doori, kara ana ha giyaada pandaage sa ugu.”
13 Teesaaqay see, Yakoobo gi kaay sa ina tuba, “Looimoo goy, ugu khuꞌuda tuba, daaqay hhanki guti digidakwi, kara ana kwanda ga meete sa khuꞌuduũ gu bee⁄u haa yakway gu ruꞌumisee deelu. Inkoo, bere digi guusi hari ⁄uuru, gimati letu leẽ kilesi, kuꞌunaanay goõ kaka⁄iyay. 14 Inkoo, looimoo goy, haraa giyaadi pandaa da tongimoo googuu, ana gwaa sirakooma aslaaꞌamee, idoo doó ilii khociye gooay kuꞌunaanay haa daa ilii khociye ha daaqay, hati amoolaa dawu daqa looimoo gooii taysi Seyiirige.”
15 Da hheꞌesi, Esaaw gi kaay sa Yakoobo tuba, “Inkoo, ana sugu maw hhawatee wakinay, ma meetiri sliimaa haa ugu.” Yakoobo gi ilaki⁄isi tuba, “Looimoo goy, ha soꞌoy teesaaqay laqada? Maꞌaana ana haã slay hhoinay gu didiru pandaa dooguu looimoo gooii.”
16 Inkoo, nama balotee leẽ, Esaaw gi ki⁄i Seyiirige. 17 Teesaaqay see, Yakoobo yaa hada kayiiba Seyiirige, ina gi ilakoomi hari hhiyuuma dosi, gi day Sukootige, daqa giyaa iliitleehhi tongoo sa ina, kara gi tleehhi mara gosi haa qwamu sa kuꞌunaanay gosi. Hatee na idoo, daqatee sagaranaaꞌay uma na Sukooti.a
18 Qariqaaqari Yakoobo gi waaudi Sukootigo, gi ilakoomi hari hhiyuuma dosi hhapee da Kanaani naqatloo. Gi tluhhusi kambii gosi qaymooge ilaciyaa haa yaamu gu Sekeemu. Taataa Iliitleemu gwaagi ki⁄isi qasaw hhapee dosii, yadaa hhiyuuma dosaa Padaani-Araamugo. 19 Da hheꞌesi ina gi kirigi qaymootee daqa yaꞌay gu Hamoorigo, taataa gu Sekeemu, hari kunduru⁄umay miyaa leẽ gu feesa, teꞌesii ginaa ilii tleehhi kambii gosi. 20 Yakoobo teꞌesii gi tleehhi masabaahu da tle⁄eẽ, da ilii hadimisu sadaaka, girigi ay uma na Eli Elohe Israeeli.b