Yakoobo hingigi ilakhuukhuꞌusi sa slaslaw haa Esaaw
32
1 Labaani giyaa ilii hheꞌesi waaudimoo, Yakoobo see, gi ilakoomi haa hhiyuuma dosi, malayika da Iliitleemu hingigi slaslayri haa ina amooge. 2 Qatlay Yakoobo giyaa ilii arimi malayikatee, gi kaay tuba, “Gu lou, hiĩ ti kambii gu Iliitleemu.” Sa gimbakee, daqatee girigi ay uma na Mahanayiimu.a3 Yakoobo giyaa ilii teꞌesii wane, gi ya⁄abi ya⁄abimiisee, ma haraa giyaadiri pandaage daqa nankooinay Esaaw, yade Seyiirige hhapee da Edoomuge. 4 Gigi ilakaay inay tuba, “Taqay gani ilii kaawa kayday sa looimoo goy Esaaw ubee, ‘Yakoobo tongimoo googu yaani kaay tuba, ana haa ibiidi yaamulooay gooba pahha haa Labaani qatlayki naqatloo. 5 Inkoo, ha kooma karamu, daqwaai, bee⁄u haa aaraa, tongee gu hhawatee haa tongee da tigay. Looimoo goy, ana haani ya⁄abi ya⁄aboti, ma slay hhoinay gu didiru pandaa dooguu.’ ”
6 Ya⁄abimiisetee giyaa ilii ki⁄iri daqa Yakooboge, gi kaayri tuba, “Handaani daqa nankoogunay Esaaw, inkoo ina yaa khoci sa slaslaw haa ugu sliimaa haa hhawatee miyaa cigahha.” 7 Yakoobo giyaa ilii akhasi gimbakee, gi tlaꞌamuudi hari khisla. Ina gi deehhimi hida gwaa sliimaa waaree haa ina raqoo cada. Slime gi deehhimi bee⁄u haa aaraa, yakway haa gamiyaa raqoo cada. 8 Ina yaa ilahudeedemisi tuba, “Bere Esaaw haa hida kosi yoo iliitlaiyay raqa leẽ, raqa da cadii yoo hiidahhasida ba⁄aruu.”
9 Da hheꞌesi Yakoobo gi firimi tuba, “Ye Iliitleemu gu kookoo goy Aburahaamu, Iliitleemu gu taataa goy Isaaka, ye Taataa Iliitleemu, ugu sinaa kaadi tuba, ‘Ki⁄e hhapee dooguu haa daqa hiidayuuma dooguu, kara ana ha yondiida hhoinay sa ugu.’ 10 Gu lou, ana haraayii boo⁄iiba coko⁄o seei, slaꞌamuu hhakee haa hhoinaykee sliimaa gu didiru, gaã laqanti sa ana tongimoo googu. Qatlay gaa ilii tlo⁄osi duuduki gu Yoridaani, haa hhadaa kilesi kooma dabaiĩ koii. Yuꞌudiyaa! inkoo, haã kambabuu hhakee cada tleehhidi. 11 Taataa Iliitleemu, ana ha firiirima ambee, hhooa hani ilabuꞌunte, hani ilabuꞌunte daqa dabaiĩ gu nankooraa Esaawgo, maꞌaana ana haã tlaꞌamuudi, ina yaa ba⁄atii khay, sa iliitlaꞌa ana haa nagi gaasi, slime tigay koi haa yaꞌay koina. 12 Sa gimba, ugu haa kaadi sa ana tuba, gu lou, sinimaa yondita gimba gu hhou, kara laqwaloo doy see hagay tlakhweesida seehhinaykaꞌa pahha gu tlawa da didiri, kara digimaay dahhasiyaaba faadoo.”
13 Yakoobo gi meeti teꞌesii amasi hhakee. Da hheꞌesi gii leehhi idadu gu qawaraa sa Esaaw nankooina, daqa kuꞌunaanaykeesaa sliimaago giyaa kone. 14 Ina gii leehhi aaraa gu tigay miyaa cada, gweretatee mibeeri cada, bee⁄u gu tigay miyaa cada, gondadee mibeeri cada, 15 kara gii leehhi gamiyaa gu tigay mibeeri tami haa yaꞌay koina, yakway gu tigay mibeeri cigahha haa aweeri mibi, daqwaai gu tigay mibeeri cada haa daqumaiĩ mibi. 16 Kuꞌunaanaykee gugi taatahhi dabaiĩ gu tongee dosii, gigi deehhimi raqoo wa⁄a. Ina gi kaay sa tongee dosi tuba, “Inkoo, taa⁄amida haraa giyaada pandaa dooii, maw mucaiĩ tla⁄a gu raqa haa raqa.”
17 Da hheꞌesi gi ilakaay tongimoo gosi, hikee guraa giyaadu raqa da pandaa tuba, “Qatlay hhia goy Esaaw hingoo ilii slaslaye haa ugu, angamalee dugoo maasi ugu tuba, ‘Ugu tongimoo gu miyaa? Ha kaakaakayda? Kara kuꞌunaanayki ga gusaasite gu miyaa?’ 18 Teꞌesii, ugu looti kaada ubee, ‘Hiĩ ti khooslay gu tongimoo googu Yakoobo, dugwanti qay sa looimoo gosi Esaaw. Kara Yakoobo, ina loi yaa khoci alunkotaa.’ ”
19 Slime gi ilakaay gimbakee sa tongimoo gu cada, gu tami sliimaa haa hhakee goõ gwaa guusee raqoo hhakee tuba, “Unkuray kwanda goo gimbusidee nama gimbaki leẽ sa Esaaw, qatlay unkuray hangoo ilii slaslaydee haa ina. 20 Kara unkuray dangoo hhanti afahhana kaawa tuba, ‘Gu lou, tongimoo googu Yakoobo yaa khoci alunkotaa.’ ” Maꞌaana Yakoobo, yaa ilahudeesi tuba, “Angamalee ha caaquudisa slahhaaꞌamee dosi, hari amoo da giyaadisaraa pandaa dooii, kuꞌunaanayki suguũ qay. Qatlay hagoo ilii arime ina, angamalee hinoo kwahhasuusi hhoinay.” 21 Da hheꞌesi, kuꞌunaanaykee Yakoobo giyaa qay sa nankooina, gi giyaadi pandaa dosii, qatlaykee ina gi meeti amasi hhakee teꞌesii kambiige.
Yakoobo li⁄isoo dosi Penieelige
22 Hari amasi hhakee Yakoobo gi leeleehhisi ciraai tigay kosi cada, tongee dosi cada da tigay haa yaꞌay kosi mibi haa leẽ, ma tlo⁄osiri duudu gu Yabooki hari daqa daabasli ilasegaruũ. 23 Giyaa ilii hheꞌesi tlo⁄osaa haa hida kosi goõ kenga gu duuduge, kara gi looysi idadu kosi sliimaa giyaa kone kenga gu duudukeesii. 24 Yakoobo gi meeti teꞌesii ina lenkosi, hari amasi heedi waku yaagi khay, hingigi kabaaba⁄iri hari li⁄isoo haa ina tumpaatumpu naqatloo.
25 Qatlay heedikee giyaa ilii arimi tuba guba kaba⁄araa Yakoobo, gi sluhhusi faratla⁄aã da Yakoobo, teesaaqay faratla⁄aã da Yakoobo gii miriꞌisidi qatlay giyaa ilii li⁄ii⁄imisiye haa heedikee. 26 Da hheꞌesi heedikee gi kaay sa Yakoobo tuba, “Hani mayde ana na waaudi, maꞌaana diĩ pisi.” Yakoobo gugi ilaki⁄isi tuba, “Hagu geemawaaba ma waauti, bere haguba ⁄aafa ana.” 27 Heedikee gugi maasi ina tuba, “Uma googu na miyaa?” Ina gi ilaki⁄isi tuba, “Uma goy na Yakoobo.” 28 Heedikee gi kaay sa Yakoobo tuba, “Uma googu dugu eteediyaaba kara na Yakoobo, inkoo uma googu na Israeeli,b sa gimba ugu haã qwaatlidiri haa Iliitleemu haa hida, ugu haã kaba⁄adi.” 29 Da hheꞌesi Yakoobo gugi maasi heedikee tuba, “Hhooa sinikaade uma googu.” Heedikee gi ilaki⁄isi tuba, “Hani soꞌoy maamisida uma goy?” Da hheꞌesi heedikee gi ⁄aafi Yakoobo teꞌesii. 30 Teesaaqay Yakoobo girigi ay uma daqatee na Penieeli,c gi kaay tuba, “Hangii ariirini haa Iliitleemu pandaa haa pandaa, kara haã baraslay ambee, ana haani ba⁄ami.”
31 Qatlay Yakoobo giyaa ilii cati hari Penieeli, letu yaati asu biifiꞌisidi, kara ina yaati kekepiipina sa gimba uuriya dosi yaay miriꞌisidi. 32 Teesaaqay hida gu Israeeli, yoó ⁄aginaaiiba dambu daa ilagaasi haa faratla⁄aã, sa gimba ilagaasiya da faratla⁄aã da Yakoobo, dagaay miriꞌisi ilagaasiya da dambukeesii.