Yakoobo dawaraa dosi Padaani-Araamuge
29
1 Da hheꞌesi Yakoobo gi ilakoomi hari hhiyuuma dosi, gi day hhapee da hida gwaa ibiidee ilacindoo gu rawaage. 2 Qatlay giyaa ilii day hhapeteesii, gi arimi wa⁄amu raqamaauuge, kenga gu wa⁄amukeesii yaa wanay raqoo tami gu bee⁄u haa aaraa gwaa tlahhawee, maꞌaana hida yoó wa⁄amukeesii wayay bee⁄u haa aaraa koina. Kara wa⁄amukee dugwaati ilakhupisi hari tlaa⁄a da didiri. 3 Qatlay raqoo goõ giyoó ilii kurunkuridiye teꞌesii, deꞌemiisee gi gwangwaraaiyay sliimaa tlaa⁄atee da didiri afa gu wa⁄amukeesaa haa gi wayay bee⁄u gooina. Bere hiĩ hheꞌesiri waw, gi kara gii ki⁄isiyay tlaa⁄atee, ma ilakhupisiri wa⁄amukee.4 Da hheꞌesi Yakoobo gii sati coomoo gu deꞌemiiseteesii, gigi maasi tuba, “Ye hhiee koi, unkuray haa kaadahhaday?” Gugi ilaki⁄isiri tuba, “Dandiray haa yaamu gu Kharaani dahhana.” 5 Ina gigi kara maasi tuba, “Heedi waku na Labaani okookoo gu Nakhoori hagu khuꞌudaaii?” Inay gugi ilaki⁄isiri tuba, “Ee hagu khuana.” 6 Yakoobo gigi kara maasi tuba, “Ina saayuudiyaa?” Inay gugi ilaki⁄isiri tuba, “Ina saayuudi, kara yuꞌudiyaa, hotosi Raheeli natee yaa khocida haa bee⁄u gosi!” 7 Yakoobo gi kaay sa deꞌemiisetee tuba, “Yuꞌudaa, dati kahhi tleemaa, ti qoomay gu tleedu, qatlay gu watlisoo naqatloo kuꞌunaanay ayage. Inkoo, waw bee⁄u, goo hheꞌesidee lugu ki⁄isiday deꞌenge.”
8 Teꞌesii, inay gi ilaki⁄isiri tuba, “Hayii dahhasanaaba teesaaqay laqaraa, hati gesaa baqadana deꞌemiisee goõ yaagii kurunkuridiyay hari raqoo koina gu bee⁄u. Teesaaqay dandiray gonkotaa hoo asu hiidahhasana gwangwaraaꞌa tlaa⁄a afa gu wa⁄amugo, teꞌesii hoo asu waana bee⁄u goori.”
9 Qatlay Yakoobo giyaa ilii kahhiye cocoꞌomooge haa deꞌemiisetee, Raheeli yaagi khaydi sliimaa haa raqa da bee⁄u gu taataa gosi, sa gimba ina naa deꞌeeꞌenta kuꞌunaanay gu taataa gosi. 10 Yakoobo giyaa ilii arimi Raheeli sagameeriya da Labaani, nankuu iyoo dosi, haa raqa da bee⁄u gu taataa gosi Labaani, ina gii sati coomoo gu wa⁄amukeesii, gi gwangwaraai tlaa⁄atee afa gu wa⁄amugo haa gi tosaa way bee⁄ukee gu Labaani maamay gosi.
11 Da hheꞌesi Yakoobo gi cehheemisi Raheeli hari humbaꞌada, gi tlaatleesi ⁄aa⁄imu hari afoo da didiri, sa hhaꞌaloo giyaa kone. 12 Teꞌesii, Yakoobo gi ilakeesi sa Raheeli tuba, ina yaa kwaꞌamaadu gu taataa gosi, kara ina yaa nanku Rebeeka hhioo da Labaani. Raheeli gi akhasidi teesaaqay, cirakiray gi tu⁄uti ayage, gi kaadi gimbaki sa taataa gosi.
13 Qatlay Labaani giyaa ilii akhasi gimba gu Yakoobo, nanku hhioo dosi, ina gi tu⁄udi, gugi amoo dabaawakay. Giyaa ilii day, gugi khambacimi, tay gu tosaa humbaꞌadi, da hheꞌesi guraagi watli aya gosii. Yakoobo gi ilakeesi sa Labaani, gimbaki sliimaa. 14 Da hheꞌesi Labaani gi kaay sa ina tuba, “Gu lou, ugu ti faraa doy haa ceedee doy loi.”
Yakoobo gi khabiibimi sagameeru gu Labaani
Qariqaaqari Yakoobo giyaa ilii ibiidi haa Labaani qoomay gu slehheẽ leẽ, 15 da hheꞌesi Labaani gi kaay sa Yakoobo tuba, “Ugu haraay boo⁄odiiba yondu sa ana bueemaa see hhaka, sa gimba dandiray ti hiidayuuma. Sini kaade bueemaa gu yondu googu malee qonay.”
16 Inkoo, Labaani yaa kona sagameeru cada, sagameeriya da didiri uma gosi naa Leyaa, kara sagameeriya da coko⁄i uma gosi naa Raheeli. 17 Leyaa, ilaa kosi gwaa hhoi, teesaaqay see Raheeli slaqwa dosi daa hhoi, kara kalay gosi gwaa hhou hari khisla. 18 Yakoobo, yaa slai Raheeli hari khisla, inkoo, gi kaay sa Labaani tuba, “Ana sugu yondiida koraraa fanqu, bere hani ila⁄imbida, ma khabimi Raheeli, sagameeriya doogu da coko⁄i.”
19 Teꞌesii Labaani gi ilaki⁄isi sa Yakoobo tuba, “Haã ⁄imbi! Ti ba⁄ay hadisaraa Raheeli sa ugu, ti naraꞌaaba hadisaraa ina sa hhawata waku. Inkoo, ugu ibiidi tiꞌii haa ana.” 20 Da hheꞌesi Yakoobo, gi yondiidi sa Labaani koraraa fanqu, ma khabimi Raheeli. Teesaaqay see, koraraa hhakee daqa dosii giyaati arimi ubee, ti balalu angaamaka kilesi, sa gimba ina yaa slai hari khisla Raheeli.
21 Hiifaakoo da qatlaykii, Yakoobo gi kaay sa Labaani tuba, “Inkoo, sini hadiside hadee doy ma cubuquni, sa gimba balalu gu yondu goy sa ugu hiĩ buꞌudiri.”
22 Da hheꞌesi, Labaani gi kakaami sa hida goõ gu tongotee, gi ⁄isimi losona gu khaboo da hotosi. 23 Qatlay daa ilii day khwayaiĩ, Labaani hari cirihhimaa yaagi leehhisi Leyaa hotosi da didiri, giraagi khay daqa Yakooboge. Yakoobo, gi tosaa cubuqumi haa Leyaa, tay gi ilatahhi ina beelaa ti Raheeli. 24 (Kara Labaani gi taatahhi Siliipa tongitoꞌoo dosi, ma tongitoꞌoo da Leyaa tleehhiti.)
25 Qatlay daa iliipisi hari heetlawaa, Yakoobo gi baraslay tuba, kaslenkwaa suguũ Leyaa hadisi! Sa gimbakee, Yakoobo gi maasi Labaani tuba, “Ti gimba mala hiĩ gaã yonditi daqa dooii? Ana haati yondiidiibaslii daqa dooguu, ma slay Raheeli? Inkoo ugu haniĩ soꞌoy gii coridi ana?” 26 Labaani gi ilaki⁄isi sa ina tuba, “Tiꞌii hhapee doorii, ti qocay gooriiba dandiray gu hadisaraa sagameeriya da coko⁄i dagama khabi, bere sagameeriya da didiri kahhi khaboo. 27 Faakisii gesaa balalu fanqu gu mengoo haa sagameeriya doy da didiri, doo hheꞌesiye sugoo hadisana slime haã da coko⁄i sa ugu, hari yondu ga yondite sa ana kara koraraa wakinay fanqu.”
28 Yakoobo gi ⁄imbi gimbakee, gi buꞌudisi balalu hhakee fanqu gu mengoo haa Leyaa. Da hheꞌesi Labaani gi hadisi sagameeriya dosi Raheeli, sa Yakoobo, ma hadee dosi tleehhiti. 29 (Kara gi taatahhi Bilihhaa tongitoꞌoo dosi, ma tongitoꞌoo da Raheeli tleehhiti.) 30 Slime Yakoobo gi cubuqumi haa Raheeli, gu lou, ina gi slai Raheeli hari khisla Leyaa see ba⁄ada. Yakoobo gi kara yondiidi sa Labaani koraraa wakinay fanqu.
Yaꞌay gu Yakoobo
31 Qatlay Taataa Iliitleemu giyaa ilii arimi tuba, Leyaa daga slaiyaaba ha Yakoobo, gigi iliiay maay loaydi, teesaaqay see Raheeli yaa mogombiisoꞌoo. 32 Teesaaqay, Leyaa gii loaydi, gii daadi nanku hhawata, gurigi aydi uma na Rubeeni,a kakanta tuba, “Taataa Iliitleemu hiĩ arimi labaꞌasu goy. Gu lou, inkoo hhawata goy hinoo slai.”
33 Kara Leyaa gii loaydi, gii daadi nanku hhawata, gurigi aydi uma na Simi⁄ooni,b gi kaadi tuba, “Taataa Iliitleemu sinaani hadisi ina slime naki gu hhawata, sa gimba Iliitleemu hiĩ akhasi tuba, ana dini slaiyaaba.” 34 Leyaa gi kara hiiloaydi, gii daadi nanku hhawata, gurigi aydi uma na Laawi,c gi kaadi tuba, “Inkoo, goo ilatahhe qatlaykii hhawata goy hingoo ilagaasi haa ana, sa gimba suguũ laqwali yaꞌay tami gu hhawatee.” 35 Leyaa gi kara hiiloaydi, gii daadi nanku hhawata, gurigi aydi uma na Yuuda,d gi kaadi tuba, “Qatlaykii ha daareesa Taataa Iliitleemu.” Da hheꞌesi Leyaa gi maydi laqwaloo yaꞌay.