28
1 Da hheꞌesi Isaaka gi eteedi Yakoobo, gugi ⁄aafi ina haa gugi ilakaay tuba, “Hhanti khabinta hadee daqa sagameeru gu hida hhankaa gu Kanaanigo. 2 Inkoo, waaudi ciraai, taa⁄a yade Padaani-Araamuge, aya gu Betueelige kookoo googu, taataa gu iyoo doogu. La khabinta hadee taysi, tla⁄aã gu sagameeru gu maamay googuu Labaani. 3 Iliitleemu gu kooma ⁄uuru goõ ⁄aafiye ugu, ma laqwalidi yaꞌay wa⁄a, faadoo da laqwaloo doogu hiitlakhwayde hari khisla, kara ugu maa kookoo gu kabiraa da hida wa⁄a tleehhita. 4 Slime Iliitleemu ⁄aafiye ugu sliimaa haa laqwaloo doogu, hari ⁄aafatira giyaa ⁄aafi Aburahaamu, unkuray may oodiri hhapeti ga ilii ibimaamite inkoo yaamulooay gooba pahha. Maꞌaana Iliitleemu hhapeti giyaa hheꞌesi giyaa hadisi sa Aburahaamu.” 5 Isaaka gi leeleehhisi Yakoobo, da hheꞌesi Yakoobo gi waaudi yade Padaani-Araamuge, daqa Labaanige nanku Betueeli, Araamimoo. Labaani yaa hhia gu Rebeeka, iyoo da Yakoobo haa Esaaw.Esaaw khaboo dosi hotu Isumaeeli
6 Inkoo, Esaaw gi baraslay tuba, Isaaka taataa gosi hiĩ ⁄aafi Yakoobo haa guũ ya⁄abi Padaani-Araamuge, ma khaboo kay hadee yade, gugi ilakaay tuba, “Hhanti khabinta hadee daqa sagameeru gu hida gu Kanaanigo.” 7 Kara yaa akhasi tuba, Yakoobo hiĩ muriidi gimba gu iyoo dosi haa taataa gosi, hiĩ waaudi Padaani-Araamuge. 8 Esaaw gi baraslay, idoo taataa gosi Isaaka gi ilii wakiye tigay gu Kanaani. 9 Da hheꞌesi, Esaaw gi hada kay aya gu Isumaeelige nanku Aburahaamu, gi khabimi Mahalaata hotu Isumaeeli, hhioo da Nebayooti. Mahalaata gi hadee dosi tleehhiti, sliimaa haa tigay hhakira kosi cada giyaa kone.
Yakoobo tletiitiruu gosi Beteelige
10 Qatlay Yakoobo giyaa ilii looy teꞌesaa Beeri-Seebago, gi Kharaani khuꞌusi, 11 giyaa ilii day daqa wakay, gi gui teꞌesii sa gimba letu yaay huuꞌudi. Teꞌesii gii oy tlaa⁄u leẽ gugi tlakwai saga gosii, gi tosaa gui teꞌesii. 12 Amasi hhakee ina gi tletiitimi tletaa. Tletaa hhakeesii yaa arimi kitariidaamoo duguũ sihhi hhapeego, cina dosi hiĩ daadi raw naqatloo. Kara yuꞌudiyaa, gi arimi malayika da Iliitleemu hiidadayay haa hii⁄eemidiyay kitariidaamokeesii.
13 Yuꞌudiyaa! Taataa Iliitleemu ina loi hiĩ qadidi kenga gu kitariidaamokeesii, gi kaay tuba, “Ana na Taataa Iliitleemu, Iliitleemu gu taataa googu Aburahaamu haa Isaaka. Hhapetee gaã ilii qati, sugu hadisa ugu haa laqwaloo doogu. 14 Laqwaloo doogu maa wa⁄a seehhinay pahha, kara unkuray maayii qontay bareemoo sliimaa, ilacindoo gu biraago ilacindoo gu rawaa naqatloo, gooraago waayee naqatloo. Kara hida sliimaa khoorooge digimaa ⁄aafi hari daqa doogu haa laqwaloo doogu. 15 Yuꞌudiyaa, ana sliimaa waara haa ugu balalu sliimaa, hagu ga⁄aw bareemoo sliimaa ga kayde, kara ana hagumaa ki⁄isa tiꞌii hhapetii. Gu lou, ana hagu mawaaba ugu. Ana ha yondiida gimbakira sliimaa gaay fadidi sa ugu.”
16 Da hheꞌesi Yakoobo yaagii leehhi guꞌudeego, gi ilahuudeesi tuba, “Gu lou, Taataa Iliitleemu wana daqatii, kara ana haã caahhiiba gimbaki.” 17 Ina yaa tlaꞌamuudi hari khisla, gi kaay tuba, “Daqati datii tlaꞌamuudisa hari khisla! Gu lou, tiꞌii na daqa mara gu Iliitleemu gi iliiwane, kara tiꞌii na kaꞌafu daa afiiooyimi gu raw!”
18 Heetlaalee dosii Yakoobo gii tlay hari tumpaatumpu, gii oy tlaa⁄ukira giyaa tlakwai saga gosii, gigi qadidisi unguruiya pahha haa gigi tlintiꞌisi hari ilii tuutuqa du⁄iya rawaa kosii. 19 Daqatee girigi ay uma na Beteeli,a uma gu yaamu hhakee wakaꞌalee naa Luusu.
20 Da hheꞌesi Yakoobo gi seelimi, gi kaay tuba, “Bere yee Iliitleemu, hoo sliimaa wanta haa ana haa nigi ga⁄ayda hhiyuuma dooii, sinigi qayda ⁄agoo haa qayroo. 21 Kara, haagi ki⁄a hari qasaw aya gu taataa gooii, teꞌesii, ugu Taataa Iliitleemu, hoo asu Iliitleemu goy tleehhita. 22 Kara tlaa⁄uki gaã qadidisi, tlaa⁄u daa tlintiꞌisi pahha, namaa mara gu Iliitleemu, kara gu lou, ana sugu hadisa ugu leẽ da mibi daqa idadu sliimaago sinimaa hadiside.”