Yakoobo hiiowaraa ⁄aafa da Esaaw hari coraraa
27
1 Qatlay Isaaka giyaa ilii gaduudi, kara ilaa kosi yaa ilahhaniri, letu waka gi eteedi Esaaw nankosi gu didiru, sugugi kaay tuba, “Nankoy!” Ina gi iidi tuba, “Ee taataa ana tiꞌii waara!” 2 Taataa gosi gi kaay tuba, “Yuꞌudiyaa nankoy, inkoo ana haã gaduudi, kara baloo da gwaaꞌaraa doy see haga hhidima. 3 Inkoo, oyii khasima googu, ga⁄aree haa murita, taa⁄a kweerage, la sinaa slagata makimoo gu kweera, laraa khayda slagaadu sa ana. 4 Goo ki⁄ide taysaa, la sinii qaasida ⁄agoo da cuua hataꞌa ga slae, lagaa leehhisida daqa dooi ma ⁄agimi, ana magu ⁄aafi ugu qatlay ga ilii kahhe gwaaꞌaraa.”5 Kaslenkwaa, qatlay Isaaka giyaa ilii giimaamisiye haa Esaaw nankosi, Rebeeka yaa wanta, yaa itatiitimisida gimbakee. Esaaw giyaa ilii waaudi kweerage, sa slagaaduu gu makay gu kweera magiraa khay ayage, 6 Rebeeka gi kaadi sa nankosi Yakoobo tuba, “Itatiisi, ana haã akhasi taataa googu kakaana sa Esaaw nankooguna tuba, 7 ‘sinaa slagate fuꞌumay gu makimoo gu kweera, kara goo ki⁄ide sinii qaaside ⁄agotaꞌa daa cuuꞌudi, ma ⁄agimi, magu ⁄aafi pandaa da Taataa Iliitleemuge, qatlay ga ilii kahhe gwaaꞌaraa.’ 8 Inkoo nankoy, itatiisi gimba goy, lugu yondita naraꞌa, idoo sugu ilii kaawe gooay. 9 Taa⁄a daqa raqa da aaraage, siniraa khayde dakhweedoo cada hhakaꞌa gu hhoi, mayii qaasi ⁄agoo daa cuuꞌudi da slaiye taataa googu. 10 Goo hheꞌese, la leehhisida sa taataa googu ma ⁄agimi, magu ⁄aafi ugu qatlay gi ilii kahhiye gwaaꞌaraa.”
11 Yakoobo gi kaay sa Rebeeka iyoo dosi tuba, “Yuꞌudiyaa! Esaaw hhia goy kona quubu slaqwa sliimaa, ana koomaaba. 12 Inkoo, yoo malee, bere taataa goy hinoo slaapaꞌasi, gi baraslay ana koomaaba quubu? Yoo baraslay ana hagutii coraarida ina, kara haraagi khaw ilawaasa daqa dooii ana lenkoy, hagi dakusa slawaraa da ⁄aafaratee.” 13 Teꞌesii iyoo dosi sugugi ilaki⁄isidi tuba, “Nankoy, ilawaasa doogu daqa dooii hiidakusi huuꞌude, ugu yondiidi kilesi, idoo sugu ilii kakaakame, taa⁄a sinaay oode dakhweedokee ciraai.”
14 Da hheꞌesi Yakoobo gi waaudi, yaagii oy dakhweedokee cada, giraagi khay sa iyoo dosi. Iyoo dosi gii qaasidi ⁄agoo daa cuuꞌudi, idoo giyaa ilii slaiye gooay taataa gosi. 15 Da hheꞌesi Rebeeka yaagii oodi qayroo gu hhoi gu Esaaw nankosi gu didiru, giyaa konte ayage, gi daamisidi sa Yakoobo nankosi gu coko⁄u. 16 Slime gi ilacuudi dabaiĩ kosi haa isa dosi hari faloo gu dakhweedokira gu cada. 17 Da hheꞌesi ina gi hadisidi sa Yakoobo nankosi ⁄agotira da cuua haa mukaatee giyaa boo⁄imisidi.
18 Yakoobo gi hada kay daqa taataa gosii, gi kaay tuba, “Ye taataa.” Taataa gosi yaagi iidi tuba, “Yee nankoy, ugu na miyaa?” 19 Yakoobo gi kaay sa taataa gosi tuba, “Ana na Esaaw badiisu googu, haani yondiidi idoo siniĩ ilii kaadi gooay. Inkoo, tlayii, ⁄agimi fuꞌumay gu makimoo gu kweera, gaani slagaadi hari dabaiĩ koi, mani ⁄aafida.” 20 Teꞌesii Isaaka gugi maasi nankosi tuba, “Nankoy, haani malee cira slaydi slagaadu taqay?” Ina gi ilaki⁄isi tuba, “Sa gimba, Taataa Iliitleemu, Iliitleemu googu naani iliiay ana.”
21 Da hheꞌesi Isaaka gi kaay sa Yakoobo tuba, “Nankoy, sataayuu coomoo gooii, magu slaapaaꞌasi, ma caahhi bere gu lou ugu ti nankoy Esaaw angamalee na inaaba.” 22 Yakoobo yaagii sati coomoo gu taataa gosii Isaaka, ina gugi slaapaaꞌasi gi kaay tuba, “Afoo dati Yakoobo, teesaaqay see, dabaiĩ guti Esaaw.” 23 Isaaka gwaa caahhiiba naraꞌa, sa gimba Yakoobo dabaiĩ kosi yaa konay quubu ubee gu nankooina Esaaw, teꞌesii, Isaaka aloo slai ⁄aafa Yakoobo. 24 Ina gugi kara maasi tuba, “Gu louu, ugu ti nankoy loi Esaaw?” Yakoobo gugi ilaki⁄isi tuba, “Gu lou, ana na Esaaw.”
25 Da hheꞌesi Isaaka gi kaay tuba, “Nankoy, sinaa leehhiside slagaadukee koku, sa ana ma ⁄agimi, magu ⁄aafi.” Yakoobo gii satisi sa taataa gosi ⁄agotee, gigi ⁄agimi, kara sugwaagii oy difaay, Isaaka gi kitahhi difaaytee. 26 Da hheꞌesi Isaaka gi kaay sa Yakoobo tuba, “Nankoy, sataayuu coomoo gooii, mani humbaꞌati ana.”
27 Teꞌesii, Yakoobo gii sati coomoo gu taataa gosii, gugi tosaa humbaꞌadi. Qatlay Isaaka giyaa ilii cuuꞌudi tafu gu qayroo gu nankosi, gugi ⁄aafi gi kaay tuba,
“Gu lou, tafu gu nankoy ti cuui,
ti tafu gu qaymotaꞌa pahha daa ⁄aafi ha Taataa Iliitleemu!
28 Iliitleemu sugu hadisiye rau yadaa rawgo,
hindaqaruumaa sliimaa da hhapee dii looi,
hacimaa gu baruũ haa difaay da ⁄abi.
29 Hida gu hhapapu ti tongee doogu tleehhidiyay,
kara kabiraa sliimaa keebeeꞌemidiyay pandaa dooguu.
Ugu na looimoo gu hhiee koku,
laqwaloo da iyoo doogu, slime keebeeꞌemidiyay pandaa dooguu.
Hhakee gumaa ilawaasee ugu, digi ilawaasi,
hhakee gumaa ⁄aafee ugu, digi ⁄aafiye.”
Esaaw firiirina ⁄aafaraa
30 Isaaka giyaa ilii hheꞌesi ⁄aafaraa Yakoobo, Yakoobo gi may taataa gosi, gi waaudi. Yakoobo gimati asu waaudi, cirakiray Esaaw nankooina gu didiru, yaagi khay slagaadugo. 31 Esaaw see, gii qaasi ⁄agoo daa cuuꞌudi, giyaagi leehhisi daqa taataa gosii, gi kaay tuba, “Ye taataa, tlayii, ⁄agimi slagaadu gu nankoogu, mani ⁄aafidi.”
32 Isaaka gugi maasi tuba, “Ugu na miyaa?” Ina gi ilaki⁄isi tuba, “Ana ti nankoogu, badiisu googu gu pandaa, Esaaw!” 33 Teꞌesii Isaaka harigii tlai, gi tlaatleesi dakhadakhamoo hari khisla, gi maasi tuba, “Inkoo hikira hiĩ miyaa, gwaani slagaadu, sinaagi leehhisi slagaadukee sa ana? Ugu saani kahhade khawaraa, ana haã ⁄agimi ⁄agotee giyaani kone, hagugi ⁄aafi ina. Gu lou, ina duguũ ⁄aafi!”
34 Qatlay Esaaw giyaa ilii akhasi gimbaki gu taataa gosi, na paã ⁄aa⁄imu! Hari afoo da didiri haa da slahhaaꞌamee, gi kaay sa taataa gosi tuba, “Ye taataa, hani ⁄aafide ana see hhooa loi!” 35 Isaaka gi ilaki⁄isi tuba, “Nankooguna yaani khay hari qeeraa, gii oy ⁄aafa doogu.” 36 Esaaw gi kaay tuba, “Hatee na idoo sugunoó eteedina na Yakoobo!a Hiningii coridi waa cada, yaay oy haaki doy da badiisuꞌuumaa, kara inkoo hingii oy gimati ⁄aafa doy see!” Da hheꞌesi gi maasi taataa gosi tuba, “Taataa, haã meesidiibaslii ⁄aafa lensee sa ana?”
37 Isaaka gi ilaki⁄isi sa Esaaw tuba, “Yuꞌudiyaa, Yakoobo haguũ qadidisi ina na looimoo googu, slime suguũ taatahhi hhiee kosi goõ ambee, tongee dosi tleehhidiyee, kara haguũ ⁄aafi hari baruũ haa difaay. Ugu nankoy, inkoo hati malee laqa?” 38 Esaaw gi ilakoomi firoo sa taataa gosii tuba, “Taataa goy, ti ⁄aafatira leẽ kilesi gani kontaa? Ye taataa hani ⁄aafide ana see hhooa loi!” Da hheꞌesi Esaaw gi kara ⁄aa⁄i hari afoo da didiri.
39 Isaaka taataa gosi gi ilaki⁄isi tuba,
“Gu lou, daqeemoo koku gu ilii ibinaa,
maa segenge wanay haa hhapee dii looi,
kara maa segeẽ haa rau gu raw.
40 Ugu harimaa pangaa ibita,
slime ugu haa laqwaloo doogu, maa tongee da hhia googu gu coko⁄u haa laqwaloo dosi.
Qatlaykeesii ugu gamaa ba⁄aa⁄ate tongaiimaa,
ugu hamaa kwahhada tongaiimatee daqa doogwaa.”
Yakoobo lakida dosi daqa Labaanige
41 Esaaw gi ilakoomi wakaraa Yakoobo hari khisla, sa gimba gu ⁄aafatira, taataa gosi giyaa hadisi sa nankooina. Esaaw gi ilakhuukhuꞌusi gaasaraa da Yakoobo, gi kaay tuba, “Inkoo, baloo da gwaaꞌaraa da taataa goy yaani daadaauusidi, gaiidimoo gu taataa goy giyootii catiye kilesi, teꞌesii hagunimaa ilii gaasa hhia goy Yakoobo.”
42 Qatlay Rebeeka sagaa ilii kaay gimbakee gu nankosi gu didiru Esaaw, cirakiray ina gi ya⁄abidi heedi, gi eteti Yakoobo nankosi gu coko⁄u sugugi kaadi tuba, “Yuꞌudiyaa! Nankooguna gu didiru, Esaaw kona slahhaaꞌamee wa⁄a, hingi tlaatlaqaaqamisi hari taariru, gaasaraa ugu ma bui ⁄imbu. 43 Inkoo, nankoy yondiidi, idoo sugu ilii kaawe gooay ambee, lakidi tiaa ciraai, taa⁄a daqa nankoorii Labaani yade Kharaanige. 44 Ibiidi taysi haa ina qoomay coko⁄o, qatlaykaꞌa naqatloo slahhaaꞌamee da nankooguna gimaa ilii slarakhade, 45 kara ina dugumaa ilii afahhane, ugu idoo gaa yonditi daqa dosii. Ana hamaa ya⁄aba heedi taysi, dugumaa ay ugu, dugurimaa ki⁄i tay ayage. Inkoo, taa⁄a waaudi ciraai, ana slaꞌaaba mangu hhamisi unkuray cada kokunaa baloo lenge.”
46 Da hheꞌesi, Rebeeka gi kaadi sa Isaaka tuba, “Gu lou, ana dinaa ba⁄aa⁄aadisi hari khisla ha ibinaa da tigay hhanki gu Esaaw gu kabiraa da Wahiiti. Yakoobo see, bere maa khabina leẽ tla⁄aã gu sagameeru hhankii gu Hiiti goó ibiidee hhapetii, ana harimaay boo⁄aaba ibidinaa ti ba⁄ay da gwaꞌaraa!”