Isaaka slime gi kaay tuba hadee dosi ti hotooina
26
1 Inkoo, qori gu didiru yaagii ca⁄i hhapeteesii da Beeri-Lakhay-Rooige daa ilii ibiidi Isaaka. Qoriki gwaa dihhi ba⁄ay da hikira gwaay ca⁄u qatlaykira gu Aburahaamu. Da hheꞌesi Isaaka gi looy sa qorikee hhapee da Geraarige daqa Abimeleekige mutemi gu Wafiliisiti. 2 Isaaka giyaa ilii kahhiye waaudimoo, Taataa Iliitleemu yaagi ilii khay ina, gi kaay tuba, “Hhantii ⁄eta biraage yade hhapee da Misirige, ibiidi hhapee sugoo laqamege, ma ibiti teꞌesii. 3 Ibiidi hhapetii yaamulooay gooba pahha, ana ha sliimaa waara haa ugu teꞌesii, kara hagu ⁄aafa ugu, hari hadisaraa hhapeti sa ugu haa sa laqwaloo doogu. Teesaaqay hagani ilii gaasa, seelirukira gaayii fadidi sa taataa googu Aburahaamu. 4 Gu lou, ana laqwaloo doogu see hagamaayii tlakhweesa hari khisla ubee, tica⁄eerii pahha rawge, ana sigi hadisa hhapapu sliimaa sa inay, kara hari amoo da laqwaloo doogu hida sliimaa tiꞌii khoorotii digimaa ⁄aafi. 5 Ana ha yondiida gimbaki sliimaa, sa gimba Aburahaamu yaa muriidi ana, gi iliikoomi ilakaawa, ila⁄imbidu, hukumuu goy haa sariyaa doy.” 6 Da hheꞌesi, Isaaka gi waaudi yade Geraarige, gi tluhhusi hemaa dosi teꞌesii, gi ibiidi qoomay gu coko⁄u.7 Qatlay hhawatee gu daqatee giyaa ilii aniri Rebeeka, gi maasiri Isaaka gimba gu hadee dosi. Ina gi ilaki⁄isi tuba, “Haã ti hhioo doy,” sa gimba ina yaa tlaꞌamuudi kaawaraa tuba, “Haã ti hadee doy.” Maꞌaana ina yaa ilahudeesi tuba, “Hhawatee gu daqati na gaasiyay ana sa Rebeeka, inay magii oyri ina, sa gimba ina da hhoi hari khisla.”
8 Qariqaaqari Isaaka giyaa ilii ibiidi yade balalu wa⁄a, letu waka Abimeleeki, mutemi gu Wafiliisiti, gi arimi hari pooa, yuꞌudiyaa! Isaaka slaapaaꞌamisi hotooina Rebeeka, hhawata gooay idoó giyoo laqiye haa hadee dosi. 9 Teꞌesii, Abimeleeki gi eteedi Isaaka, gi kaay tuba, “Kaslenkwaa, hataꞌa ti hadee doogu! Ugu siniĩ soꞌoy hiicoridi, gi kaadi ubee, hataꞌa ti hhioo doy?” Isaaka gi ilaki⁄isi tuba, “Sa gimba haa tlaꞌamuudi ambee, ana dini ba⁄atii gaasi ha hida sa ina.”
10 Da hheꞌesi Abimeleeki gugi ilii maahhi tuba, “Sandii soꞌoy laqadi taqay! Bere hhawata leẽ tla⁄aã gu hida koii yaa aloo gui haa hadee doogu, ugu haã antiibaslii haraani aloo khayda dakoo daqa doorii?”
11 Sa gimbakee, Abimeleeki gi ilii⁄oo⁄i hida kosi goõ tuba, “Heedi gumaa koisa nangusa heediki baku hadee dosi, gu lou duguti gaasi.”
12 Korikee Isaaka gi doosli qaymoo hhapeteesii da Geraarige, gi buꞌumi baruũ wa⁄a hari khisla, sa gimba Taataa Iliitleemu yaa ⁄aafi ina hari khisla. 13 Isaaka gi hindaqaruudi, kara hindaqaruumaa dosi gi ilakonti hiitlakhwawa, gi hindaqaru tleehhidi hari khisla. 14 Ina yaa kona raqoo wa⁄a gu bee⁄u, yakway haa tongee wa⁄a mara gosii, Sa gimbakee, Wafiliisiti gi aniri qunceeraa sa hindaqaruumatee da Isaaka. 15 Da hheꞌesi, gi tipidiri hari tipa wa⁄eemaa hhakira sliimaa daa ⁄aagwi ha tongee da taataa gosi Aburahaamu, giyaa ilii slafiye.
16 Da hheꞌesi mutemi Abimeleeki gi kaay sa Isaaka tuba, “Waaudi tiaa hhapee dooraa, sa gimba ugu konta ⁄uuru hari khisla, kara handiigii catidi.” 17 Teꞌesaa Isaaka gi looy, gi tluhhusa kay kambii gosi hiihuuꞌuma gu Geraarige, gi ibiidi taysi. 18 Teꞌesii Isaaka gi khwantlimisi wa⁄eemaa hhakira daa ⁄aagwi, qatlay taataa gosi Aburahaamu giyaa ilii slafiye, maꞌaana wa⁄eemaa hhakee digaa tipidi ha Wafiliisiti qatlay Aburahaamu giyaa ilii hhami. Kara Isaaka wa⁄eemaa hhakee girigi aꞌay umaiĩ hhakira daraa aꞌay ha taataa gosi. 19 Letu waka, qatlay tongee da Isaaka giyaa ilii ⁄aagwaagwidiyee wa⁄eemaa hiihuuꞌumakeesii, teꞌesii gi baraslayri hhaahhiya daa gumagaaguuma maꞌay gu hhoi. 20 Teꞌesii deꞌemiisee da hhapee da Geraari yaa tlaatleesiri naanaqamoo haa deꞌemiisee da Isaaka, inay gi kaayri tuba, “Maꞌay hhanki ti koti!” Isaaka wa⁄amukee girigi ay uma na Eseeki,a sa gimba inay yaa naanaqiri haa ina.
21 Da hheꞌesi tongee da Isaaka gi ⁄aagwiri wa⁄amu waku, teꞌesii, hida gu teꞌesa gi kara naanaqiri sa wa⁄amukee. Sa naanaqamokee, Isaaka wa⁄amukee gurigi ay uma na Sitinaa.b 22 Da hheꞌesi, teꞌesaa Isaaka gi kara looy daqa wakay, gi ⁄aagwi kara wa⁄amu waku. Teꞌesii wanaaba heedi gwaa kara naanaqu haa ina sa wa⁄amukee. Isaaka wa⁄amukee gurigi ay uma na Rehhobooti,c gi kaay tuba, “Inkoo Taataa Iliitleemu sandii qay daqa dii tlaakhwi, kara dandiray laqwaloo doori hiitlakhwayda hhapetii.”
23 Qariqaaqari Isaaka haa hida kosi, gi looy teꞌesaa, gi day Beeri-Seebage. 24 Hari amasi hhakee, Taataa Iliitleemu yaagi ilii khay Isaaka, gi kaay tuba, “Ana na Iliitleemu gu taataa googu Aburahaamu. Hhanti tlaꞌamuta, sa gimba ana sliimaa waara haa ugu. Hagu ilakooma ⁄aafa ugu, kara faadoo da laqwaloo doogu see hagamaayii tlakhweesa, sa gimba gu hiifadidu goy, gaayii fadidi sa Aburahaamu yondimiisay goy.” 25 Da hheꞌesi, yade Isaaka gi tleehhi masabaahu, teꞌesii gi hhaꞌaleesi Taataa Iliitleemu. Gi tluhhusi hemaa dosi daqateꞌesii, kara tongee dosi gi ⁄aagwiri wa⁄amu teꞌesii.
Isaaka haa Abimeleeki ilagaasa dooina
26 Qatlay Isaaka giyaa ilii kambimi Beri-Sibi⁄aage, qariqaaqari mutemi Abimeleeki yaagi khay daqa dosii yadaa Geraarigo sliimaa haa Ahusaaha daa gosi haa Fikooli sirikaarimoo gu didiru gu sirikaarii dosi. 27 Teꞌesii Isaaka gigi maasi inay tuba, “Inkoo, unkuray haani soꞌoy khaydiri daqa dooii? Kara unkuray hani wakiday ana, hanaagi gusintiri hhapee doogunaa.”
28 Inay gugi ilaki⁄isiri tuba, “Gu lou, dandiray haã arini pandataa tuba, Taataa Iliitleemu sliimaa wana haa ugu. Sa gimbakee dandiray haani ilahudeesani dandi bee, ba⁄ay hati seelina dandiray haa ugu, ma qaasani ila⁄imbidu tla⁄aã goorii. 29 Ila⁄imbidukee na nahiĩ, ugu hamaa yonditaaba gimba gu tlaku daqa doorii, idoo dandiray gooay, gaa ilii yondiidaniiba gimba gu tlaku daqa dooguu. Dandiray haati laqani muree daqa dooguu balalu sliimaa, hagwaati geemayni maa waauti hhapee dooraa hari qasaw. Kara inkoo ugu ti heedi daa ⁄aafi ha Taataa Iliitleemu hari khisla.” 30 Teꞌesii Isaaka gi ⁄isimi losona sa Abimeleeki haa deneꞌee kosi, gi ⁄aginiri haa gi kitahhaniri. 31 Heetlaalee dosii gonkoinaa gii tlayri hari tumpaatumpu, gi seeliniri inay haa inay sa laqaru gu hiifadidu tuba, maa naanaqiyaaiiba. Da hheꞌesi Isaaka gigi leeleehhisi, gigi aareesi, inay gi tooinaa waaudiri hari qasaw. 32 Baloteesii loi, tongee da Isaaka yaagi khayri, sugugi kaayri gimba gu wa⁄amukira giĩ ⁄agwinay kayri, gi kaayri tuba, “Haã slayni maꞌay wa⁄amukiray gaã ⁄agwaagwidane!”
33 Inkoo, Isaaka wa⁄amukee gurigi ay uma na Sibaa,d haa letuti naqatloo, hatee na idoo, uma gu yaamu hhakee na Beeri-seeba. e
Esaaw haa tigay kosi cada gu kabiraa da Hiiti
34 Qatlay Esaaw giyaa ilii kone koraraa mibeeri cigahha, gi khabimi Yudiiti hotu Beeri, Hiitimoo, da hheꞌesi gi kara khabimi Basemaati hotu Elooni, slime Hiitimoo, tigay hhakee cada koinaa gwaa kabiraa da Hiiti. 35 Gu lou, tigay hhakee gu Esaaw hiraagi khayri li⁄eemoo, daqa taataa gosii Isaaka haa iyoo dosi, Rebeeka.