Aburahaamu haa laqwaloo dosi waka
25
1 Qariqaaqari Aburahaamu yaa kara khabimi hadee waka, uma gosi naa Ketuura. 2 Ina yaa laqwalidi yaꞌay lahhoꞌo gu hhawatee sa Aburahaamu, umaiĩ koina naa Simuraani, Yokisaani, Medaani, Midiyaani, Isibaaki haa Suwaa. 3 Yokisaani yaa taataa gu Seeba haa Dedaani. Laqwaloo da Dedaani naa hida gu Asuuri, Letuusi haa Leuumi. 4 Midiyaani see yaa kona yaꞌay gu hhawatee, umaiĩ koina naa Eefa, Efeeri, Khanooki, Abidaa haa Elidaa. Hida hhanki gonkoinaa yaa laqwaloo da Ketuura.5 Aburahaamu gi hadisi aalimee gosi goõ sa nankosi Isaaka. 6 Qatlay Aburahaamu giyaa ilii kahhiye hhamaraa, gi qaqay khooslay waku sa yaꞌay kosi wakinay gu hhawatee, giyaa kone haa tigay kosi gu afayi. Da hheꞌesi gigi looysi inay, ma ibinaa kayri hhapee wakay daraa bara da ilacindoo gu rawaa waara, ma ibiidiri segeẽ haa segeẽ haa nankosi Isaaka.
Aburahaamu gwaaꞌaraa dosi
7 Aburahaamu yaa ibiidi koraraa miyaa leẽ haa mibeeri fanqu haa kooani. 8 Da hheꞌesi Aburahaamu gi hhami, hingigi ilagaasi sliimaa haa hida kosi gwaa giyaadee kaka⁄u. Qatlay giyaa ilii hhami, yaa gaduudi tuku, yaa gaduwaa guy loou, gu kooma koraraa wa⁄a hari khisla. 9 Isaaka haa Isumaeeli gi tooinaa qaasiri taataa gooina Aburahaamu maraiyatiray tosii yade Makipeelage, ilaciyaa gu Mamureege. Maraiyatee yaa qaymoteesii wanta, daa dabaiĩ gu Efuroonige waara, nanku Sohhaari Hiitimoo. 10 Qaymotee daa kirigi ha Aburahaamu daqa hida gu Hiitiigo. Aburahaamu dugwaa teꞌesii qaasi, daqateesii daa ilii qaasi hadee dosi Saara.
11 Qatlay gimbakee giyaa ilii faaki, Iliitleemu gi ⁄aafi Isaaka nankosi Aburahaamu. Qatlaykee Isaaka yaa ibiidi ilaciyaa haa wa⁄amu gu Beeri-Lakhay-Rooi.
Isumaeeli haa laqwaloo dosi
12 Hiĩ na catimisu gu laqwaloo da Isumaeeli. Ina yaa nanku Aburahaamu haa Hagarii, Misiritoꞌoo, tongitoꞌoo da Saara. 13 Hhaã na faadoo da yaꞌay gu Isumaeeli, idoo digaa ilii laqwali gooay. Badiisu naa Nebayooti, gwaa sirakoomee umaiĩ koina naa Kedaari, Adibeeli, Mibisaamu, 14 Misimaa, Duuma, Maasa, 15 Hadaadi, Teema, Yetuuri, Nafiisi haa Kedeema. 16 Hhakee na yaꞌay mibi haa cada gu Isumaeeli, inay naa giyaadimiisee gwaa tlaatleesee tongagu koina. 17 Isumaeeli yaa ibiidi koraraa miyaa leẽ mibeeri tami haa fanqu, gi hhami, hingigi ilagaasi sliimaa haa hida kosi gwaa giyaadee kaka⁄u. 18 Laqwaloo da Isumaeeli yaa tleehhiri tongagu haa yaamu koina, hhapee da Hafiilagoa Suuri naqatloo, hari bara da ilacindoo gu rawaa gu hhapee da Misiri, yade khuꞌusa hhapee da Asuuru. Laqwaloo da Isumaeeli hingaa ilagaasiriiba haa laqwaloo waka da Aburahaamu.
Esaaw haa Yakoobo hiidadaw gooina
19 Hiĩ na catimisu gu laqwaloo da Isaaka nanku Aburahaamu. Aburahaamu gi laqwali Isaaka. 20 Qatlay Isaaka giyaa ilii kone koraraa mibeeri cigahha, gi khabimi Rebeeka sagameeriya da Betueeli gu kabiraa da Arameyaani gu hhapee da Padaani-Araamu.b Kara Rebeeka yaa hhioo da Labaani Arameyaani.
21 Isaaka gi firimi daqa Taataa Iliitleemuge sa hadee dosi Rebeeka, ma slaydi yaꞌay sa gimba yaa mogombiisoꞌoo. Taataa Iliitleemu gi ila⁄imbi firoo dosi, da hheꞌesi Rebeeka gii loaydi, 22 kaslenkwaa hubaykee yaa irangiya. Inkoo, yaꞌay hhakee cada hingigi kabaaba⁄iri waꞌay gu guraꞌa gu Rebeekage. Teꞌesii ina gi anti slahhaaꞌamee, gi maasidi Taataa Iliitleemu, gi kaadi tuba, “Bere gimbaki ti taqaaqay, ibinaa faydaa mala konta daqa dooii?” 23 Taataa Iliitleemu gi kaay sa Rebeeka tuba,
“Hhapapu cadac wanay waꞌay gu guraꞌa googii,
kara kabiraa cada da hida hingaa deehhiihhinay waꞌay koki
kabiraa leẽ maa konta ⁄uuru gu kaba⁄araa da cadii.
Giyaaday yondiidi sa aluuday.”
24 Qatlay balalu gu Rebeeka guyii dawaraa giyaa ilii buꞌudiri, yuꞌudiyaa, yaꞌay gu irangiya gu hhawatee yaa wanay guraꞌa gosii. 25 Naw gu pandaa gwaa giyaadu hiica⁄a, gwaa daa⁄adu, kara yaa kona quubu slaqwa sliimaa, sa gimbakee, inay gurigi ayri uma na Esaaw.d 26 Qatlay naw gu caduu dugwaa ilii day, ina yaa ooy gobina gu hhia gosi gwaa giyaadu, sa gimbakee, ina dugurigi ay uma gosi na Yakoobo.e Isaaka yaa kona koraraa mibeeri lahhoꞌo, qatlay hadee dosi Rebeeka giyaa ilii daadi irangiyatee.
Esaaw gi naadimi haaki da badiisuꞌuumaa dosi
27 Yaꞌay hhakee gu cada giyaa ilii dinaraarayri, Esaaw ina yaa kweerage slai ibinaa haa gi slagaaduusay gu hhou tleehhidi gu makay gu kweera. Kara, Yakoobo yaa heedi gwaa kaanahhasu, ina yaa ayage ibimaamidi hemamuu koinay. 28 Isaaka gi slai Esaaw hari khisla, sa gimba giyaa slaiye ⁄agoo fuꞌumay gu makay gu kweera, kara Rebeeka gi slaꞌadi Yakoobo hari khisla.
29 Letu waka, Yakoobo yaay qaasi ⁄agoo waka doó denguu oine, inkoo Esaaw yaagi khay slagaadugo yadaa kweerago, yaa qoriidi hari khisla. 30 Ina gi kaay sa Yakoobo tuba, “Ana gwaaꞌa sa qori, hhooa sini qayde ⁄agotee da daa⁄adi ma cira qumpaa⁄ami.” (Hatee na idoo slime suguraaꞌay uma gu caduu na Edoomu, maꞌaana dosi gu daa⁄adu).
31 Teꞌesii, Yakoobo gi ilaki⁄isi tuba, “Siniti gesaa naadinte letuti loi, haaki da badiisuꞌuumaa doogu.” 32 Esaaw gi kaay tuba, “Yuꞌudiyaa! Ana haã daadaauusi, slaꞌa gwaaꞌaraa, haaki doy da badiisuꞌuumaa hini mala iliiayda?” 33 Teꞌesii, Yakoobo gi kaay tuba, “Aare gesaa seelimi seeliru daqa dooii ubee, gu lou sini hadisida haaki doogu.” Teꞌesii, Esaaw gi seelimi seeliru daqa dosii haa gi naadimi haaki dosi da badiisuꞌuumaa dosi sa Yakoobo.
34 Da hheꞌesi Yakoobo gi hadisi sa Esaaw mukaatimoo haa ⁄agotee da denguu. Ina gi ⁄agimi, gi kitahhi, da hheꞌesi gii tlay, gi tosaa waaudi. Teesaaqay, Esaaw ginaa ilii qooqiidi haaki da badiisuꞌuumaa dosi.