Saara gwaaꞌaraa dosi
23
1 Koraraa gu Saara giyaa ibiti yaa koraraa miyaa leẽ haa mibeeri cada haa fanqu. 2 Da hheꞌesi gi hhanti tongoo da Kiriyaati-Ariibage (uma gu caduu gu tongotee naa Heburooni) hhapee da Kanaanige. Teꞌesii Aburahaamu gi ⁄aa⁄i haa gi gaiidi sa Saara.3 Da hheꞌesi, Aburahaamu gii tlay teꞌesaa daqa daa ilii wane tuuꞌuna da hadee dosi, gi cocoꞌomoo kay haa hida gu teꞌesa daa Wahiiti oiiꞌine, gi kaay sa inay tuba, 4 “Yeraa, ana ti khocimiisay pahha, kara ti yaamulooay gooba tiꞌii hhapee doogunay. Inkoo sini qaydeei daqa da kiriga, ma qaasi hadee dooi teꞌesii.” 5 Wahiiti gi ilaki⁄isiri sa Aburahaamu tuba, 6 “Taataa, itatiisi sugu kaawani. Ugu ti heedi gu didiru tiꞌii yaamu kotii. Leehhii aysaa gaã ugu anti da hhoi tla⁄aã gu aysasu hhankii kotii, ma qaasidi hadee doogu teꞌesii. Heedi lensee hhaku tiꞌii gu afii⁄ita ugu aysa dosi, ugu ma qaasidi hadee doogu teꞌesii.”
7 Aburahaamu giyaa ilii akhasi teesaaqay, gii tlay, gi keebeeꞌedi pandaa da Wahiitige looee da hhapetee, 8 gi kaay sa inay tuba, “Bere unkuray haã ⁄imbidiri, ana ma qaasi hadee dooi hhapee doogunay, inkoo itatiisa sangu kaay. Taa⁄amida nangu ya⁄abi daqa Efuroonige nanku Sohhaari, lugu tlaatlaqasa kaydi sa ana, 9 ma sini haysi, ma kirigi maraiya dosi yade Makipeelage, da kenga gu qaymoo dosii waara. Sugu kaadeei, ma sugu kirigi ana pandaa doogunay hari buꞌumaa gi slaiye, ma daqa dooi tleehhiti da iliiqamiduu gu hida koi.” 10 Efurooni Hiitimoo yaa teꞌesii wana, yaa ibiidi tla⁄aã gu hida kosii. Qatlay giyaa ilii akhasi teesaaqay, higi ilaki⁄isi sa Aburahaamu pandaa da Hiitii sliimaage gwaayii kurunkurideei teꞌesii tlahhayb gu tongoteesii tuba, 11 “Ye taataa goy, teesaaqay gooba. Inkoo, hani itatiiside, ma sugu kaay. Ana sugu hadisa qaymotee sliimaa haa maraiyatee da qaymoteesii waara. Letuti tiꞌii ugu sugu qaw pandaa da hida koii. Taa⁄a qaasi hadee doogu teꞌesii.”
12 Karaai Aburahaamu gi keebeeꞌedi pandaa da looee da hhapeteesii, 13 gi kaay sa Efurooni pandaa dooinay tuba, “Teesaaqay naraꞌa, inkoo hhooa na itatiiside sugu kaay. Ana hadisa buꞌumaa ga slaꞌade ugu sa qaymotee. Hhooa ⁄imbi hiiowaraa da buꞌumaa hhanki daqa dooaa, ana ma qaasi hadee dooi teꞌesii.” 14 Da hheꞌesi Efurooni gi ilaki⁄isi sa Aburahaamu tuba, 15 “Taataa goy, na itatiiside ana sugu kaay. Qaymotee kiriga dosi ti sekeeli miyaa cigahha kilesi da feesa.c Inkoo buꞌumaa hhakee idoo mala daqa doorii ugu haa ana? Taa⁄a qaasi hadee doogu teꞌesii.”
16 Aburahaamu gi ⁄imbi gimbakee goõ gu Efurooni, gi tosaa tlaatleesi ilakhuꞌudu gu hiiloaruũ gu buꞌumaa hhakira daa uumi ha Efurooni pandaa da Wahiiti hhakeesii, higi hadisi sa ina sekeeli miyaa cigahha da feesa. Hiiloaruũ kosi gigi ilakhui hari tle⁄eẽ gu hida gwaa kirigiigimee qatlaykee.
17 Aburahaamu yaa teesaaqay kirigi qaymoo da Efurooni yade Makipeelage, ilaciyaa gu Mamureege. Kirigatee yaa qaymoo sliimaa haa maraiya daa teꞌesii waara, haã khai see sliimaa gwaa waꞌay gu digimi gu qaymoteesii waaree. Gonkoinaa digi tooinaa haysi 18 sa Aburahaamu pandaa da Wahiiti gonge gwaayii kurunkurideei kaꞌafu gu tongoteesii, magii oy dabaiĩ kosii.
19 Qatlay daa ilii hheꞌesi kirigatee, Aburahaamu gi tosaa qaasi hadee dosi Saara maraiyateesii daa qaymoo dosii waara yade Makipeelage, ilaciyaa haa Mamuree, yaamu gu Heburoonige, hhapee da Kanaanige. 20 Teesaaqay Wahiiti gi hadisiri sa Aburahaamu qaymotee haã maraiyatee see daa teꞌesii waara, ma daqa dosi tleehhiti da iliiqamiduu gu hida kosi.