Taataa Iliitleemu ilatahharaa da Aburahaamu
22
1 Qariqaaqari gimbaki giyaa ilii cati, Iliitleemu gi ilatahhi iliipaꞌaruu gu Aburahaamu. Letu waka dugwaa eteedi ha Iliitleemu tuba, “Aburahaamu!” ina gi iidi tuba, “Yee, ana tiꞌii waara.” 2 Teꞌesii Iliitleemu gi kaay sa ina tuba, “Oyii nankoogu, nankoogu gu leẽ Isaaka goó slaꞌade hari khisla, la waauta haa ina, la hhapee da Mooriya kayday. Taysi khwaylimokee lugu haysa kayda, sadaaka da da⁄araa pahha sa ana yade rawaa gu oõ wakuuge, sugoo ana laqame.”3 Heetlaalee dosii daa ilii pisi, Aburahaamu gii tlay, gi tosaa ubaabisi tlokay daqa daqway gosii. Teꞌesaa gii oy yondimiisee dosi cada sliimaa haa Isaaka nankosi. Qatlay giyaa ilii hheꞌesi kaꞌamisuu gu magiiduu sa sadaakatee da da⁄araa, gi tosaa waaudi, gi yade khuꞌusi okiray daa uumi ha Iliitleemu.
4 Baloo da tamiige hhiyuumateesii Aburahaamu gi yuꞌudi, gi arimi okira segengo. 5 Teꞌesaa gi kaay sa yondimiisee dosi tuba, “Unkuray haraa ibiida tiꞌii sliimaa haa daqway. Ana haa nankoy, okira kakaakayna gaã antiri. Hada kakaakayna sa firiiriru gu Iliitleemu, goo hheꞌesane haa asu ki⁄ana daqa doogunay.”
6 Aburahaamu yaay oy magiidukee sa sadaakatee da da⁄araa, gi tosaa hiiqaasi kwaahha da nankosii Isaaka, ina gi tosaa hiioy aslaa haa catay. Qatlay giyaa ilii khociicinee cada koinaa, 7 Isaaka gi maasi taataa gosi Aburahaamu tuba, “Taataa! Yuꞌudiyaa, kona aslaa haa magiiduu, inkoo kaano ⁄ambeenimoo ga hadisa kayne sa sadaaka da da⁄araa?” 8 Aburahaamu gi ilaki⁄isi tuba, “Nankoy, ina Iliitleemu yoo hadisi ⁄ambeenimokee.” Teꞌesaa inay gi tooinaa khociri pandaage sliimaa.
9 Qatlay giyaa ilii dayri daqatiray daa ilii uumi ha Iliitleemu, Aburahaamu gi tleehhi teꞌesii masabaahu sa Iliitleemu, gii qamidi magiiduu rawaa kosii. Gi tosaa khiidiidimi dabaiĩ haa yeꞌeeroo gu nankosi Isaaka hari welaa, gugi tosaa qaatisi masabaahuteesii rawaa gu magiidukeesii. 10 Da hheꞌesi Aburahaamu gii taatahhi catay, gi tosaa hiiduukhi, ma isahiiquutli nankosi.
11 Ciyakiray lenge Malayika gu Taataa Iliitleemu, gwaagi eteedi hari afoo da didiri yadaa rawaa gu rawgo tuba, “Aburahaamu! Aburahaamu!” ina gi iidi tuba, “Yee, ana tiꞌii waara.” 12 Malayikakee gi kaay tuba, “Khwaylimokee, hagu hhanti ilaqaꞌada baku hagu hhanti idoo waka laqada. Gu lou, inkoo haã caahhi ambee, ugu Iliitleemu hagu gwaa⁄ada, sa gimba hanaa afii⁄itidiiba nankoogu gu leẽ.”
13 Aburahaamu gi waratlasi ilaa kosi, gi yuꞌudi, kaslenkwaa, bee⁄imoo yaa wana aluũ kosii, duguũ ooy khadameege ha elemu gu rukutimoo. Aburahaamu gi ay bee⁄imokee, gugi tosaa gaasi, gugi hadisi sadaaka sa da⁄araa sa Taataa Iliitleemu, nankosi gi tosaa ba⁄ami gwaaꞌaraago. 14 Da hheꞌesi Aburahaamu girigi ay uma daqatee na “Taataa Iliitleemu yoó hadisi.” Kara letuti naqatloo hida siginoó kakaanay taai, “Rawaa gu oõ gu Taataa Iliitleemuge ina sindoó hadimisi dandiray.”
15 Malayika gu Taataa Iliitleemu yaagi kara kaay sa Aburahaamu rawaa gu rawgo 16 tuba, “Taataa Iliitleemu hiĩ taqay kaay tuba, ‘Sa gimba gaã ⁄imbidi haysaraa nankoogu gu leẽ sa ana, gu lou, ana sugu seelima hari muuna gooi, 17 haguti ⁄aafa ugu, laqwaloo doogu hagamaatii tlakhweesa hari khisla, ubee tica⁄eerii pahha rawge, kara ubee, seehhinay pahha gu tlawa da didiri. Laqwaloo doogu himaayii ooda yaamu gu fa⁄ayaa dooina. 18 Kara hari amoo da laqwaloo doogu, hida sliimaa tiꞌii khoorotii digimaa ⁄aafi, sa gimba ugu naa muriti ana.’ ”
19 Da hheꞌesi Aburahaamu haa nankosi Isaaka gi tooinaa ki⁄iri daqatiray giyaa ilii mayri yondimiisetira. Teꞌesaa yaagi waaudiri sliimaa dooinaa Beeri-Seebage, gi dayri teꞌesii daqa giyaa ilii ibimaamidiye Aburahaamu.
Nakhoori haa laqwaloo dosi
20 Qariqaaqari gimbaki giyaa ilii cati, Aburahaamu yaa akhasi gimba waku tuba, Milikaa see yaa slaydi yaꞌay, yaa laqwalidi yaꞌay gweleti gu hhawatee sa nankooina Nakhoori. 21 Nankosi gu badiisu, uma gosi na Uusi, Buusi naa sirakoomi nankooina Uusi, yaꞌay wakinay umaiĩ koina na Kemueeli (hiĩ naa laqwali naw, uma gosi na Araamu), 22 Kheseedi, Khaaso, Pilidaasi, Yidilaafu haa Betueeli. 23 Betueeli see yaa laqwali hotu, uma gosi naa Rebeeka. Yaꞌay hhakee gu gweleti Milikaa yaa laqwalidi sa Nakhoori hhia gu Aburahaamu.
24 Nakhoori yaa kona hadee da afayi see, uma gosi naa Reumaa. Reumaa yaa konta yaꞌay cigahha gu hhawatee, umaiĩ koina naa Teeba, Gahaamu, Tahaasi haa Maakaa.