Isaaka hiidawaraa dosi
21
1 Da hheꞌesi, Taataa Iliitleemu gi ⁄aafi Saara qatlaykiraa gooay giyaa ilii kaay, gi teesaaqay laqi sa Saara gimbakira giyaa uumi. 2 Saara gii loaydi, gii daadi naw sa Aburahaamu qatlay gu gaduumaa dosii. Gimbaki yaay ca⁄i qatlaykiray loii Aburahaamu sugwaa ilii kaay ha Iliitleemu. 3 Aburahaamu gurigi ay uma gosi na Isaaka,a nakee kosi daayii day ha Saara. 4 Qatlay nankosi Isaaka giyaa ilii buꞌudisi balalu dagati, Aburahaamu gugi tosaa daba⁄i ina, idoo sugwaa ilii kaay gooay ha Iliitleemu. 5 Qatlay Isaaka dugwaa ilii laqwali, Aburahaamu taataa gosi yaa kona koraraa mibeeri mibi. 6 Saara gi kaadi tuba, “Inkoo Iliitleemu siniraani khay hhaꞌaloo haa qasaw, kara hhaã goõ, goo akhasee gimbaki, yoo hhaꞌaluumidiyay sliimaa haa ana. 7 Miyaa naa aloo kaay sa Aburahaamu tubaai, Saara maa slayda naw? Inkoo yuꞌudabere, ana suguũ laqwali naw qatlay gu gaduumaa dosii.”
Hagarii haa Isumaeeli gusiru gooina
8 Isaaka gi diiray, dugugi ilabaci, Aburahaamu gi ⁄isimi losona gu didiru letutee sa ina. 9 Teꞌesii Saara ginaa ilii anti Isumaeeli, nakira gu Hagarii Misiritoꞌoo, giyaa laqwalidi sa Aburahaamu, idoo giyaa ilii qasaasaye Isaaka, 10 gi tosaa kaadi sa Aburahaamu tuba, “Gusimaka segenge hadetee da tongitoꞌoo sliimaa haa nankosi, sa gimba nakee gu tongitoꞌotee, etaa himaa slayaaba aalimee, sliimaa haa nankoy Isaaka.”
11 Gimbaki, yaa slahhaaꞌasi Aburahaamu hari khisla, sa gimba Isumaeeli see yaa nankosi. 12 Teꞌesii, Iliitleemu gi kaay sa Aburahaamu tuba, “Dugu hhanti slahhaaꞌasi teesaaqay sa gimba gu nankoogu haa tongitoꞌoo doogu. Itatiisi idoo suguũ kaay ha Saara, sa gimba laqwaloo doogu dagari amoo da Isaaka faadi. 13 Kara laqwaloo da nakee gu tongitoꞌotee hagamaa hida gu didiri tleehhidisa, sa gimba ina see hiti nankoogu.”
14 Da hheꞌesi, heetlaalee dosii daa ilii pisi, Aburahaamu gii tlay, gii oy ⁄agoo haa fala daa boo⁄imisi sari hubinay gu maꞌay, gi tosii haysi sa Hagarii, gi tosaa ubaabisi sa ina. Da hheꞌesi, gigi aareesi Hagarii haa nankosi. Hagarii gi tosaa waauti, gi bahhangaruusidi, da tay khui, da tay khui yade hatli gu Beeri-Seebage. 15 Qatlay maꞌay hhakira giyaa ilii faakiri goõ, Hagarii gi maydi nankosi mahhatu gu khaimoo gu coko⁄uge. 16 Da hheꞌesi, gi tosaa surukudi coko⁄u, gi ibinaa kaydi daqa dayii wanqudimisuu gu yeꞌeeroo miyaa leẽ gooay, sa gimba yaa ilahudeesidi tuba, “Ha slaꞌaaba arimaa nankooi, idoo gi ilii gwaaiye.” Qatlay giyaa ilii ibiti teꞌesii ilaciyaage, gi tlaatleesidi ⁄aa⁄imuu hari slahhaaꞌamee.
17 Nakee kosi see yaa ⁄aa⁄ii⁄imina, Iliitleemu gwaagi akhasi. Teꞌesaa malayika gu Iliitleemu yaagi ⁄oo⁄i Hagarii yadaa rawaa gu rawgo, gi kaay sa ina tuba, “Hagarii, mala nigi ilahufimaamita? Hhanti tlaꞌamuta, Iliitleemu hiĩ akhasi ⁄aa⁄imuu gu khwaylimokee giĩ ilii qaati yaqay. 18 Tlayii, taa⁄a tlaysii khwaylimokee, lugu ooda dabage, sa gimba laqwaloo dosi hagamaa hida gu didiri tleehhidisa.” 19 Da hheꞌesi Iliitleemu gi iliiay Hagarii, ma anti wa⁄amu gu maꞌay. Gii satidi wa⁄amukeesii, gi tosii hacisidi fala dosi dari hubinay gu maꞌay, gi kitahhasidi nankosi maꞌay.
20 Da hheꞌesi Iliitleemu hugwaa ga⁄ay khwaylimokee direemoo dosii, gi ibiidi yade hatlige, gi slaqudiisay gu ga⁄aree tleehhidi. 21 Qatlaykee giyaa ilii ibimaamidiyee kongoqomee gu Paraanige, iyoo dosi gi khabinti hadee sa ina yadaa Misirigo.
Aburahaamu haa Abimeleeki Seeliru gooina Beri-Sibi⁄aage
22 Qatlaykee Abimeleeki haa sirikaarimoo gosi gu didiru gu sirikaarii dosi goõ, uma gosi na Fikooli, gi dayri daqa Aburahaamuge, sugu kaayri tuba, “Gu lou, haã caahhani dugwaa iliiay, kara dugwaa ⁄aafi ha Iliitleemu balalu sliimaa. 23 Inkoo sini seelinte tiꞌii pandaa da Iliitleemuge, ubeei, hanimaayii coridaaba ana, yaꞌay koi haã laqwaloo dooina see. Sini laqante hhoinay googu sa ana haã sa hida gu hhapeti see ga ilii ibimaamitee ugu yaamulooay gooba pahha, idoo sugwaa ilii laqami gooay hhoinay goy ugu.” 24 Aburahaamu gi ilaki⁄isi tuba, “Ha seelima teesaaqay.”
25 Aburahaamu gi tosaa tlaatleesi quru⁄umoo daqa Abimeleekige sa wa⁄amu waku daayii ⁄utli ha yondimiisee da Abimeleeki. 26 Teꞌesii Abimeleeki gi kaay tuba, “Ana khuaaba miyaa goosee niĩ teesaaqay laqi. Ugu sinaa kaadiiba, gimbaki nahiĩ ana hagu tiꞌii akhamisa letuti kilesi.” 27 Aburahaamu yaagi hadisi yakway, aaraa haa bee⁄u sa Abimeleeki. Da hheꞌesi hhawatee hhanki gu cada hingi tooinaa warii seeliiliniri. 28 Teꞌesaa Aburahaamu gi amaslimi ⁄ambeenay fanqu. 29 Da hheꞌesi Abimeleeki gi maasi Aburahaamu tuba, “⁄ambeenaykee gu fanqu suguũ soꞌoy amaslinti?” 30 Aburahaamu gi ilaki⁄isi tuba, “Gu lou, ana naa ⁄aagwi wa⁄amukee, ⁄imbi oowaraa ⁄ambeenayki gu fanqu dabaiĩ koaa, ma laqanti ila⁄imbidu googu sa gimbaki.” 31 Haa letuti naqatloo daqatee, uma gosi na Beeri-seeba,b sa gimba hhawatee hhakee gu cada yaa teꞌesii seeliniri.
32 Qatlay seelirukee kooina giyaa ilii faaki yade Beeri-Seebage, Abimeleeki haa Fikooli, sirikaarimoo gu didiru gu sirikaarii dosi, gi tooinaa ki⁄iri yaamkoinay hhapee da Wafiliisitige.