Aburahaamu haa Abimeleeki
20
1 Da hheꞌesi, Aburahaamu gi waaudi teꞌesaa, gi hatli gu Negeebu khuꞌusi, gi ibiidi tla⁄antla⁄a gu yaamu gu Kadeesi haa hatli gu Suuri. Qariqaaqari, gi ibiidi yaamu gu Geraarige yaamulooay gooba pahha. 2 Qatlay giyaa ilii teꞌesii wane, Aburahaamu ginaa ilii kaay sa hida hhakee tuba, Saara hiti hotooina. Da hheꞌesi Abimeleeki, mutemi gu Geraari, gi ya⁄abi hida kosi, sa Saara dagaramaa khay mara gosii, ma hadee dosi tleehhiti.3 Teꞌesii hari amasi wakinay, Iliitleemu yaagi ilii khay Abimeleeki tletaage, gi kaay sa ina tuba, “Itatiisi, ugu hanti barii gwaꞌati pahha, sa gimba gu hadetee gaayii oodi, ina ti hadee da heedi.” 4 Qatlaykee, Abimeleeki yaa kahhi guꞌudee haa Saara, daqatee saganaa kaay tuba, “Ye Taataa, gu louu, hati hhamisida hida guba dakoo? 5 Ina yaa kaayiibaslii daqa dooii tuba, ‘Haã hotoori?’ Kara ina see Saara yaa kaadiibaslii tuba, ‘Hiĩ nankoori?’ Ana hanti yondiidi naraꞌa gimbaki hari muuna gu hhou.” 6 Teꞌesii kahhi tletaage, Iliitleemu gi kara kaay sa ina tuba, “Gu lou, ana khua ugu haã yonditi gimbakee hari muuna gu hhou, daqatee hagwaa tlaatlahhasi ana, ma maydi tlakweesa pandaa dooii, saganaa slaꞌaaba maga nangusidi. 7 Inkoo ki⁄isi hadetee daqa hhawata gosii. Caahhi ina hiti tletimiisay gooi, kara yoo firina sa ugu, ma maydi gwaaꞌa. Bere haga ki⁄isidaaba, caahhi tuba, gu lou, ugu haa hida koku goõ hooti kaka⁄aday.”
8 Heetlaalee dosii daa ilii pisi Abimeleeki gii tlay, gi eteedimi yondimiisee dosi goõ. Sigaa ilii kaay gimba sliimaa gwaayii ca⁄u tletaa kosii, hida hhakee kosi goõ gi tlaꞌamuumuudiri hari khisla. 9 Da hheꞌesi, Abimeleeki gi eteedi Aburahaamu, sugugi kaay tuba, “Ugu handiiti malee laqadi? Ana mala ganaa dakusi, saraani khaydi tlakwaroo da didiri taqay daqa dooii haa hhapee dooii? Ugu haraani khaydi sa ana gimba gu tlaku daroóba ibinaa hida.” 10 Teꞌesii, Abimeleeki gi maasi Aburahaamu tuba, “Idoo doogu na mala saa teesaaqay laqadi?” 11 Aburahaamu gi ilaki⁄isi tuba, “Haa ilahudeesi ambeela, gu lou, gwaa⁄amee da Iliitleemu hhaka tiꞌii daqatii, dinoo gaasi sa gimba gu hadee dooi. 12 Gimati teesaaqay see, ina hiti hotoori, taataa goori leẽ, amu na paslaapasloo, qariqaaqari hagagi khabimi. 13 Kara qatlay dinaa ilii ya⁄abi ha Iliitleemu mara gu taataa gooaa, haa kaay sa hadee doy ambee, ‘Igi sini taqay laqante hhoinay googi ubee, “Hiĩ hiti nankoori,” bere hangoo slaslayna haa hida daqeemoo sliimaa ga kayne.’ ”
14 Da hheꞌesi, Abimeleeki gi haysi sa Aburahaamu yakway, aaraa, bee⁄u haa yondimiisee gu hhawatee haã da tigay see, kara gi tosaa ki⁄isi Saara daqa hhawata gosii, 15 gi kaay tuba, “Yuꞌudiyaa, hhapeti goõ ti tooi da pandaa doogu waara, leehhii daqa ga ugu slaꞌade ibiidi teꞌesii.” 16 Teꞌesaa Abimeleeki gi kaay sa Saara tuba, “Yuꞌudiyaa, ana haymaamisa sa nankooguna cahhamee elefu leẽ da feesa. Hhaã hiti bueemaa koki sa muretee digaa muriidisi, dama arimi ha hida hhanki gu waaree haa igi tuba, digiĩ ilatahhi, kontaaba dakoo lensee.”
17 Da hheꞌesi, Aburahaamu gi firimi pandaa da Iliitleemuge. Teꞌesii Iliitleemu gi hhoeesi Abimeleeki haa hadee dosi haã yondimiisee dosi see da tigay, ma slayri yaꞌay kara. 18 Gimbaki kwanda giyaay ca⁄iye, sa gimba Taataa Iliitleemu yaa khiidimi guraiĩ gu tigay sliimaa, gwaa ibimaamideei mara gu Abimeleekige, sa Saara hadee da Aburahaamu.