Hida gu Sodomaa tlakwaroo dooina
19
1 Da hheꞌesi, hari khwayaiĩ hhakee malayikatee da cada gu Iliitleemu yaagi khayri kaꞌafu gu tongoo da Sodomaage. Looti yaa teꞌesii wana, yaa ibiidi kaꞌafukeesii. Qatlay giyaa ilii arimi inay, gi qadidi, ma amoodabaay inay, gi keebeeꞌedi hhapeege pandaa dooinay, 2 gi kaay tuba, “Ayiĩ koi, kwahhasa aya gooii, ma guꞌudiri mara gu yondimiisay googunay. Kwahhasa, ma hhuncidiri yeꞌeeroo kokuna. Heetlaalee dati kahhi tumpaatumpu hoo toogunaa waautay.” Inay gi ilaki⁄isiri tuba, “Suti, dandiray tiꞌii guana khoorooge.” 3 Teꞌesaa, Looti giyaay tlahhasi hari khisla, asunkuilee inay ginaa ilii ⁄imbiri waaudimoo haa ina, gii guuma kayri mara gosii. Looti gi dabiidi ⁄agoo da hhoi, kara gi cira khwereꞌesi mukaatimoo gwaaba hamiira, gii qaasi sa inay, gi tooinaa ⁄aginiri.4 Qatlay giyaa ilii kahhiyee qata kawa, hhawatee goõ gu tongoo da Sodomaa, gonkoinaa qaraiya haã gaduũ see, yaagi ilii raagidiri mara gu Looti. 5 Higi ilii maahhiri Looti tuba, “Kaale wanay hhawatee hhakira gwaani khawee letuti hari khwayaiĩ tiꞌii mara googuu? Ca⁄asankii khoorooge, ma giri guani dandiray.”
6 Looti yaagii ca⁄i khoorooge, ma cocoi haa inay, aluũ kosaa gii pingisi afamaraa. 7 Higi kaay tuba, “Ye hida koi, hhooa. Maw laqa idotee da tlakwi. 8 Yuꞌudaa, ana kooma yaꞌay cada gu tigay da kahhiye nangusa ha hhawata lensee. Maw, ma sangwaayii ca⁄asi khoorooge, magi laqadiri idotee ga slaꞌadee laqa haa inay. Maw laqa idoo lensee da tlakwi hhawatee hhanki, sa gimba hhaã hiti dahaa koi, yaani mara gooii khayri.”
9 Inay gi ilaki⁄isiri tuba, “Tlintiꞌii suruki!” Gonkoinaa hingigi wariikaayri inay haa inay tuba, “Heediki yaati khay tiꞌii yaamu kotii yaamulooay gooba pahha. Inkoo yuꞌudiyaa, ina slai heedi gu hiifaakimisuu gu gimba goori tleehhidi.” Teꞌesii gi kaayri sa Looti tuba, “Hagu idoo waka laqana da tlakwi, ba⁄ay doo inay see.” Teꞌesii ginaa ilii tafisiri kengage Looti, gii satiri pandaage sa tlakweemisuu gu afamaraa.
10 Teꞌesii, malayikatira da cada ginaa ilii dafidiri Looti hari dabaiĩ koina waꞌay gu mara gosii, gii pingisiri afamaraa. 11 Da hheꞌesi, gi idoo waka laqiri daqa hhawatee hhakiray goõ gwaa afamarakeesii waaree gu marakeesii, gigi iliibo⁄eesiri gonkoinaa qaraiya haã gaduũ see, afamaraa see giyaa kara aniriiba.
Looti idoo dugwaa ilii ⁄iisi Sodomaago
12 Malayikatee da cada gi maasiri Looti tuba, “Ha kontaa hiidayuumoo waku tiꞌii tongotii, da yaꞌay koku gooay gu hhawatee haa gu tigay haã kumbaee see? Bere wanay, taa⁄a sigi kaade, ma waaudiri haa ugu, 13 sa gimba dandiray slaꞌana hhamisaraa yaamu hhanki sumuku. ⁄aa⁄imuu, guũ daw pandaa da Taataa Iliitleemuge sa hida gu tia, guti didiru hari khisla. Inkoo dandiray dandaani ya⁄abi, ma hhamisani yaamu hhanki.”
14 Da hheꞌesi, Looti gii ca⁄i khoorooge, gi kaawa kay sa kumbaee kosi gwaa slaee khaboo yaꞌay kosi gu tigay. Sigigi kaay tuba, “Slehheesaw, waauda tiaa yaamu hhankaa, sa gimba Taataa Iliitleemu slai hhamisaraa yaamu hhanki.” Teꞌesii inay beelaa, kumbaꞌakee koina ti yaqaayiiyina.
15 Qatlay daa ilii pisipisidi hari heetlawaa, malayikatee da Iliitleemu gii tlahhasiri hari khisla Looti, ma waaudi, gi kaayri tuba, “Slehheesii, waaudi haa hadee doogu haa yaꞌay koku cada gu tigay gu tiꞌii waaree, maleemalee dangoo hhamisi unkuray see, doo ilii hhamisiyee yaamu.”
16 Ina gii kaai, da hheꞌesi malayikatira gi ooyiri daba gosi haa dabaiĩ gu hadee dosi haã gu yaꞌay kosi see gu cada gu tigay, gi giyaadisiri, magii ca⁄asiri qasaw kenga gu tongoteesii. Hari amoti, Taataa Iliitleemu yaa arimi muree sa inay. 17 Gimati asu hiica⁄iri, malayika leẽ gi kaay tuba, “Slehheesaw, lakida, hangu ⁄iisideei tiaa, hhanti yuꞌutay alunge! Kara hhanti qaditay daqa lenge see hiihuuꞌumakeesii. Lakida omeerige, maleemalee dangu hhamisi.”
18 Looti gi ilaki⁄isi sa inay tuba, “Ye ayiĩ koi, hhooa! 19 Unkuray haã hida gu hhoi tleehhitiri daqa dooii, gu lou, siniĩ laqantiri hhoinay gu didiru hari amoo dari ⁄iisa ana. Inkoo hayii dahhasaaba lakidimoo omeerige, hhamisarati ni tiꞌii slayda kahha dawa see, ana hoo gwaaꞌa. 20 Yuꞌudaa, tongoo nahaã tiꞌii ciyoomooge da ilii lakida, kara dati asu coko⁄i. Hani geemaydeei, ma lakidi yaqay. Hanguubaslii arimaa, idoo da ilii coko⁄ii? Ana yade hoo ba⁄ama.”
21 Da hheꞌesi, malayikakee gi kaay ta, “Naraꞌa, sugu kara laqama hhoinay sa gimbakee, tongotee gaã unti haga hhamisaaba. 22 Inkoo slehheesii, lakidi cira taysi, sa gimba idoo lensee hhaka ga laqe, ugu hooti geesaa daada yaqay!” Teꞌesaa qatlaykeesaa tongotee dagarigi ay uma na Soaari.a
Sodomaa haa Gomoora hhamisaraa dooina
23 Qatlay Looti giyaa ilii dayri tongoo da Soaarige, letu yaati asu biifiꞌisidi. 24 Teꞌesaa, Taataa Iliitleemu ginaa ilii slakhi rawaa gu rawgo aslaa da dihhi yaamu gu Sodomaage haa Gomoorage, 25 gi hhamisi sumuku tongagu hhakee haa yaamu hhakee goõ. Hida goõ yaati ci⁄iri. Hhaka idoo daa meti, slufimoo lensee yaa meetiiba. 26 Hadee da Looti daa sirakomaamida ina alungo, gi yuꞌuti alunge tongotira da Sodomaage, gi ⁄anta da cakhasaa pahha tleehhiti.
27 Letutee daa ilii pisi, Aburahaamu gii tlay, gi ki⁄i daqatiray giyaa ilii qadidi pandaa da Taataa Iliitleemuge. 28 Qatlay giyaa ilii yuꞌudi biraage, bara da Sodomaage haa Gomoorage, bara da yaamu hhakee goõ gwaa hiihuuꞌumakeesii waara, gi arimi eehha guyii loou, hinti cindorooisi hhapeteesaa ubee eehhakaꞌa pahha soó da⁄iye cata.
29 Teesaaqay Iliitleemu yaay slay firoo da Aburahaamu, qatlay giyaa ilii hhamisi tongagu hhakee gwaa hiihuuꞌumakeesii waaree, gi ⁄iisi Looti hhamisaraago, hhamisarateesaa da tongagu hhakee daa ilii ibimaamidiye Looti.
Hida gu Moaabu haa Amooni hiica⁄amuu gooina
30 Qariqaaqari, Looti haa yaꞌay hhakee kosi gu cada gu tigay, yaa looyiri teꞌesaa Soaarigo, sa gimba Looti yaa tlaꞌamudi ibinaa teꞌesii, gi waaudiri omeerige, yade gi ibinaa kayri maraiyage. 31 Letu waka, hotosi da badiisu gi kaadi sa hotooina tuba, “Taataa goori hiĩ gaduudi, kara tiꞌii daqatii hhawata lensee hhaku gu gua haa dandiray, idoo doó ilii lalaqiye gooay hida khoorotii. 32 Inkoo khoca, ma ooniidisani taataa goori, ma guani haa ina, ma slayni yaꞌay haa ina, ma hiitlakhweesani laqwaloo da afamaraa goori.”
33 Hari amasi hhakee gi ooniidisiri taataa gooina. Hotosi da badiisu gi hada kaydi daqa giyaa ilii qaati, gi guꞌudi haa ina. Looti yaa ooniidi hari khisla, caahha see guba, idoo daa laqi ha hotosi da badiisu.
34 Heetlaalee dosii hotosi da badiisu gi kaadi sa hotooina tuba, “Amasi gu sa⁄alee ana haã gui haa taataa goy. Inkoo khoca, magu kara ooniidisani hari amasi. Qatlaykii igi loo guꞌudee kayda haa ina, ma hiitlakhweesani laqwaloo da afamaraa goori hari amoo da taataa goori.” 35 Hari amasi hhakee kara gi ooniidisiri taataa gooina. Qatlaykee hotosi da coko⁄i gi guꞌudi haa ina. Looti kara yaa ooniidi hari khisla, caahha see guba, idoo daa laqi ha hotosi da coko⁄i.
36 Taqaaqay, yaꞌay hhakee gu tigay gu Looti ginaa ilii loaaꞌayri sa taataa gooina. 37 Hotosi da badiisu gii daadi naw, girigi aydi uma gosi na Moaabu. Letuti naqatloo hida gu Moaabub na laqwaloo dosi. 38 Hotosi da coko⁄i see gii daadi naw, girigi aydi uma gosi na Ben-Ami.c Letuti naqatloo hida gu Amooni na laqwaloo dosi.