Aburahaamu ilii khawaraa dosi ha yaamulooee gooba tami
18
1 Taataa Iliitleemu yaagi ilii khay kara Aburahaamu. Qatlaykee Aburahaamu yaa ibiidi ilaciyaa haa khai hhakira gu deni gu mialooni gu Mamuree.Letu waka, hari qatlay gu tleemaa da dihhi, Aburahaamu yaa ibiidi afamaraa gu hemaa dosii, 2 gi arimi, kaslenkwaa, hhawatee tami hiĩ qadimidiri pandaa dosii. Qatlay giyaa ilii arimi inay, gii tlay ciraai teꞌesaa afamarakeesaa gu hemaa dosaa, gii slehheesi sa amoodabaawa inay, giyaa ilii day ilaciyaa koinay, gi tosaa keebeeꞌedi hhapeege pandaa dooinay.
3 Teꞌesaa gi kaay tuba, “Taataa goy, hhooa bere haã slay hhoinay gu didiru pandaa dooguu, hhanti hiicatiday mara gu yondimiisay googuna. 4 Kwahhasaneei, layii fiifisiday mahhatu gu khaimokii, maw ma sangwaayii oy maꞌay coko⁄u, ma hhuncidiri yeꞌeeroo kokuna. 5 Kara maw ma sangwaayii oy ⁄agoo see coko⁄u, ma ⁄agintiri, ma slaydiri ⁄uuru gurii gaasaraa hhiyuuma dooguna. Inkoo, ibiida tiꞌii mara gu yondimiisay googunay.” Inay gi ilaki⁄isiri tuba, “Naraꞌa, yondiidi idoo gaã ilii kaadi gooay.”
6 Teꞌesii Aburahaamu gii slehheesi, gii day ciraai hemaage, gi kaay sa Saara hadee dosi tuba, “Slehheesii, ilakhue kiyaaray leẽ gu didiru gu gubaraa gu niqimee, la da⁄aa⁄anta mukaatee.” 7 Da hheꞌesi, Aburahaamu gi taa⁄adi daqa daa ilii wane kuꞌunaanay gosi, yaagii leehhi damaa da hhoi daa wahhati, gigi tosaa haysi sa yondimiisay gosi waku. Yondimiisekee gigi cira isahiiquutli, gi tosaa daqami, higii slehheesi hiiqamiduu gu fuꞌumay hhakee. 8 Kara da hheꞌesi Aburahaamu yaagi tosaa hiioy du⁄iya da ⁄aba⁄abakwi, ilibaa haa fuꞌumay gu damatira, gi tosaa hiisatisi sa inay, gi ⁄aginiri. Qatlay giyaa ilii ⁄agiigineei, Aburahaamu gi tosaa qadidi ilaciyaa gooinay mahhatuuge teꞌesii khai hhakeesii.
9 Qatlay giyaa ilii hheꞌesiri ⁄agoo, gi maasiri Aburahaamu tuba, “Saara hadee doogu kaale wanta?” Ina gi ilaki⁄isi sa inay tuba, “Yade wanta, waꞌay gu hemaage.”
10 Da hheꞌesi, leẽ tla⁄aã gu yaamulooee hhakeesaa gooba gi kaay tuba, “Itatiisi sugu kaay, kwarakhaalee nama qatlaykii gooay, ana hamaa kara khaw daqa dooguu. Gu lou, qatlaykee Saara hadee doogu maa konta naw!” Inkoo Saara yaa aluũ koinay wanta afamaraa gu hemaage, tosaa akhamisida. 11 Gonkoinaa Aburahaamu haa Saara yaa gadumidiri tuku, yaa konay koraraa wa⁄a hari khisla loi. Kara Saara yaay gaasidi koraraa gu slawaraa yaꞌay.
12 Qatlay Saara giyaa ilii akhasidi dahakee, idoo giyaa ilii kaay, gi qasaydi muuna gosii, giyaa ilii ilahudeesidi tuba, “Gu louu, ana hayii dahhasaa slawaraa da daa⁄u gaduumatii toii? Kara hhawata goy see yaa gaduudi tuku!”
13 Teꞌesii, Taataa Iliitleemu gi kaay sa Aburahaamu tuba, “Saara siĩ soꞌoy qasaydi taqay sa gimbaki gaã kaay? Siĩ soꞌoy kaadi taai, ‘Gu louu, ana hayii dahhasaa slawaraa da daa⁄u gaduumatii toii?’ 14 Inkoo itatiisi, malaaꞌay, wanaa gimba gwaa karahhu, daroo slanqadiye Taataa Iliitleemu? Gu lou, kwarakhaalee nama qatlaykii gooay ana hamaa khaw daqa dooguu. Qatlaykee Saara hadee doogu maa konta naw.” 15 Da hheꞌesi Saara yaa tlaꞌamuti, gi gimbuusidi afaꞌafuumaa tuba, “Ana haã qasayiiba.” Teꞌesii, Iliitleemu gi kaay tuba, “Hikee gimba gu louuba. Gu lou, igi haã qasaydi.”
Aburahaamu firoo dosi sa hida gu Sodomaa
16 Da hheꞌesi, hhawatee hhakee gu tami gii tlayri, gi waaudiri, gi yaamu gu Sodomaa khuꞌusiri. Aburahaamu gigi tosaa leeleehhesi inay. Giyaa ilii dayri daqa wakay, gi yuꞌudiri hiihuuꞌuma gu Sodomaa. 17 Teꞌesii, Taataa Iliitleemu gi kaay muuna gosii tuba, “Gu louu, Aburahaamu suguti yakwaa idoo ga slae laqa? 18 Ina Aburahaamu, maati taataa gu hida gu didiri tleehhidi, gumaa koomee ⁄uuru hari khisla. Kara hari daqa dosi hida gu hhapapu sliimaa tiꞌii khoorotii hagimaa ⁄aafa. 19 Ina hagwaayii leehhi, ma caacaahhamisi laqwaloo dosi haa hida gu mara gosi haã hhakee see goõ gumaa aluũ kosi dahhee, ma ilii koniri gimba gooi sliimaa, ma ibiidiri ibinaa da hhoi dooba dakoo, ana ma yondiidi sa ina, idoo gaa ilii seelimi gooay daqa dosii.”
20 Da hheꞌesi, Taataa Iliitleemu gi kaay sa Aburahaamu tuba, “Haani akhasi ⁄aa⁄imuu gu didiru hari khisla, sa gimba gu tlakwaroo da didiri loi da hida gu Sodomaa haa Gomoora. 21 Inkoo, kwanda gayii ⁄eete, ma arimaa kay tlakwaroo dooina, idoo gi slanqaside. Teesaaqay hoo asu caahha, bere ⁄aa⁄imukira, gwaani khaw daqa dooii, guti lou, angamalee guti louuba.”
22 Da hheꞌesi, hhawatee hhakee gu cada gi tooinaa waaudiri, gi tongoo da Sodomaa khuꞌusiri. Aburahaamu kilesi naa meeti, hiĩ qadidi pandaa da Taataa Iliitleemuge. 23 Teꞌesii, Aburahaamu yaagii sati ilaciyaa gu Taataa Iliitleemuge, gi kaay tuba, “Gu louu, hagiti hhamisidaa sumuku hida guba dakoo sliimaa haa hhaã gu koomee dakoo? 24 Malaaꞌay, bere wanay hida mibeeri kooani guba dakoo tongoteesii? Gu louu, tongotee goõ ha kahhadaa, haga toogwaa hhamisida? Haga maydaabaslii hhamisaraa, sa gimba gu hida hhakee gu mibeeri kooani guba dakoo, goó ibiidee tongoteesii? 25 Hhooa gimbakee kwahhaku sumuku daqa doogwaa. Gu louu, hati cu⁄uda hida guba dakoo sliimaa haa hhaã gu koomee dakoo? Naraꞌaaba! Gimbakee kwahhaku sumuku daqa doogwaa! Ugu kilesi noó hiifaakimisida gimba gu hida sliimaa tiꞌii khoorotii. Inkoo kwanda sigii faakiside inay see hhoinay.”
26 Da hheꞌesi, Taataa Iliitleemu gi ilaki⁄isi tuba, “Bere hoo slaw hida mibeeri kooani guba dakoo tongoteesii da Sodomaage, hagoo hhamisaaba tongotee, sa gimba gu hida hhakee.”
27 Teꞌesii, Aburahaamu gi kaay tuba, “Inkoo ee, nahaã ha kooma ⁄atlimaa gu idara haa Looimoo gu goõ, ana gamati idoo gooba, ti heedi gu ihiĩꞌi kilesi pandaa doogu, hhooa hani mayde, ma maasi kara. 28 Malaaꞌay, bere wanay hida mibeeri cigahha haa kooani kilesi guba dakoo? Tongotee goõ hagooti hhamisidaa, sa gimba gu hida hhakee gu kooani gu hhaki?” Taataa Iliitleemu gi ilaki⁄isi tuba, “Suti! Bere hoo slaw teꞌesii hida mibeeri cigahha haa kooani kilesi guba dakoo, hagoo hhamisaaba tongotee.”
29 Da hheꞌesi, Aburahaamu gi kara maasi tuba, “Malaaꞌay, bere hoo slayda hida mibeeri cigahha kilesi guba dakoo?” Taataa Iliitleemu gi ilaki⁄isi sa ina tuba, “Bere yoo teesaaqay, hoo taqay laqaaba, sa gimba gu hida hhakee gu mibeeri cigahha guba dakoo.”
30 Teꞌesii Aburahaamu gi kaay tuba, “Ye Taataa, hhanti slahhaaꞌada sa ana, hhooa hani mayde, magu kara maasi. Malaaꞌay, bere hoo slayda hida mibeeri tami kilesi guba dakoo teꞌesii tongoteesii?” Taataa Iliitleemu gi ilaki⁄isi tuba, “Bere gimati hida mibeeri tami kilesi noo wanay teꞌesii guba dakoo, hoo teesaaqay laqaaba.”
31 Da hheꞌesi, Aburahaamu gi kara kaay tuba, “Inkoo nahaã ha kooma ⁄atlimaa gu idara haa Looimoo gu goõ, hhooa hani mayde, ma maasi kara. Malaaꞌay, bere hoo slayda hida mibeeri cada kilesi guba dakoo tongoteesii?” Taataa Iliitleemu gi ilaki⁄isi tuba, “Bere gimati hida mibeeri cada kilesi noo wanay teꞌesii guba dakoo, haga hhamisaaba tongotee.”
32 Teꞌesii, Aburahaamu gi kaay tuba, “Ye Taataa, hhanti slahhaaꞌada sa ana, hani mayde magu kara maasi dayii faakoo. Malaaꞌay, bere hoo slayda hida mibi kilesi guba dakoo teꞌesii tongoteesii?” Taataa Iliitleemu gi ilaki⁄isi tuba, “Bere hoo slaw teꞌesii hida mibi kilesi na wanay guba dakoo, haga hhamisaaba.”
33 Qatlay Taataa Iliitleemu giyaa ilii hheꞌesi idara haa Aburahaamu, gi waaudi. Aburahaamu see gi tosaa ki⁄i aya gosii.