Ila⁄imbidu gu daba⁄u
17
1 Qatlay Aburaamu giyaa ilii kone koraraa mibeeri gweleti haa gweleti, dugwaa ilii khay kara ha Taataa Iliitleemu, sugugi kaay tuba, “Ana na Iliitleemu gu kooma ⁄uuru goõ. Ibiidi hhoinay pandaa dooii, kara dugu hhanti ilii arina dakoo, 2 ana ma tlaatleesi ila⁄imbidu haa ugu, magu iliiay ugu, ma slaydi laqwaloo wa⁄a hari khisla loi.”3 Qatlay Aburaamu giyaa ilii akhasi teesaaqay, gi keebeeidi, gii gupu⁄usi saga gosi hhapeege. Da hheꞌesi Iliitleemu gi kaay sa ina tuba, 4 “Itatiisi, hari bara dooi, ila⁄imbidu ga tlaatleese haa ugu na nahiĩ: ugu hamaati taataa gu hida gu hhapapu wa⁄a tleehhita. 5 Uma googu dugu kara eteedinaaba na Aburaamu.a Inkoo uma googu na Aburahaamu,b sa gimba, ugu maati taataa gu hida gu hhapapu wa⁄a tleehhita. 6 Ana hagu iliiaw ugu, ma slaydi laqwaloo wa⁄a hari khisla loi, inay ma hida gu hhapapu wa⁄a tleehhidiyay, kara daqa laqwaloo doogwaa maay ca⁄iyay watemi wakinay.
7 Ha iliikooma ila⁄imbidukee, ma meeti tla⁄aã goorii ana haa ugu haã laqwaloo doogu see damaa khawa, ma ila⁄imbidu gu koraraa goóba hiifaakoo tleehhidi. Gu lou, ana ti Iliitleemu googu, kara hamaati Iliitleemu gu laqwaloo doogu tleehhida damaa khawa. 8 Gu lou, ana sangu hadisa unkuray hhapee sliimaa da Kanaani, hhapetee goó ilii ibite inkoo yaamulooay gooba pahha, ma hhapee dooguna tleehhiti koraraa goóba hiifaakoo, kara ana hamaati Iliitleemu googuna tleehhida.”
9 Teꞌesii, Iliitleemu gi kara kaay sa Aburahaamu tuba, “Inkoo, hari bara doogu, kwanda ugu ga ilii konte ila⁄imbidukii koorii. Kara ugu kilesiiba, laqwaloo doogu see sliimaa damaa khawa hiti iliikoneei gimbaki. 10 Hiĩ na ila⁄imbidu goy ga ilakonte: ugu haa mara googu goõ haã laqwaloo doogu see sliimaa damaa khawa, kwanda hhawatee haa yaꞌay goõ gu hhawatee digi daba⁄iye. 11 Gu lou, unkuray kwanda ga daba⁄adeec hhawatee. Haã noo asu amoo dari laqaruu ila⁄imbidu goori. 12-13 Laqwaloo doogu damaa khawage yaꞌay gu hhawatee goõ gu balalu gweleti kwanda digi daba⁄iye. Kara, yondimiisee goõ damaa laqwaliye mara googuu, haã hhaã see goõ damaa kirigiye hari peesay daqa hida wakinaygo, hhaã gu laqwaloo dooguuba, hhakee see goõ kwanda digi daba⁄iye. Hari amotee slaqwoo kokuna maa laqanay idoo waka, namaay slaydiri tuba, ti ila⁄imbidu gu koraraa goóba hiifaakoo. 14 Hhawata damaaba daba⁄u, dugumaati paslisi daqa hida kosaa, sa gimba ina yaa siꞌi ila⁄imbidu goori.”
15 Da hheꞌesi, Iliitleemu gi kara kaay sa Aburahaamu tuba, “Inkoo hari bara da hadee doogu Saraay, haga hhanti eteedinta kara uma gosi na Saraay. Inkoo uma gosi na Saara.d 16 Ana Saara haga ⁄aafa, gu lou, sugu laqwalida naw. Ina haga ⁄aafa, namaa iyoo da hida gu hhapapu wa⁄a tleehhita, kara watemi wakinay see maa hiica⁄iyay tla⁄aã gu laqwaloo dosaa.”
17 Teꞌesii, Aburahaamu gi keebeeidi pandaa da Iliitleemuge, gii gupu⁄usi saga gosi hhapeege, gi tosaa qasay, sa gimba yaa ilahudeesi muuna gosii tuba, “Gu louu, hayii dahhasa slawaraa da daa⁄u koraraa hhankii gu mibeeri mibige? Haã Saara see hiti hadee daa gaduti tuku, da kooma koraraa mibeeri gweleti. Gu louu, hiidakusi dahhasidaa slawaraa da daa⁄u?” 18 Teꞌesaa gi kaay sa Iliitleemu tuba, “Naraꞌa, inkoo Isumaeeli see nankoy, gunti aloo ga⁄ayda ina, hagugi ⁄aafida!”
19 Da hheꞌesi, Iliitleemu gi ilaki⁄isi tuba, “Suti, hhanti qaasida iliipaꞌaruu googu daqa Isumaeelige. Saara hadee doogu yooti laqwalida naw sa ugu, luguroo ayda uma gosi na Isaaka. Hamaa iliikooma ila⁄imbidukee koori haa ina, ma ila⁄imbidu gu koraraa goóba hiifaakoo tleehhidi sa laqwaloo dosi sliimaa damaa khawa.
20 Inkoo, hari bara da Isumaeeli nankoogu, ana firoo doogu hagaã akhasi. Gu lou, hagu ⁄aafa ina see, hagu iliiaw ina, suguti qaw laqwaloo wa⁄a hari khisla loi. Ina maa laqwali yaꞌay mibi haa cada, inay maa mutemi tleehhidiyay, kara laqwaloo dosi maa hida gu didiri tleehhita. 21 Hari bara da ila⁄imbidukee koori, ana hagumaa iliikooma ila⁄imbidukee haa Isaaka, damaa ilii laqwaliye ha Saara sa ugu kwarakhaalee qatlaykii gooay.” 22 Qatlay Iliitleemu giyaa ilii hheꞌesi idara haa Aburahaamu, ina gugi tosaa may Aburahaamu.
23 Qariqaaqari letuteesii leẽ, Aburahaamu gii oy Isumaeeli nankosi, hhawatee goõ daa laqwali mara gosii haa yondimiisee goõ gu hhawatee daa kirigi hari peesay gosi, gigi tosaa daba⁄i goõ, idoo sugwaa ilii kaay gooay ha Iliitleemu. 24-26 Aburahaamu haa nankosi Isumaeeli digaa letutee leẽ daba⁄i. Qatlaykee Aburahaamu yaa kona koraraa mibeeri gweleti haa gweleti, kara nankosi Isumaeeli yaa kona koraraa mibi haa tami. 27 Kara hhawatee goõ mara gu Aburahaamuge, hhawatee hhakee daa laqwali mara gosii, haã hhakee see daa kirigi daqa hida wakinaygo, digaa sliimaa daba⁄i haa Aburahaamu.