Hagarii haa nankosi Isumaeeli
16
1-3 Qatlay Aburaamu giyaa ilii ibiidi koraraa mibi hhapeteesii da Kanaanige, Saraay hadee dosi yaa kahhada slawaraa yaꞌay sa ina. Inkoo, Saraay yaa konta tongitoꞌoo, uma gosi naa Hagarii, yaa hhapee da Misiri dahhada.Letu waka, Saraay gi kaadi sa hhawata gosi Aburaamu tuba, “Yuꞌudiyaa, Taataa Iliitleemu hinaa afii⁄iti, na may slawaraa yaꞌay. Inkoo ana sugu hadisa tongitoꞌoo doy, natee owakay, angamalee ana see dini iliiay, ma slay yaꞌay hari daqa dosi.” Teꞌesii, Aburaamu gi tosaa ⁄imbi gimbakee, idoo sugwaa ilii kaay ha hadee dosi. Da hheꞌesi, Saraay gi tosaa hadisidi tongitoꞌotee tosi Hagarii Misiritoꞌoo sa hhawata gosi, ma hadee dosi da coko⁄i tleehhiti. 4 Aburaamu gi tosaa gii oy Hagarii, gi hadee dosi tleehhiti, gi tosaa hiiloaydi. Qatlay hingaa ilii anti konta guraꞌa, yaa kara kontaaba gwaa⁄amee sa looitoꞌoo dosii.
5 Da hheꞌesi, Saraay gi kaadi sa hhawata gosi Aburaamu tuba, “Ugu naraani khaydi sa ana tlakwaroti sliimaa ga ilii waare. Ana sugwaa hadisi tongitoꞌotee toyi, ma hadee doogu tleehhiti, inkoo ina hingii arinti konta hubay, kontaaba kara gwaa⁄amee daqa dooii. Taataa Iliitleemu sandi laqane ugu haa ana miyaa na kona dakoo gimbakii.”
6 Teꞌesii, Aburaamu gi ilaki⁄isi sa hadee dosi tuba, “Yuꞌudiyaa, tongitoꞌotee toki dabaiĩ kokii wanta. Aare laqe idoo ga slaꞌade daqa dosii.” Saraay ginaa ilii tlaatleesidi labaꞌasu Hagarii hari khisla, sa gimbakee Hagarii gi tosaa lakiti daqa hindaqaara dosaa.
7 Da hheꞌesi, Malayika gu Taataa Iliitleemu, gi slay Hagarii ilaciyaa gu hhaahhiya wakayge da maꞌayge yade kongoqomeege. Hhaahhiyatee yaa kenga gu amoo da didirige wanta, daa yaamu gu Suuri khuꞌusidi. 8 Malayikakee gigi maasi tuba, “De miyaa Hagarii, igi caba ti tongitoꞌoo da Saraay, haa kaa dahhada? Kara inkoo ha kaakayda?” Ina yaa ilaki⁄isidi tuba, “Ana hati lakiikimida hindaqaara doy.”
9 Teꞌesii, Malayikakee gu Taataa Iliitleemu gi kaay sa Hagarii tuba, “Taa⁄a ki⁄e dabaiĩ gu hindaqaara doogii, laga iliihuua kayda.” 10 Gi kara kaay tuba, “Laqwaloo doogi hagamaay tlakhweesa hari khisla, kara digimaayii dahhasiyaaba faadoo sa hacimaa hhakee koina.” 11 Teꞌesii, Malayikakee gu Taataa Iliitleemu gi kaay sa ina tuba,
“Inkoo yuꞌudi bere, igi hangii loaydi,
kara hayii daada naw.
Nakee, uma gosi gurimaa ayde namaa Isumaeeli,a
sa gimba Taataa Iliitleemu yaani akhasi ⁄aa⁄imuu googi.
12 Nakee maa hhawatauudi ubee makimoo gu kweera pahha,
maati qwaqwatliitlina haa hida sliimaa,
kara hida sliimaa maati qwaqwatliitlinay haa ina,
maa ibiidiyaaba hari qasaw haa hiidayuuma dosi sliimaa goõ.”
13 Teꞌesii, Hagarii gi hhaꞌaleesidi Taataa Iliitleemu gwaa cocaacoa haa ina, gurigi aydi uma na Eli-Rooi,b gi kaadi tuba, “Gu lou, ana haguũ arimi ina goó ana khuꞌuma!” 14 Sa gimbakee, hhaahhiyatee dagarigi ay, uma gosi na Beeri-Lakhay-Rooi.c Haa letuti naqatloo see wanta tla⁄antla⁄a gu yaamu gu Kadeesi haa Bereedi.