Iliitleemu seeliru gosi daqa Aburaamuge
15
1 Qariqaaqari gimbaki giyaa ilii cati, Aburaamu dugwaagi ilii khay ha gimba gu Taataa Iliitleemu tletaage, sugugi kaay tuba,“Ye Aburaamu, hhanti tlaꞌamuta idoo lensee.
Ana hagu ga⁄aw ugu,
kara ana hagu ⁄aafa hari khisla loi.”
2 Teꞌesii, Aburaamu gi ilaki⁄isi sa ina tuba, “Ye Taataa Iliitleemu, Looimoo gu Goõ, Iliitleemu, yuꞌudi bere, ana haã gaduudi, koomaaba ma naw lenseei. Kara, Elieseeri gu Dameesiko, yondimiisay goy, namaa aaliyaa mara goy? Sini idoo mala qayda dati hhoi deei? 3 Ugu sinaa qaydiiba ana yaꞌay, hatee namaa idoo yondimiisay gu mara goy saganimaa aalimiisay goy tleehhidi.”
4 Yuꞌudiyaa, Aburaamu dugwaani ilii khay kara ha gimba gu Taataa Iliitleemu, sugugi kaay tuba, “Teesaaqay gooba! Heedikee maa aalimiisay googu tleehhidiyaaba coko⁄o seei. Itatiisi sugu kaay, naw gwaa guraꞌa googu dahha, hikee namaa asu aalimiisay gu mara googu loi.” 5 Teꞌesaa, Aburaamu dugwaagii ca⁄asi khoorooge waꞌay gu hemaa dosaa, sugwaagi kaay tuba, “Inkoo aare yuꞌudi tica⁄eerii hhakira rawaa gu rawge. Hagii dahhasidaa faadoo dooina? Laqwaloo doogu see hagamaay tlakhweesa taqay da tica⁄eerii gooay, faadoo dooina hhaku lensee gumaay dahhasa.” 6 Aburaamu gi ⁄imbi gimbakee gu Taataa Iliitleemu. Taataa Iliitleemu gi tosaa faadi Aburaamu kona ibinaa daa tafaꞌadi pandaa dosii hari amoo da ⁄imbaraa.
7 Qariqaaqari, gi kara kaay sa Aburaamu tuba, “Ana ti Taataa Iliitleemu gwaa ugu looyisu yadaa Uurugo, hhapee da Kalidaayogo, ma sugu hadisa kay hhapeti, ma toogu tleehhiti.” 8 Aburaamu gi kaay tuba, “Ye Taataa Iliitleemu, Looimoo gu goõ, inkoo ana malee caahha ambee, gu lou, sini hadisida hhapeti, ma tooi tleehhiti?” 9 Da hheꞌesi, Taataa Iliitleemu gi kaay sa ina tuba, “Sinaay oode idadu nahhakee kooani, tiiniya leẽ, legaꞌa leẽ haa bee⁄imoo leẽ, gonkoinaa gu koomee koraraa tami, kara laa hubita tlabiya leẽ haa haaiya da kundee, ligaa leehhisida tiꞌii gonkoinaa.” 10 Da hheꞌesi Aburaamu gi leehhisi idadu hhakee gonkoinaa daqa Iliitleemuge, gigi tosaa cu⁄i, gigii kaꞌamisi bareemoo cadacada, gigi tosaa slaahhadisi pandadu haa pandadu. Tlabiya haa haaiya da kunde higaay kaꞌamisiiba. 11 Da hheꞌesi, gwadiisu gii ibiidiri teꞌesii saynikeesii, dugugi tosaa gusimi ha Aburaamu.
12 Letutee, qatlay letu giyaa ilii daadaauusidi hiihuuaraa, Aburaamu dugugi ooy ha guꞌudee da didiri, hingiraati kwakwahhi, kaslenkwaa, duguũ ilaslaabi ha ⁄oona da didiri, ⁄oonatee yaay tlaꞌamuudisidi ina hari khisla. 13 Teꞌesii, Taataa Iliitleemu gi kaay sa ina tuba, “Caahhi naraꞌa gimbaki sugu kaawe. Gu lou, laqwaloo doogu himaa ibita koraraa miyaa cigahha hhapee da hida wakinayge, inay himaati yaamulooee gooba yade. Koraraa hhakee goõ inay maa tongee yade, kara digimaa labaꞌasi hari khisla. 14 Hida gu hhapetee gimaa ilii ibiidiyee tongee dooina pahha, hagimaa ⁄agitima, teꞌesii ginimaa ilii ca⁄iyay yadaa. Qatlay gimaa ilii waaudiyee yadaa hhapetiraa, maa konay hindaqaruumaa wa⁄a. 15 Inkoo, gimati teesaaqay see, ugu hamaa ibita hhoinay koraraa wa⁄a, hamaati watlida hari muuna gu hhou daqa hida kokuu gwaa kaka⁄eege, dugumaati qaasi hari gaduumaa day looi. 16 Qatlay laqwaloo doogu gimaa dayee cina da cigahhiige, maa ki⁄ida tiꞌii hhapee da Kanaanige. Letutee tlakwaroo da hida hhanki, doó Waamoori oine, gimaa daade daqataꞌay gaa ilatahhige, hatee namaati baloo da ⁄agitiru gooina.”
17 Da hheꞌesi, letu giyaa ilii huuꞌudi, qatlay gu ⁄oona, yuꞌudiyaa Aburaamu gi arimi ⁄alu gwaa kooma giꞌiru gwaa eehhiihhima haa mumbaala gwaa ooyiiyima, gii catiri hari tla⁄aã gu saynikee. 18 Letutee, Taataa Iliitleemu gi seelimi daqa Aburaamuge tuba, “Hhapeti goõ haga hadisa sa laqwaloo doogu, hiitlakhwaruũ gu hhapetee yadaa buubukira gu Misirigo, buubukira naqatloo gu didiru, doó Efuraati oine. 19 Haga hadisa hhapetee goõ da hida goó ibiidee teꞌesii, umaiĩ koina naa Wakeeni, Wakeniise, Wakadimooni, 20 Wahiiti, Wapereesi, Warefaay, 21 Waamoori, Wakanaani, Wagirigaasi haa Wayebuusi.”