Aburaamu ilabuꞌuru gu Looti gaugo
14
1 Qatlaykee, gau gu didiru giyaa ilii ca⁄i hhapeteesii. Yaa wanay mutemi wakinay cigahha, umaiĩ koina naa mutemi Kedorilaooma gu yaamu gu Elaamu, mutemi Amurafeeli gu yaamu gu Sinaari, mutemi Ariyooko gu yaamu gu Elasaari haa mutemi Tidaali gu yaamu gu Goyiimu. 2 Watemitee da cigahha hingaa ila⁄imbidiri ma gau kayri haa mutemi wakinay kooani, umaiĩ koina naa mutemi Beraaa gu yaamu gu Sodomaa, mutemi Birisaab gu yaamu gu Gomoora, mutemi Sinaabu gu yaamu gu Adimaa, mutemi Semibeeri gu yaamu gu Seboyiimu haa mutemi gu yaamu gu Beela (uma gu caduu gu daqatee na Soaari). 3-4 Watemitee da kooani digaa ⁄uureesi ha Kedorilaooma buꞌuduu gu koodi qoomay gu koraraa mibi haa cada. Qatlay daa ilii day kori gu mibi haa tami, yaa siꞌiri bueemaa gu kooditee. Hingaa ila⁄imbidiri iliiaꞌaw gauge, hingigi ilakhuukhuꞌumusiri sa gau kawa teꞌesii hiihuuꞌuma gu Sidiimuge (uma gosi gu caduu na tlawa da didiri da cakhasaa).5 Qatlay daa ilii day kori gu mibi haa cigahha, Kedorilaooma haa mutemitee gwaa sliimaa waaree haa ina yaa waaudiri, ma gau kayri. Yade amooge yaa gauusiri haa hida wakinay, umaiĩ koina naa Warefaay yade yaamu gu Asitarooti Karinayiimuge, Suusee yade yaamu gu Haamuge, Waeemi yade hiihuꞌuma gu Kiriyatayiimuge, 6 kara Hooree yade omeeri gu Seyiirige. Teꞌesii gigi kaba⁄iri gonkoinaa, gigi tooinaa gusiniri yade Eli-Paraani naqatloo, gwaa ilaciyaa gu hatlige waaree. 7 Da hheꞌesi, mutemitee da cigahha gi yade khuꞌusiri hiihuuꞌumakiray gu Sidiimuge, yaagii catiri hari yaamu gu Enimisifaati (uma gu caduu gu yaamu hhakee na Kadeesi) kara haa yaamu gu Hasasooni Tamaari, gi gauusiri yade haa hida wakinay, umaiĩ koina naa Waꞌamaleeki haa Waamoori, gigi kaba⁄iri gonkoinaa.
8 Teꞌesaa watemitira da kooani, mutemi gu Sodomaa, mutemi gu Gomoora, mutemi gu Adimaa, mutemi gu Seboyiimu haa mutemi gu Beela (uma gu caduu gu tongotee na Soaari) gi ilagaasiri sirikaarii dooina sliimaa, gi waaudiri gauge yade hiihuuꞌumakiray gu Sidiimuge, 9 ma gauusiri haa watemitee da cigahha, mutemi Kedorilaooma gu Elaamu, mutemi Tidaali gu Goyiimu, mutemi Amurafeeli gu Sinaari haa mutemi Ariyooko gu Elasaari. 10 Da hheꞌesi gaukeesii watemitee da kooani digaa kaba⁄i. Inkoo, hiihuuꞌumakeesii gu Sidiimuge, simeedoo yaa wanay wa⁄a, gwaa koomee laami. Qatlay watemi da Sodomaa haa Gomoora giyaa ilii lakiikimidiyee, hhawatee wakinay yaay huhuiri simeedoo hhakiray gu laamige, wakinay yaa lakidiri yade omeerige. 11 Da hheꞌesi, watemitee da cigahha gwaa kaba⁄ee gaukee, gi tooinaa gii ⁄utliri khooslay goõ haa ⁄agoo goõ da Sodomaa haa Gomoora, gi tooinaa waaudiri yaamu koinay. 12 Qatlaykee, Looti nanku nankooina haa Aburaamu yaa teꞌesii ibimaamidi Sodomaage. Ina haa khooslay gosi goõ giyaa kone, dugwaay ⁄utli ha fa⁄ayatee, gurigi tooinaa waaudiri yade tongaiimaage.
13 Inkoo yadaa gaukiraa yaa wana hhawata waku gwaa ba⁄amu, gi day daqa da Aburaamuge Eburaanimoo, gi kaay sa ina gimbakee gu Looti. Qatlaykee Aburaamu yaa ibiidi ilaciyaa gu khai hhakiray gu denige gu mialooni, gu Mamuree Amoorimoo. Mamuree yaa kona hhiee cada, umaiĩ koina naa Esikooli haa Aneeri. Hhawatee hhanki gu tami hingaa ila⁄imbidiri haa Aburaamu mangu iliiaꞌayri gauge. 14 Qatlay Aburaamu giyaa ilii akhasi tuba, Looti nanku nankooina, duguriĩ waaudi tongaiimaage, ina gi eteedi hhawatee miyaa tami haa mibi haa gweleti, gonkoinaa digaa teꞌesii laqwali tongoo dosii. Da hheꞌesi, sliimaa gi waaudiri, gi sira gusiniri mutemitee da cigahha yaamu gu Daani naqatloo. 15 Qatlay giyaa ilii dayri yade Daanige, letutee hari amasi, Aburaamu gii deehhi hhawatee hhakee kosi raqoo haa raqoo, ma ilagiidiri fa⁄ayatee, gi tooinaa iliitlairi, gigi kaba⁄iri, gigi gusiniri yade yaamu gu Hooba naqatloo, gwaa bara da Goraage waara, teꞌesaa yaamu gu Dameesikogo. 16 Da hheꞌesi, Aburaamu yaagi ilabuꞌumi khooslay goõ daay ⁄utli. Kara yaagi ilabuꞌumi Looti nanku nankooina haa khooslay gosi goõ, haa hida goõ daraa waaudi tongaiimaage, yaagi tooinaa watliri hhapee dooinay.
Melikisedeeki yaa firimi Iliitleemu sa Aburaamu
17 Aburaamu giyaa ilii kaba⁄i Kedorilaooma haa watemitee gwaa sliimaa waaree haa ina. Qatlay giyaa ilii ki⁄i gaugo, mutemi gu Sodomaa ginaa ilii waaudi sa amoodabaawa Aburaamu hiihuuꞌumakiray gu Saawege (uma gu caduu gu daqatee na Hiihuuꞌuma gu Mutemi).
18 Kara mutemi waku, uma gosi naa Melikisedeeki, mutemi gu yaamu gu Saleemu, yaagi leehhisi mukaatimoo haa difaayc sa Aburaamu. Qatlaykeesii, Melikisedeeki naa hhapalooay gwaa leehhiihhimisa idadu, sa hida daqa Iliitleemu gu Rawaa gu Idadu Gonge Waara, 19 gi firimi Iliitleemu sa Aburaamu tuba,
“Aburaamu dugu ⁄aafiye ha Iliitleemu gu Rawaa gu Idadu Gonge Waara,
gwaa tleehhu raw haa hhapee.
20 Kara Iliitleemu gu Rawaa gu Idadu Gonge Waara dugu hhaꞌaleesiye,
Ina gwaa iliiaw ugu, gi kaba⁄adi fa⁄ayatee toku.”
Da hheꞌesi, Aburaamu gi hadisi sa Melikisedeeki idoo leẽ daqa idadu mibigo, daqa khooslaykiraa goõ giyaa ilabuꞌumi.
21 Teꞌesii mutemi gu Sodomaa gi kaay sa Aburaamu tuba, “Khooslaykee gaani ilabuꞌunti owakuu sa ugu, ana sini hida koi kilesi hadiside.” 22 Aburaamu gi kaay sa mutemi gu Sodomaa tuba, “Ha seelima letuti tiꞌii pandaa da Taataa Iliitleemuge, Iliitleemu gu Rawaa gu Idadu Gonge Waara, gwaa tleehhu raw haa hhapee, 23 hagi kaay ambee, ana hiiowaaba idoo doogu lensee, gimati idoo da coko⁄oniinii taqay da putiĩ gooay, gimati dincaarimoo gu ya⁄atiya see, ugu maa ba⁄atii slayda amoo dari kaawa ubee, ‘Ana naa hindaqaruudisi Aburaamu!’ 24 Ana hiiowaaba idoo lensee khooslaykeesaa kokaa, bueemaa gu ⁄agotira kilesi daa ⁄agimi ha hida koi ganii ow. Hari bara diĩ Aneeri, Esikooli haa Mamuree, inay see hiioyee khooslay daay deehhi sa inay, sa gimba yaa sliimaa hada kayri haa ana gauge.”