Aburaamu haa Looti deehhiihhiru gooina
13
1 Da hheꞌesi, Aburaamu gi waaudi hhapeteesaa da Misirigo, gi hatli gu Negeebu khuꞌusi, gi day teꞌesii, ina haa hadee dosi, hida kosi haa khooslay gosi goõ. Looti see nanku nankooina yaa sliimaa waaudi haa ina. 2 Qatlaykee, Aburaamu yaa hindaqaruudi hari khisla, yaa hindaqaru gu kuꞌunaanay, feesa haa sahaabu.a 3 Teꞌesaa Negeebugo yaa khoci, yaa kwahhamisi amooge daqeemoo haa daqeemoo, gi tongoo da Beteeli khuꞌusi. Teꞌesii, gi dayri daqatiray giyaa ilii tluhhusi hemaa dosi wakaꞌalee, daqa daa tla⁄antla⁄a gu Beteelige waara haa tongoo da Aayi, 4 daqateesii giyaa ilii tleehhi wakaꞌalee masabaahu sa Taataa Iliitleemu, gugi tosaa hhaꞌaleesi teꞌesii.5 Inkoo, Looti gwaa sliimaa waara haa Aburaamu, ina see slime yaa kona raqoo gu yakway, aaraa haa bee⁄u, kara yaa kona hida wa⁄a. 6 Qatlay giyaa ilii ibiidiri sliimaa hhapeteesii, teꞌesii daqa yaa buꞌudisidiiba sa deꞌeẽ gonkoinaa, sa gimba kuꞌunaanay gooina yaay tlakhweesi hari khisla. 7 Letu waka, deꞌemiisee da Aburaamu haa deꞌemiisee da Looti yaa tlaatleesiri naanaqamoo sa gimbakee.
Qatlaykeesii, Wakanaani haa Wapereesi naa looee da hhapetee. 8 Da hheꞌesi, Aburaamu gi kaay sa Looti tuba, “Inkoo, ugu haa ana hhanti naanaqamidana, kara deꞌemiisee doogu haa deꞌemiisee doy hhanti naanaqamidiyay, sa gimba dandiray hiti hida gu mara leẽ. 9 Inkoo, yuꞌudi bere hhapetee sliimaa da pandaa dooguu waara, ba⁄ay hangiti deehhiihhina ugu haa ana. Leehhii daqa ga slaꞌade ilii ibinaa kawa. Bere ugu ha bara da basa khuꞌusida, ana ha bara da ⁄uya khuꞌusa, bere ugu ha bara da ⁄uya khuꞌusida, ana ha bara da basa khuꞌusa.”
10 Da hheꞌesi, Looti gi yuꞌudi, gi arimi hiihuuꞌuma goõ gu duudu gu Yoridaani, gu Soaari khuꞌusa. Hiihuuꞌumakee daqa dosii gwaa hhou, yaa kona maꞌay wa⁄a. Hhoinay gosi ubee qaymoo da Taataa Iliitleemub pahha, kara ubee hhapee da Misiric pahha. (Qatlay Taataa Iliitleemu saa kahhiye hhamisaraa yaamu gu Sodomaa haa Gomoora.) 11 Looti gi tosaa hiileehhi hiihuuꞌumakee goõ gu Yoridaani, gi waaudi, gi yada khuꞌusi bara da ilacindoo gu rawaage. Hhawatee hhanki gu cada hingaa teesaaqay deehhiniri. 12 Aburaamu gi tosaa ibiidi teꞌesii hhapee da Kanaanige. Kara Looti gi ibinaa kay tla⁄antla⁄a gu tongagu gwaa hiihuuꞌumakeesii waaree, gi tosaa tluhhumisi hemamuu kosi ilaciyaa haa tongoo da Sodomaa. 13 Hida gu tongotee gwaa tlakwi, yaa konay tlakwaroo wa⁄a hari khisla pandaa da Taataa Iliitleemuge.
14 Qatlay Looti hingaa ilii deehhiihhiniri haa Aburaamu, Taataa Iliitleemu gi kaay sa Aburaamu tuba, “La yuꞌuta bareemoo sliimaa, bara da Goraage haa bara da waayeege, bara da ilacindoo gu rawaage haa bara da ilacindoo gu biraage. 15 Gu lou, hhapetee sliimaa goõ ga ante haga hadisa sa ugu haa sa laqwaloo doogu koraraa goóba hiifaakoo. 16 Kara laqwaloo doogu see hagamaay tlakhweesa hari khisla, ubee seehhinay pahha. Laqwaloo doogu dagamaay dahhasiyaaba faadoo ha heedi lensee. 17 Inkoo taa⁄a loliisa kay hhapetee bareemoo sliimaa, sa gimba haga hadisa sa ugu.”
18 Da hheꞌesi, Aburaamu gi waaudi teꞌesaa, gi ibinaa kay ilaciyaa gu khai wakinay gu denige na mialooni, gu heedi waku uma gosi na Mamuree, yade ciyoomoo gu tongoo da Heburoonige. Daqateesii ginaa ilii tleehhi masabaahu sa Taataa Iliitleemu.