Aburaamu idoo dugwaa ilii eteedi
12
1 Letu waka Taataa Iliitleemu yaa kaay sa Aburaamu tuba, “Looyi teꞌesaa hhapee doogwaa, may hiidayuuma doogu haã hida gu aya gu taataa googu see. Taa⁄a waaudi yade hhapee wakay sugu laqame ana.2 Teꞌesii, laqwaloo doogu ana hagamaay tlakhweesa hari khisla,
namaa hida gu didiri tleehhita.
Hagu ⁄aafa ugu, uma googu see maay ca⁄i hari khisla,
hida wakinay digima ⁄aafi hari uma googu.
3 Hida goõ gumaa laqamee hhoinay sa ugu,
inay see ana hagimaa ⁄aafa,
kara ina gumaa lausa ugu,
hikee ana hagumaati ⁄agitima.
Kara hida sliimaa tiꞌii khoorotii digimaa ⁄aafi hari daqa doogu.”
4 Da hheꞌesi, Aburaamu gi looy teꞌesaa, idoo sugwaa ilii kaay gooay ha Taataa Iliitleemu. Looti see yaa sliimaa waaudiri haa ina. Qatlay, Aburaamu giyaa ilii looy tongoo da Kharaanigo, ina yaa kona koraraa mibeeri fanqu haa kooani. 5 Ina yaa sliimaa looyiri haa hadee dosi Saraay, haa Looti nanku nankooina, gii oyri kuꞌunaanay haa khooslay gooina goõ, giyaa slayri teꞌesaa. Kara gii oyri yondimiisee dooina goõ giyaa slayri teꞌesaa yaamu gu Kharaanigo,a gi tooinaa waaudiri hhapee da Kanaanige, gi dayri taysi.
6 Teꞌesaa, Aburaamu yaa khoci hhapeteesii, gi day daqa wakay, uma gosi na Mooree,b yade ciyoomoo gu tongoo da Sekeemuge. Teꞌesii, khaimoo gu mualooni yaa wana. Qatlaykee hida wakinay, uma gooina naa Wakanaani, naa ibimaamidiyay teꞌesii hhapeteesii. 7 Qatlay Aburaamu giyaa ilii teꞌesii wane Mooreege, Taataa Iliitleemu ginaa kara ilii khay daqa dosii, gi kaay sa ina tuba, “Hhapeti sliimaa ana haga hadisa sa laqwaloo doogu.” Teꞌesii daqateesii, Aburaamu gi tleehhi masabaahu sa Taataa Iliitleemu gwaay ca⁄u daqa dosii.
8 Teꞌesaa daqateesaa, ina gi waaudi, gi omeeri khuꞌusi gwaa ilacindoo gu rawaage waaree tongoo da Beteeligo, gi day yade, gi tosaa tluhhusi hemaa dosi teꞌesii. Daqateesaa tongoo da Beteeli haraa bara da ilacindoo gu biraa wanta, kara tongoo da Aayi haraa bara da ilacindoo gu rawaa wanta. Teꞌesii gi kara tleehhi masabaahu sa Taataa Iliitleemu haa gugi hhaꞌaleesi Taataa Iliitleemu. 9 Teꞌesaa, Aburaamu gi kara waaudi, gi hatli gu Negeebu khuꞌusi.
Aburaamu hhapee da Misirige
10 Inkoo, hhapeteesii da Kanaanige qori yaay ca⁄i, qorikee gwaa didiru hari khisla. Da hheꞌesi, Aburaamu gi waaudi hhapee da Misirige, ma ibiidi yaamulooay gooba pahha yade hiifaakoo da qori naqatloo. 11 Qatlay giyaa ilii daadaauusiri hhapee da Misirige, Aburaamu gi kaay sa hadee dosi Saraay tuba, “Hadee doy, itatiisi sigi kaay. Ana haã tlaꞌamuudi, sa gimba igi ti hadee da hhoi hari khisla. 12 Bere igi digoo arina ha hida gu Misiri, inay yooti ilahudeesiyay tuba, ‘Haã hadee dosi!’ Doo hheꞌesiye inay nooti gaasiyay ana, igi idoo lensee hhaka digoo laqiye. 13 Inkoo, ba⁄ay sigooti kaade ubee, igi hiti hotoori.c Teesaaqayge inay sinoo laqanay hhoinay gooina sa igi, kara ana dinoo gaasiyaaba.”
14 Qatlay, Aburaamu giyaa ilii day yade Misirige, hida gu Misiri gi aniri Saraay, yaa hadee da hhoi hari khisla. 15 Kara, yondimiisee da Faraawd see giyaa ilii aniri ina, gigi hhaꞌaleesa kayri daqa Faraawge sa hhoinaykee kosi. Da hheꞌesi, Saraay dagarigi tosaa waaudi mara gu Faraawge, ma hadee dosi tleehhiti. 16 Da hheꞌesi, Aburaamu sugugi laqami hhoinay ha Faraaw sa Saraay, sugugi hadisi yakway, aaraa, bee⁄u, daqwaai, gamiyaa, tongee da hhawatee haa tongee da tigay.
17 Sa gimbakee Faraaw giyaa laqi, Taataa Iliitleemu gugi ⁄agitimi ina haa hida goõ gu mara gosi, sigaagi ya⁄abi ga⁄ay waku gu tlaku, sa gimba ina saay oy Saraay, hadee da Aburaamu. 18 Da hheꞌesi, Faraaw gi eteedi Aburaamu, gugi maasi hari dihhay tuba, “Inkoo ugu hanaati malee laqadi ana? Ugu sinaa soꞌoy maydi kaawaraa sa ana ubee, haã ti hadee doogu? 19 Kara haa soꞌoy kaadi ubee, ‘Haã hotoori?’ Sa afotira toogu ana hagagii oy, ina ma hadee doy tleehhiti! Inkoo, hadee doogu nahaã tiꞌii, aare owa kay, taa⁄a gari waaute!” 20 Da hheꞌesi, Faraaw gi ya⁄abi yondimiisee dosi, ma leehhisiri Aburaamu haa hadee dosi haa khooslay gosi goõ, ma digii ca⁄asi kengage, teꞌesaa hhapeteesaa da Misirigo.