Tlankoo gu Babeeli
11
1 Qatlay giyaa ilii kahhiyee pasida, hida sliimaa khooroo gonge, gimba leẽ ginaa giimaamisiyay, daa khuiye ha hida goõ. 2 Inkoo, hida giyaa ilii looyiri yade khuꞌusa bara da ilacindoo gu rawaa, gi dayri raqamaauu gu hhapee da Sinaarige, gi ibiidiri taysi.3 Da hheꞌesi gi cocoiri inay haa inay tuba, “Yeraa, khocaa, boo⁄imisanee tufaarii, maga da⁄ani hari aslaa naraꞌa.” Teꞌesii gi slayri tufaarii badiiri da tle⁄eẽ haa laami badiiri da tipa dari tlehhinay. 4 Kara gi cocoiri inay haa inay tuba, “Khocaa, ma tleehhani yaamu haa tlankoo gu kooma cina da dawa rawaa gu raw naqatloo, uma goori may ca⁄i, kara ma mayni pasida khooroo gonge.”
5 Da hheꞌesi, Taataa Iliitleemu, yaagii ⁄eeti rawgo, magi arimi yaamu hhakee haa tlankokee daa tlehhaahhidiye ha hida. 6 Taataa Iliitleemu gi kaay tuba, “Yuꞌudiyaa, hida hhanki ti hhapee leẽ, kara gonkoinaa gimba leẽ ginoó gimbuusiyay. Inkoo, hiĩ ti tlaatleesoo gu yondu gooina gi yondiidiye. Teesaaqay hiidahhasiyay yondu sliimaa gi slaiyee yondu.
7 Khocaa, hii⁄eetanee hhapeege, may kwaslidu kayni gimba gooina giyoó gimbuusiyee, mangu mayri wariiakhasoo inay haa inay.” 8 Teesaaqay, Taataa Iliitleemu ginaa ilii pasidisi inay teꞌesaa khooroo sliimaage, gi mayri tlehhinay yaamu hhakee. 9 Yaamu hhakee digirigi ay uma na Babeeli,a maꞌaana teꞌesii Taataa Iliitleemu ginaa ilii kwaasli gimba giyaa gimaamisiyee gu hhapee goõ. Teꞌesaa Taataa Iliitleemu gigi pasidisi khooroo gonge.
Seemu laqwaloo dosi da Aburaamu naqatloo
10 Hiĩ na catimisu gu laqwaloo da Seemu. Koraraa cada daa ilii kereꞌedi tlubay gu ilawa⁄iya, Seemu giyaa ilii kone koraraa miyaa leẽ, gi laqwali Arifakisaadi. 11 Qariqaaqari giyaa ilii laqwali Arifakisaadi, Seemu gi ibiidi koraraa miyaa kooani, kara qatlaykeesii gi laqwali yaꞌay wakinay gu hhawatee haa gu tigay.
12 Arifakisaadi giyaa ilii kone koraraa mibeeri tami haa kooani, gi laqwali Selakhaa. 13 Qariqaaqari giyaa ilii laqwali Selakhaa, Arifakisaadi gi ibiidi koraraa wakinay miyaa cigahha haa tami, kara qatlaykeesii gi laqwali yaꞌay wakinay gu hhawatee haa gu tigay.
14 Selakhaa giyaa ilii kone koraraa mibeeri tami, gi laqwali Ebeeri. 15 Qariqaaqari giyaa ilii laqwali Ebeeri, Selakhaa gi ibiidi koraraa wakinay miyaa cigahha haa tami, kara qatlaykeesii gi laqwali yaꞌay wakinay gu hhawatee haa gu tigay.
16 Ebeeri giyaa ilii kone koraraa mibeeri tami haa cigahha, gi laqwali Peleegi. 17 Qariqaaqari giyaa ilii laqwali Peleegi, Ebeeri gi ibiidi koraraa wakinay miyaa cigahha haa mibeeri tami, kara qatlaykeesii gi laqwali yaꞌay wakinay gu hhawatee haa gu tigay.
18 Peleegi giyaa ilii kone koraraa mibeeri tami, gi laqwali Reeu. 19 Qariqaaqari giyaa ilii laqwali Reeu, Peleegi gi ibiidi koraraa wakinay miyaa cada haa gweleti, kara qatlaykeesii gi laqwali yaꞌay wakinay gu hhawatee haa gu tigay.
20 Reeu giyaa ilii kone koraraa mibeeri tami haa cada, gi laqwali Seruugi. 21 Qariqaaqari giyaa ilii laqwali Seruugi, Reeu gi ibiidi koraraa wakinay miyaa cada haa fanqu, kara qatlaykeesii gi laqwali yaꞌay wakinay gu hhawatee haa gu tigay.
22 Seruugi giyaa ilii kone koraraa mibeeri tami, gi laqwali Nakhoori. 23 Qariqaaqari giyaa ilii laqwali Nakhoori, Seruugi gi ibiidi koraraa wakinay miyaa cada, kara qatlaykeesii gi laqwali yaꞌay wakinay gu hhawatee haa gu tigay.
24 Nakhoori giyaa ilii kone koraraa mibeeri cada haa gweleti, gi laqwali Teera. 25 Qariqaaqari giyaa ilii laqwali Teera, Nakhoori gi ibiidi koraraa wakinay miyaa leẽ haa mibi haa gweleti, kara qatlaykeesii gi laqwali yaꞌay wakinay gu hhawatee haa gu tigay.
26 Teera giyaa ilii kone koraraa mibeeri fanqu, gi laqwali Aburaamu, Nakhoori haa Kharaani.
Teera haa laqwaloo dosi
27 Hiĩ na catimisu gu laqwaloo da Teera. Teera yaa laqwali yaꞌay tami gu hhawatee, umaiĩ koina naa Aburaamu,b Nakhoori haa Kharaani. Kara Kharaani yaa laqwali naw, uma gosi naa Looti. 28 Qatlay Teera giyaa ilii kahhiye hhamaraa, Kharaani ginaa ilii hhami yade yaamu gu Uuruge, daa ilii ibiidi hida wakinay naa Kalidaayo. Teꞌesii naa hhapee dugwaa ilii laqwali.
29 Aburaamu haa nankooina Nakhoori, gonkoinaa gi khabiibiniri. Aburaamu gi khabimi hadee, uma gosi na Saraay,c kara Nakhoori gi khabimi hadee, uma gosi na Milikaa.d Milikaa haa Isikaa yaa sagameeru gu Kharaani. 30 Inkoo, Saraay hadee da Aburaamu, yaa mogombiisoꞌoo, yaa kontaaba yaꞌay.
31 Teꞌesaa yaamu hhakeesaa gu Uurugo, gwaa hhapee da Kalidaayoge waaree, Teera yaa looy ina haa nankosi Aburaamu, haa kookoo gosi Looti nanku Kharaani, haa Saraay kumboꞌoo dosi, hadee da nankosi Aburaamu. Gonkoinaa gi looyiri, gi hhapee da Kanaani khuꞌusiri. Inkoo yade pandaage yaa dayri tongoo wakay, uma gosi na Kharaani, gi tooinaa ibiidiri teꞌesii. 32 Qariqaaqari, Teera gi hhami teꞌesii tongoteesii da Kharaanige. Qatlay giyaa ilii hhami, yaa kona koraraa miyaa cada haa kooani.