Iliitleemu gaasaraa ila⁄imbidu haa Nuuhu
9
1 Teꞌesii Iliitleemu gi ⁄aafi Nuuhu haa yaꞌay kosi, gi kaay sa inay tuba, “Laqwala haa roogidaw, la hacisiday kara khooroo. 2 Makay goõ gu khooroo, cira⁄oo goõ, khulukhumabay goõ goó hhumbaada hhapeege haa samaakii goõ gu tlawa da didiri, inay hangumaa tlaꞌamuudiyay haa gwaa⁄iyay unkuray hari khisla. Idadu hhakee goõ tawaalimakina. 3 Kara, idadu hhakee goõ ⁄agoo dooguna tleehhidiyay, idoo sangwaa ilii hadisi gooay baruũ goõ, ma ⁄agoo dooguna tleehhiti. Inkoo, sanguu hadisi idadu hhakee goõ.”Ceedeege wanay slafimaa
4 Teesaaqay see, Iliitleemu gi ilakoomi kaawa sa Nuuhu tuba, “Etaa, hhanti ⁄agintay fuꞌumay gu koomee ceedee, maꞌaana slafimaa ceedeege wanay. 5 Gu lou, kara ceedee da hida daga hhanti tuutuqi hari amoo da cu⁄uduũ inay. Khulukhumbay goõ gu koomee slafimaa, gumaa tuutuqa ceedee da hida, kwanda digi cu⁄iye. Qatlay sliimaa heedi goó tuutuqa ceedee da danaꞌa gosi, gi ⁄isina gwaaꞌaraa, haguti hukuma gwaaꞌaraa ina see. 6 Sa gimba haa tleehhi hida ana slaqamisiyay, heedi goo tuutuqa ceedee da heedi waku, gi ⁄isina gwaaꞌaraa, kwanda ina see dugu hukune hari amoo da tuutuqa ceedee dosi ha hida wakinay.
7 Inkoo, unkuray laqwala haa roogidaw. Roogidaw hari khisla khooroo sliimaa.”
Likweekwiya: Laqaruu gu ila⁄imbidu
8 Da hheꞌesi Iliitleemu gi kaay sa Nuuhu haa yaꞌay kosi tuba, 9 “Yuꞌudiyaa, inkoo ana qamaamida ila⁄imbidu gooi haa unkuray sliimaa haa laqwaloo dooguna, 10 haa idadu goõ gu koomee slafimaa da cira⁄oo gooay, kuꞌunaanay haa makay goõ gu khooroo, idadu goõ gwaa sliimaa hiica⁄ee haa unkuray safiinago. 11 Hiĩ na ila⁄imbidu gooi ga qamaamide haa unkuray, etaa maa kara hhamisaaba idadu sliimaa gu koomee slafimaa haa khooroo sliimaa, hari tlubay gu kooma ilawa⁄iya.”
12 Iliitleemu gi kaay tuba, “Hiĩ na laqaruu gu ila⁄imbidu ga qaase tla⁄aã gooii haa unkuray sliimaa haa idadu goõ. Ila⁄imbidukee hiikaasi daqa laqwaloo haa laqwaloo daa khoca. 13 Haã qaasi likweekwiya dooi tlongage, kara likweekwiyatee na amoo dari laqaruu ila⁄imbidu gooi daqa doogunay haa daqa khooroo sliimaage. 14 Qatlay sliimaa ana goo ilii ya⁄abe tlonga rawaa gu khoorooge, haa gi antay likweekwiya tlongage, 15 haay slaw ila⁄imbidukee koi gaa qaasi haa unkuray sliimaa haa idadu goõ gu slafee. Kara maa wanaaba tlubay gu kooma ilawa⁄iya, gi hhamisi idadu goõ gu koomee slafimaa. 16 Inkoo, qatlay likweekwiya daga ilii ane tlongage, haga arima, hagii slaw ila⁄imbidu gooi gu koraraa haa koraraa goóba hiifaakoo tla⁄aã gooii ana Iliitleemu haa idadu goõ gu koomee slafimaa khoorooge.”
17 Da hheꞌesi Iliitleemu gi kaay sa Nuuhu tuba, “Hiĩ na laqaru gu ila⁄imbiduki gaa qaasi tla⁄aã gooii haa idadu sliimaa gu slafee khoorooge.”
Nuuhu haa yaꞌay kosi gu hhawatee
18 Yaꞌay gu hhawatee gu Nuuhu gwaay ca⁄ee safiinago niĩ, Seemu, Haamu haa Yafeeti. (Haamu naa taataa gu Kanaani.) 19 Hhaã naa yaꞌay tami gu Nuuhu gwaa laqwalee hida goõ gwaay qoomee khooroo sliimaage.
20 Tlubaykee giyaa ilii kereꞌedi, Nuuhu gi dooslimiisay tleehhidi, gi tlaatleesi doosla qaymoo, gigi daamisi pisagaroo da sabiibu. 21 Letu waka gi kitahhi buraa da sabiibu, gi ooniidi, da hheꞌesi gi qaati hari slaꞌay hemaa dosii. 22 Haamu, taataa gu Kanaani, gi arimi slaꞌay gu taataa gosi, gii ca⁄i hemaago, gi kaawa kay sa Seemu haa Yafeeti. 23 Da hheꞌesi Seemu haa Yafeeti gii oyri qayru, gigii tlaaꞌasiri kwahhu koinay, tay giĩ tooinaa ooyiri soomainge. Inay gi hada kayri hari amoo da khocu hari aluũ, gi ilacuuyri slaꞌay gu taataa gooina, tay ilaa koina giĩ bara waka khuꞌusiri, ma mayri arimaa slaꞌay gu taataa gooina.
24 Inkoo, qatlay Nuuhu giyaa ilii pisi oona dosaa, hingigi baraslay haa gi caahhi nankosi gu yaꞌaycataa, idoo giyaa laqi. 25 Ina gi kaay tuba,
“Kanaani dugu ilawaasiye!
Ina ti tongimoo gu didiru tleehhidiye,
ba⁄ay da tongee da Seemu haa Yafeeti.”
26 Kara gi kaay tuba,
“Dugu daareesiye Taataa Iliitleemu gu Seemu!
Kanaani tongimoo gu Seemu tleehhidiye.
27 Iliitleemu hiitlakhweesiye laqwaloo da Yafeeti
haa digimi gu ibinaa dosi khoorooge,
ibiidiye sliimaa haa laqwaloo da Seemu.
Kanaani tongimoo gu Yafeeti tleehhidiye.”