Slakudaraa da maꞌay khoorooge
8
1 Iliitleemu gii slay Nuuhu, kuꞌunaanay haa makay goõ gwaa sliimaa waara haa ina safiinage. Baloo waka gi ya⁄abi caaqwa daqa maꞌay gwaa hacee hhapeege, maꞌay gi tlaatleesiri slakudaraa. 2 Hhaahhiyoo hhakira gu deni goó hhapee dahhee gi qatliri, tlubaykee see gwaa tlubu, tlawa naani cihhidi pahha rawgo, gi kereꞌedi. 3 Maꞌay gi ilakoniri slakudaraa aslaaꞌamee khoorooge. Asunkuilee, qatlay daa ilii day baloo da miyaa leẽ haa mibeeri kooani, maꞌay gi slakudiri hari khisla. 4 Sa gimbakee, qatlay daa ilii day baloo da mibi haa fanqu, slehheẽ gu fanqu, safiina gii ibiti rawaa gu omeeri gu Araraatige. 5 Maꞌay gi ilakoniri slakudaraa aslaaꞌamee, baloo da pandaa da slehheẽ gu mibi naqatloo, cinaanaa gu omeeri wakinay digigi arimi.Nuuhu ya⁄abaraa da khwankhwaraariya haa tlabiya
6 Qariqaaqari daa ilii cati balalu mibeeri cigahha wakinay, Nuuhu gi afiiooyimi qambariya da mucukira giyaa boo⁄imisi safiinage, 7 gi ya⁄abi khwankhwaraariya, yaa ki⁄idiiba safiinage, teesaaqay gi tlatlaydi taysi haa taysi, maꞌay yaati amoolee hiigoslo⁄iri khoorooge. 8 Kara gi ya⁄abi tlabiya, maay yuꞌuda kaydi maꞌay, bere hingii goslo⁄iri. 9 Teesaaqay see, tlabiya yaa antiiba daqa da ilii ibiida, sa gimba maꞌay yaa kahhiyay yaa wanay hhapee gonge. Teꞌesii, tlabiya yaagi tosaa ki⁄idi daqa Nuuhuge waꞌay gu safiinage. Nuuhu gi tafaꞌasi daba gosi gi ooy tlabiyatee, gigii daasi waꞌay gu safiinage. 10 Nuuhu gi baqadi balalu fanqu wakinay, da hheꞌesi gi ya⁄abi kara tlabiyatira safiinago. 11 Qatlay tlabiyatee giyaa ilii ki⁄idi daqa Nuuhuge hari khwayaiĩ, yuꞌudiyaa, gigi arimi tlabiya yaa khocidi, yaa konta loo⁄iya da naa⁄a da khaimoo gu seyituuni afa gosii. Teꞌesii Nuuhu ginaa ilii caahhi tuba, maꞌay hiĩ slakudiri khoorooge. 12 Ina gi baqadi balalu fanqu wakinay, kara gi ya⁄abi tlabiyatee, letutee tlabiya yaa ki⁄idiiba daqa Nuuhuge.
13 Qatlay Nuuhu giyaa ilii kone koraraa miyaa lahhoꞌo haa leẽ, baloo da pandaa da slehheẽ gu pandaa, maꞌay yaa hheꞌesiri yaa hiigoslo⁄iri khoorooge. Da hheꞌesi Nuuhu gi tlaaꞌasi qambariya da mucu gu safiina, gi arimi, kaslenkwaa hhapee da kaaruu. 14 Baloo da mibeeri cada haa fanqu da slehheẽ gu cada, maꞌay gwaa khoorooge waaree yaa hheꞌesiri hiigoslo⁄a sumuku.
15 Iliitleemu gi kaay sa Nuuhu tuba, 16 “Ca⁄aayu safiinago, ugu sliimaa haa hadee doogu, yaꞌay koku haa tigay koina. 17 Kara ca⁄asii idadu hhakee goõ gu koomee slafimaa gu sliimaa waaree haa ugu, cira⁄oo, kuꞌunaanay, makay haa khulukhumbay goõ goó hhumbaada hhapeege, ma laqwaliri haa may roogidiri hari khisla khooroo sliimaa.” 18 Inkoo, Nuuhu yaagii ca⁄i safiinago sliimaa haa hadee dosi, yaꞌay kosi haa tigay koina. 19 Kuꞌunaanay haa makay goõ, khulukhumbay goõ goó hhumbaada hhapeege haa cira⁄oo goõ, idadu hhakee goõ gu slafee yaagii ca⁄iri safiinago slaaslaqasaraa da motoliya dooinay, hingati sirakomamidiri lelee lelee.
Nuuhu haysaraa sadaaka sa Iliitleemu
20 Nuuhu gi tleehhi masabaahu da tle⁄eẽ sa Taataa Iliitleemu. Da hheꞌesi gii leehhi daqa makay haa cira⁄oo daraay boo⁄odi haysaraa saadaaka, daa ⁄imbi ha Iliitleemu, gigi da⁄i rawaa gu masabaahuteesii. 21 Taataa Iliitleemu gi ⁄imbi sadaaka da Nuuhu haa dugugi muunaboo⁄eesi ha tafu gu sadaakatee. Ina gi kaay muuna gosii tuba, “Etaa, hhapee haga kara ilawaasaaba, sa gimba gu hida, gimati ilahudaa haa yondu gooina see guti tlaku taysaa daaqauumaa dooinaa. Gu lou, hhamisaaba kara khulukhumbay goõ gu kooma slafimaa, gaa ilii yondiidi gooay.
22 Qomay sliimaa khooroo gi ilii ibite,
qatlay gu daamisuu haa gu buꞌuruu,
gu caaqwa haa hameeriya,
gu madeẽ haa ageẽ,
tleemaa haa amasii, etaa, gonkoinaa hiifaakiyaaiiba.”