Ilawa⁄iya da didiri
7
1 Da hheꞌesi, Taataa Iliitleemu gi kaay sa Nuuhu tuba, “Dayii waꞌay gu safiinage ugu haa hida goõ gu aya googu, sa gimba tla⁄aã gu hida sliimaage, ugu kilesi guniĩ arimi konta ibinaa daa tafaꞌadi pandaa dooii. 2 Oyii makay goõ paslaapasloo fanqu fanqu guray boo⁄ee hadisaraa sadaaka daa ⁄imbi ha Iliitleemu, gu hhawatee haa gu tigay. Slime oyii makay goõ paslaapasloo cada cada hhakee daaba ⁄imba ha Iliitleemu sa sadaaka, gu hhawatee haa gu tigay. 3 Kara oyii cira⁄oo goõ paslaapasloo fanqu fanqu, da hhawatee haa da tigay, ma ilakonti ibinaa khoorotii. 4 Qariqaaqari balalu fanqu giyoo ilii buꞌudiyee, haraa khaw khoorotii tlubay balalu mibeeri cigahha tleemaa haa amasi. Idadu sliimaa giĩ tleehhi khoorotii, hagiti hhamisa.”Nuuhu itatiisa da Iliitleemu
5 Nuuhu gi yondiidi gimba sliimaa, idoo dugwaa ilii ilafahhi gooay ha Taataa Iliitleemu. 6 Qatlay ilawa⁄iyatee giyaa iliica⁄adi khoorooge, Nuuhu yaa kona koraraa miyaa lahhoꞌo. 7 Nuuhu, hadee dosi, yaꞌay kosi gu hhawatee haa tigay koina gii guniri safiinage, may tlintiꞌiri ilawa⁄iyatee. 8 Makay sliimaa daa ⁄imbi haa daa ⁄imbiiba ha Iliitleemu sa sadaaka, cira⁄oo haa khulukhumbay goõ goó hhumbaada, 9 gu hhawatee haa gu tigay yaagi khayri cada cada daqa Nuuhuge, gii guniri safiinage, idoo Iliitleemu giyaa ilii ilafahhi gooay Nuuhu. 10 Balalu fanqu giyaa ilii buꞌudiri, maꞌay gu ilawa⁄iyatee gi tlaatleesiri ilacuuwa khooroo goõ.
Hhamaraa da idadu goõ
11 Nuuhu giyaa ilii kone koraraa miyaa lahhoꞌo, baloo da mibi haa fanqu da slehheẽ gu cada, letutee daganaa asu ilii kaꞌadi maꞌay gu hhaahhiyoo goõ gu deni, goó waꞌay gu hhapee dahhee. Tlubay gi tlaatleesi tlubaaraa, tlawa naani cihhidi pahha rawgo, maꞌay gi ilawa⁄iri. 12 Tlubaykee gi tlubi balalu mibeeri cigahha khoorotii tleemaa haa amasi.
13 Balotee tlubay giyaa ilii tlaatleesi tlubaraa, Nuuhu haa hadee dosi, yaꞌay kosi Seemu, Haamu haa Yafeeti sliimaa haa tigay koina, yaay guniri safiinage. 14 Inay yaa sliimaa wanay haa makay haa kuꞌunaanay paslaapasloo, khulukhumbay paslaapasloo goó hhumbaada haa cira⁄oo paslaapasloo da koomee hhababeeraa. 15 Khulukhumbay goõ cada cada gu kooma slafimaa, yaagi khayri daqa Nuuhuge haa gii guniri waꞌay gu safiinage. 16 Idadu goõ gu koomee slafimaa, gwaay guumee safiinage, yaati gu hhawatee haa gu tigay, Iliitleemu pahha idoo giyaa ilii ilafahhi Nuuhu. Da hheꞌesi Taataa Iliitleemu gii pingisi afamaraa gu safiina.
17 Ilawa⁄iyatee gi ilakonti balalu mibeeri cigahha khoorooge, kara maꞌay gi ilakoniri hiiroogida, gii tlaysiri safiina rawaage loii. 18 Maꞌay gi ilakoniri hacaraa hari khisla khoorooge, safiinatee gi hhangaraaꞌamiti rawaa gu maꞌayge. 19 Maꞌay hhakee giyaa ilii ilakoniri hiiroogida hari khisla khoorooge, gi ilacuuyri omeeri goõ gu tledi gu khooroo, 20 omeeri hhakee digaati amoolaa hiicati dabaiĩ cigahha haa nusuu.a 21 Khooroo sliimaage idadu goõ gu koomee slafimaa digigi hhamisi. Cira⁄oo, kuꞌunaanay, makay, khulukhumbay wakinay haa hida goõ digaati hhamisi. 22 Idadu sliimaa gu koomee himpoo da slafimaa rawaa gu hhapeege, gi kaka⁄iri. 23 Maꞌaana Iliitleemu yaa taqay hhamisi idadu sliimaa gu koomee slafimaa khoorooge: hida, kuꞌunaanay, makay, khulukhumbay goó hhumbaada haa cira⁄oo, goõ digigi hhamisi. Nuuhu kilesi naati ba⁄ami, hida kosi haa idadu hhakira gwaa sliimaa waaree haa ina waꞌay gu safiinage. 24 Maꞌay hhakira gu ilawa⁄iya gi ilacuuyri khooroo balalu miyaa leẽ haa mibeeri kooani.