Tlakwaroo da hida
6
1 Qatlay faadoo da hida giyaa ilii tlaatleesidi hiiroogida khoorooge haa gi laqwaliri yaꞌay gu tigay, 2 qaraiya da Iliitleemua gi aniri sagameerukee gu hhoi, inay gii lehhidiri sagameeru giyaa slaiyee, gigi khabiibiniri. 3 Teꞌesii Taataa Iliitleemu gi kaay tuba, “Muuna gooi ibiidiyaaba daqa hidage koraraa haa koraraa goóba hiifaakoo. Maꞌaana inay ti hida kilesi kwanda gi kaka⁄iyee. Inkoo, balalu gu ibinaa dooina hiicatiyaaiiba koraraa miyaa leẽ haa mibeeri cada.”4 Qaraiya da Iliitleemu giyaa ilii khabiibinti sagameeru gu hida, gi laqwaliri yaꞌay haa inay, Wanefiilib yaa wanay khoorooge qatlaykeesii, slime balalu gwaa sirakomeege. Hida hhanki Nefiili yaa konay ⁄uuru, kara digaa khui hari khisla qatlaykeesii gu wakaꞌalee.
5 Taataa Iliitleemu gi arimi tlakwaroo da hida khoorooge tuba, ti ilaqincida hiiroogimidu. Kara, qatlay sliimaa hida gi ilaqinciri koomaraa ilahudaa gu tlakwi kilesi muunaiĩ koinay. 6 Taataa Iliitleemu gi kaay ina lenkosi tuba, “Hida giyaa soꞌoy tleehhiyaa khoorooge?” Kara muuna gosi gi slahhaai hari khisla. 7 Inkoo, Taataa Iliitleemu gi kaay tuba, “Ha hhamisa hida hhanki goõ giyaa tleehhi tiꞌii khoorooge, sliimaa haa kuꞌunaanay, makay, khulukhumbay goó hhumbaada haa cira⁄oo, sa gimba muuna gooi hiĩ slahhaai, hida giyaa soꞌoy tleehhi.” 8 Teesaaqay see, Nuuhu gi slay hhoinay gu didiru pandaa da Taataa Iliitleemuge.
Iliitleemu ilafahharaa da Nuuhu ma boo⁄imisi Safiina
9 Hiĩ na catimisu gu laqwaloo da Nuuhu. Nuuhu yaati heedi gu kooma ibinaa da hhoi daa tafaꞌadi. Qatlaykeesii yaati heedi gu ina lenkosi khoorooge, gwaaba tlakwaroo pandaa da deneꞌee kosii. Ina gi ibiidi, ibinaa da ilaciyaa da ilagaasaraa haa Iliitleemu haa gwaati iliipaꞌaaꞌana hari khisla. 10 Nuuhu yaa yaꞌay tami kona, Seemu, Haamu haa Yafeeti.
11 Qatlaykeesii, Iliitleemu gi arimi hida sliimaa khoorooge hiĩ tlakwaakwayri, kara hinti caꞌabasluumidiri. 12 Iliitleemu gi arimi khooroo, gu lou idoo giyaa ilii hacidi tlakwaroo hari khisla, sa gimba hida sliimaa yaati yondimaamidiyay gimba goõ gu tlaku. 13 Sa gimbakee gi kaay sa Nuuhu tuba, “Haã kaay, hagi hhamisa hida goõ khoorotii, sa gimba khooroo sliimaage hida yaati haciri caꞌabasluuma, tay hingi tooinaa ilaqaꞌadiyay. Gu lou, hagi hhamisa hida goõ sliimaa haa khooroo.
14 Inkoo, boo⁄imisi safiinac hari bangasay gu khaimoo gu kooma ceemiya. Slime kereꞌemisi waaeerii waꞌay kosii, goo hheꞌeside lagi na⁄amisida haa gi khwancimisida hari munda⁄aay waꞌay haa khooroo. 15 Safiinatee laga taqay boo⁄imisida, tlederuũ kosi dabaiĩ mibeeri miyaa leẽ haa mibeeri kooani, hiitlakhwaruũ kosi dabaiĩ mibeeri cada haa kooani haa qadoo dosi dabaiĩ mibi haa kooani. 16 Safiinatee lagati tleehheda gorofaad tami da kooma afamaraa leẽ gu didiru tluntlubaage. La tleehheda pembee, goo hheꞌeside la mayda mucu guy catisa cencee ilakhuaraa da tla⁄antla⁄a da daba gu bi⁄inaa gu gorofaa da rawaa haa pembee.
17 Yuꞌudiyaa, ana haa ya⁄aba khoorotii tlubay gu kooma ilawa⁄iya da hhamisa idadu sliimaa gu koomee slafimaa. Idadu sliimaa khoorooge kaka⁄iyay sumuku. 18 Teesaaqay see, ana ha qaasa ila⁄imbidu haa ugu. Ugu hay daada safiinage sliimaa haa hadee doogu, yaꞌay koku gu hhawatee haa tigay koina, magi ilabuꞌumi. 19 Kara lay guumisida waꞌay gu safiinage idadu goõ gu slafee cada cada, hhawata haa hadee, magi ilabuꞌumi sliimaa haa ugu. 20 Cira⁄oo goõ paslaapasloo cada cada, makay haa kuꞌunaanay goõ paslaapasloo cada cada, haa khulukhumbay goõ paslaapasloo cada cada goó hhumbaadee, yaa khayay daqa dooguu, magii guumisidi, ma mayri hhamaraa. 21 Slayii, la hubita haa laqaasida ⁄agoo paslaapasloo da buꞌudisa hida gu aya googu haa idadu goõ gu waaree safiinage.”
22 Nuuhu gi teesaaqay laqi loi, idoo dugwaa ilii ilafahhi gooay ha Iliitleemu.