Kayiini haa Abeeli
4
1 Adaamu hirigi gui hadee dosi Haawa, gi tosaa gii loaydi. Qatlay giyaa ilii daadi naw, girigi aydi uma na Kayiini,a ina gi kaadi tuba, “Haã laqwali naw hari iliiawaraa da Taataa Iliitleemu.” 2 Qariqaaqari gi kara hiidaadi naw, gurigi aydi uma na Abeeli, hhia gosi gu coko⁄u gu Kayiini.Qatlay giyaa ilii dinaraarayri Abeeli gi deꞌemiisay tleehhidi, kara Kayiini gi doosliimiisay tleehhidi. 3 Asunkuilee, baloo waka, Kayiini gi hadisi daqa Taataa Iliitleemuge sadaaka da baruũ gu qaymoo dosi. 4 Kara, Abeeli see gii oy bee⁄u gu badiisasaa raqa dosaa, gi hadisi sadaaka sa Iliitleemu daqeemoo gu fuꞌumay gwaa wahhaahhaadee. Taataa Iliitleemu dugugi muunaboo⁄eesi ha Abeeli sliimaa haa sadaaka dosi. 5 Gimati teesaaqay see, dugwaa muunaboo⁄eesiiba ha Kayiini sliimaa haa sadaaka dosi. Sa gimbaki Kayiini gi slahhaai hari khisla, pandaa dosi gii quuraafiti sa slahhaaꞌamee. 6 Da hheꞌesi Taataa Iliitleemu gi kaay sa Kayiini tuba, “Ti naraꞌaaba slahhaaꞌaraa hari khisla haa gi pandaa hiiquuraafita teesaaqay! 7 Gu lou, bere yondita hhoinay, dugu ⁄imbi! Kara, bere yonditaaba hhoinay, tlakwaroo ilaciyaage loii wanta gu slaꞌada tawaaliru. Teesaaqay, duguti slai ugu, maga kaba⁄adi.”
Kayiini gaasaraa da Abeeli
8 Baloo waka, Kayiini gi kaay sa hhia gosi Abeeli tuba, “Poo qaymooge.” Qatlay giyaa ilii qaymooge wanee, Kayiini gi iliitlo⁄osi hhia gosi Abeeli, gugi difi gwaati amoolee gaasi. 9 Da hheꞌesi Taataa Iliitleemu gi maasi Kayiini tuba, “Hhia googu Abeeli kaale wana?”
Kayiini gugi ilaki⁄isi tuba, “Khuaaba. Inkoo, ana nugoó ga⁄awaa hhia gooi gu coko⁄u?” 10 Taataa Iliitleemu gi kaay sa Kayiini hari iliimaahha tuba, “Hanti malee laqadi? Itatiisi! Ceedee da hhia googu gaã tuutuqudi, hinaa ilii⁄aa⁄ii⁄iminta hhapeego.
11 Inkoo, ugu duguũ ilawaasi hhapeege! Sa gimba dabaiĩ koku hiĩ tlufuꞌusiri hhapee hari ceedee da hhia googu gu coko⁄u, diĩ tuutuquti daqa guũ ilii gaasidi. 12 Ugu, bere ha dooslida hhapee, sugu kara qaydaaba buꞌuruu gu hhou. Kara ti heedi goó loloyma tleehhita guba daqa lensee da ilii ibinaa khoorotii.”
13 Kayiini gi kaay sa Taataa Iliitleemu tuba, “⁄agitiruki guti didiru hari khisla, haguy dahhasaaba hiikaasaraa. 14 Yuꞌudiyaa, letuti niĩ gusinti hhapee da koomago ⁄uuru, hanguti yakwa kaw segenge haa pandaa doogu. Inkoo, hati heedi goó bahhangaruusa tleehhida guba daqa da hhoi da ilii ibinaa khoorotii, kara heedi gunoó arima, hini gaasi.”
15 Inkoo, Taataa Iliitleemu gi ilaki⁄isi Kayiini tuba, “Suti teesaaqay gooba, bere heedi gaasi ugu, hiislarakhasa ⁄imbu waa fanqu daqa dosii.” Da hheꞌesi Taataa Iliitleemu gi ilii qaasi chapaa Kayiini, chapatee ma laqanti tuba, heedi gu arima ina kitlaku gu hhanti gaasi. 16 Da hheꞌesi Kayiini gi looy segenge pandaa da Taataa Iliitleemugo gi ibinaa kay hhapee da Noodige,b dari bara da ilacindoo gu rawaa gu Edeeni waara.
Kayiini haa laqwaloo dosi
17 Kayiini hirigi gui hadee dosi, gi tosaa gii loaydi, gii daadi naw girigi aydi na Enooki. Qatlaykeesii Kayiini yaa tlehhaahhidi yaamu, yaamu hhakee girigi ay na Enooki, uma gu nankosi. 18 Enooki giyaa ilii diiray, gi laqwali ⁄iraadi, ⁄iraadi gi laqwali Mehuyaeeli, Mehuyaeeli gi laqwali Metusaeeli, kara Metusaeeli gi laqwali Lameeki.
19 Lameeki ginaa ilii khabimi tigay cada, hadee da gere⁄iya uma gosi naa Aada, da cadii naa Siila. 20 Aada gi laqwalidi Yabalii, hiĩ naa okookoo gu deꞌemiisee da kuꞌunaanay daa ibimaamida hemamuuge. 21 Hhia gosi gu coko⁄u gu Yabali naa Yubalii, ina naa okookoo gu mu⁄udiisee goõ gu pandaqway haa firimbii. 22 Siila slime gi laqwalidi naw na Tubaali-Kayiini, hiĩ gwaa sapidiisay gu idadu paslaapasloo gu ⁄aray haa sikhimi. Hhioo dosi da Tubaali-Kayiini uma gosi naa Naama.
23 Lameeki gi kaay sa tigay kosi tuba,
“Aada haa Siila, itatiisa gimba gooi naraꞌa.
Haã gaasi heedi gunii ilaqau.
24 Bere Kayiini suguy hiislarakhasi ⁄imbu waa fanqu,
gu lou, ana ti waa mibeeri fanqu haa fanqu.”
Seeti haa Enoosi
25 Adaamu hirigi gui kara hadee dosi Haawa, gi laqwalidi naw, gurigi ayri uma na Seeti,c kakanta tuba, “Iliitleemu niĩ ⁄aafi, siniĩ hadisi naw waku daqa da Abeeli, daa gaasi ha Kayiini.” 26 Slime Seeti gi laqwali naw, gurigi ay uma na Enoosi. Qatlaykeesii hida ginaa ilii tlaatleesiri firoo Iliitleemu hari uma gosi gu Taataa Iliitleemu.