Huuaraa da hida tlakwarooge
3
1 Inkoo, deesu naa cirihhi hari khisla ba⁄ay da makay goõ daa tleehhi ha Looimoo Iliitleemu. Letu waka deesu gi maasi hari cirihhimaa hadetee tuba, “Guti louu, Iliitleemu yaa kaay tuba, ‘Hhanti ⁄agintay ⁄aamu gu khaimoo lensee qaymotaa?’ ”2 Hadetee gi ilaki⁄isidi deesu tuba, “Teesaaqay gooba, hiidahhasana ⁄agoo ⁄aamu gu khai gu qaymotii waaree. 3 Gu lou, Iliitleemu sandaati kaay tuba, ‘Hhanti ⁄agintay ⁄aamu gu khaimoo gu tla⁄aã gu qaymotii waara ma nangusa see hhanti koisiday sumuku, hhanti kaka⁄aday.’ ”
4 Teꞌesii, deesu gi kaay sa hadetee tuba, “Coko⁄o see, kaka⁄adaaiiba! 5 Iliitleemu yaati kaay teesaaqay, sa gimba khui bere ⁄agintay ⁄aamu gu khaimokee, ilaa kokuna digi tlaaꞌasi, unkuray see ha Iliitleemu pahha tleehhitay, hagi caahhaaday hhoinay haa tlakwaroo.”
6 Teꞌesii hadee giyaa ilii anti tuba, ⁄aamu gosi guti hhou ⁄agooge haa khaimokee haraay boo⁄i ilaage, kara kona hiidahhasa hari khawaraa da waaway, gi buꞌudi ⁄aamu gu khaimokee, gi ⁄aginti. Slime gi hadisidi sa hhawata gosi, gwaa sliimaa waara haa ina, ina see gi ⁄agimi. 7 Da hheꞌesi, teꞌesii ilaa koina digigi tlaaꞌasi, hingigi caahhiri tuba, hari slaꞌay wanay, gi ariniri ilamuree. Teesaaqay, gi ilanuunuꞌumisiri loo⁄oo day tlakhwi da ⁄ancimoo, gi ila⁄utlidiri, ma ilacuuyri slaꞌay gooina.
8 Hari khwayaiĩ Adaamu haa hadee dosi gi akhasiri cagafimisu gu yeꞌeeroo gu Looimoo Iliitleemu khookhocina qaymoteesii, gi tlaꞌamuumuudiri, gi nahhamidiri khaige, digima may arimaa. 9 Teꞌesii, Looimoo Iliitleemu gi eteedi Adaamu tuba, “Kaale wanta?”
10 Ina gi ilaki⁄isi tuba, “Haguũ akhasi khookhocinta qaymooge, hagi tlaꞌamuudi haa gi nahhadi, maꞌaana hari slaꞌay waara.”
11 Taataa Iliitleemu gugi maasi tuba, “Ha miyaa suguũ kaay tuba, hari slaꞌay wanta? Mala! Baku haã ⁄aginti ⁄aamu gu khaimoo, gwaa ilakaay ugu ambee, ‘May ⁄agoo?’ ”
12 Adaamu gi ilaki⁄isi tuba, “Hadeti sinaa hadisidi, ma ibiti sliimaa haa ana, na siniĩ hadisidi ⁄aamu gu khaimoki, ana gi ⁄agimi.”
13 Teꞌesii Looimoo Iliitleemu gigi maasi hadetee tuba, “Igi, hanti malee laqadi?”
Hadetee gi ilaki⁄isidi tuba, “Deesu naay cori ana, gi ⁄agimi.”
14 Da hheꞌesi, Looimoo Iliitleemu gi kaay sa deesu tuba,
“Sa gimba haã yonditi teesaaqay,
ugu kilesi dugunii ilawaasi tla⁄aã gu kuꞌunaanay haa makay goõ!
Hati hhumbamita hari guraꞌa googu,
haa ceceiya gani ⁄aginta, balalu sliimaa gu ibinaa doogu.
15 Kara ana qaasa kiiraa tla⁄aã googunay,
ugu haa hadetee, slime tla⁄aã gu laqwaloo dooguu haa laqwaloo dosi.
Ina tlupi saga googu, ugu see gu goꞌosida gobina gosi.”
16 Iliitleemu gi kaay sa hadetee tuba,
“Sigii roogisa hari khisla ba⁄adaa qatlay gu hiidawaraa doogii,
hari slahhaaꞌamee da dihhi ha laqwalida yaꞌay.
Kara slahhaahhaau googi yoó daqa hhawata googii wanay,a
gimati teesaaqay see ina gi tawaalina.”
17 Gi kaay sa Adaamu tuba, “Sa gimba haã itatiisidi gimba gu hadee doogu, gi ⁄aginti ⁄aamu gu khaimoo gwaa tlaatlahhasi ambee, ‘Hhanti ⁄aginta ⁄aamu gu khaimoki,’
hhapee dagaã ilawaasa sa dakoo doogu.
Hari yondu gwaa karahhu slayda ⁄agoo hhapeego
balalu sliimaa gu ibinaa dooguu.
18 Hhapee tiꞌidisida leqeewaa haa ubaayee sa ugu,
kara naanu gu qaymamuu guni ⁄aginta.
19 Hari cufa doogu ⁄aginta ⁄agoo,
qatlaykaꞌa naqatloo gamaa ilii ki⁄ide tipa dugwaa ilii tleehhigo,
maꞌaana ugu ti ceceiya ha ceceiyage ki⁄ida.”
20 Adaamu harigi ay hadee dosi uma na Haawa,b sa gimba ina na iyoo da hida goõ tleehhita. 21 Looimoo Iliitleemu gi boo⁄imisi qayroo gu faloo sa Adaamu haa hadee dosi, gigi ila⁄utlidimisi.
22 Looimoo Iliitleemu gi kaay tuba, “Yuꞌudiyaa! Hari amoo da caahharaa hhoinay haa tlakwaroo, Adaamu hiĩ dandiray pahha tleehhidi. Inkoo, sugu hhanti hadisi mucu gu ⁄amuusa haa ⁄agoo ⁄aamu gu khaimokee gu slafimaa, yoó ba⁄ati ibiidi koraraa goóba hiifaakoo.” 23 Teesaaqay, Looimoo Iliitleemu gi gusimi segenge Adaamu haa hadee dosi qaymoteesaa da Edeenigo. Ina gigi leehhisi hari bara waka da hhapee, Adaamu ma doosla kay hhapetee dugwaa ilii tleehhigo. 24 Qatlay Iliitleemu giyaa ilii hheꞌesi gusiruu inay qaymoteesaa, gi qaasi malayika, uma gooina na makeruubi hari bara da ilacindoo gu rawaa gu qaymotee. Kara gi qaasi teꞌesii pangaa gwaa ooyiiyima aslaa, tay yaa tosaa niini⁄ii⁄imidi haa hiicaaꞌaaꞌamisi bareemoo sliimaa, ma ga⁄ayri amoo daa hada kakaakawa khaimokeesii gu slafimaage.