2
1 Teesaaqay daganaa ilii tleehhi raw haa khooroo haa idadu sliimaa gu waaree, digigii gaasi.Baloo da fanqu Iliitleemu gii fiifisi yondu
2 Iliitleemu giyaa ilii faakisi yondu gosi goõ gu tlehhinay, baloo da fanqu gii fiifisi yondu gosaa. 3 Gi ⁄aafi baloo da fanqu haa gigi tlintiꞌisi, sa gimba giyaa ilii hheꞌesi balalu lahhoꞌo gu tlehhinay, Iliitleemu gii fiifisi baloo da fanquge.
Adaamu haa Haawa qaymoo da coko⁄ige da Edeeni
4 Hiĩ na catimisu gu tleehhinay gu raw haa khooroo.
Qatlaykeesii Looimoo Iliitleemu giyaa ilii tleehhi raw haa khooroo, 5 daa wanaaba sluufimoo lensee gwaa ilanihhu rawaa gu hhapeege, sa gimba Looimoo Iliitleemu haraa kahhi khaymuu tlubay hhapeege. Kara yaa hhaku heedi gu doosla hhapee. 6 Maꞌay yaay cacaaca⁄iyay hhapeego haa yaa naa⁄asiri hhapee goõ. 7 Teꞌesii, Looimoo Iliitleemu yaa tleehhi hhawata tipago haa gii fahhi himpoo dosi da slafimaa urungaage, teꞌesii gi heedi gu kooma slafimaa tleehhidi.
8 Kara, Looimoo Iliitleemu yaa tiꞌidisi khai qaymoo da coko⁄ige, daqa daa eteediidine na Edeeni,a hari bara da ilacindoo gu rawaa gu hhapee, teꞌesii gi qaasi hhawatakee giyaa tleehhi. 9 Qaymoteesii da Edeenige Looimoo Iliitleemu yaa tiꞌidisi khai paslaapasloo, khai guraay boo⁄ee ilaage, kara yaa bobo⁄ii⁄inay ⁄aamu gu cuua ⁄agooge. Tla⁄aã gu qaymoteesii da coko⁄ige da Edeeni, daa wana khaimoo gu slafimaa haa khaimoo gu caahharaa hhoinay haa tlakwaroo.b
10 Slime yaa wana duudu yadaa Edeenigo, gwaa gumagaaguuma maꞌay gu ilii tuutuquru qaymotee da coko⁄i. Teꞌesaa duudukee hingigi deehhimi, gi duududaa cigahha tleehhidiri. 11 Uma gu duudu gu pandaa na Pisooni, naa niini⁄imidi hhapee goõ da Hafiila da kooma sahaabu. 12 Sahaabu da hhapetee da hhoi hari khisla.c Kara taysi wanta du⁄iya da kooma tafu gu cuua, doó eteedine bedoola haa tle⁄eẽ goó wanqee, doó eteedine sohaamu. 13 Uma gu duudu gu caduu na Gihooni, gwaa niini⁄idu hhapee goõ da Kuusi.d 14 Uma gu duudu gu tamii na Tigiriisi goó guuma hari bara da ilacindoo gu rawaa gu hhapee da Asuuru. Kara duudu gu cigahhii na Efuraati.
15 Looimoo Iliitleemu giyaa ilii qaasi heedikee qaymoteesii da Edeenige, ina yaati slai magi doosli haa magi ga⁄ay. 16 Qatlaykeesii Looimoo Iliitleemu gi ilakaay heedikee tuba, “⁄agimi tlaꞌamee see hhaka ⁄aamu gu khai sliimaa qaymoteesii. 17 Inkoo, etaa, ⁄aamu gu khaimoo gu caahharaa hhoinay haa tlakwaroo, hagu hhanti ⁄aginta, sa gimba qatlay gamaa ilii ⁄aginte ⁄aamukee gu khaimokee, gu lou hamaa gwaꞌata!”
18 Looimoo Iliitleemu gi kaay tuba, “Ti naraꞌaaba hhawataki, ma ibiidi ina lenkosi. Inkoo, sugu tleehha heedi gu buꞌudisa ina iliiawaraage.” 19 Ina gi tleehhi tipago, makay goõ haa cira⁄oo goõ. Looimoo Iliitleemu, giraagi khay daqa Adaamugee ma caahhi giri umaiĩ mala aꞌay. Umaiĩ giraa aꞌay makay haa cira⁄otee, gi umaiĩ koina loi tleehhidiri. 20 Teꞌesii, Adaamu hirigi aꞌay umaiĩ kuꞌunaanay, makay haa cira⁄oo sliimaa.
Kara, yuꞌudiyaa daa slay ba heedi gu buꞌudisa iliiawaraa Adaamu. 21 Inkoo, Looimoo Iliitleemu hiraagi khay sa Adaamu guꞌudee day looi. Qatlay giyaa ilii guꞌudeege wane, Iliitleemu gugi afabaci slabi gosi leẽ haa gi na⁄asi daqatee hari fuꞌumay. 22 Da hheꞌesi, slabikee giyaay oyi daqa Adaamugo, Looimoo Iliitleemu gugi hadee tleehhidisi, giraagi khay daqa Adaamuge.
23 Asunkuilee, Adaamu gi kaay tuba,
“Kaslenkwa! Haã ti faraã daqa fararu koaa,
kara ti fuꞌumay daqa fuꞌumay koaa.
Haã dagati eteedi na hadee,
sa gimba yaa daqa slababee gu hhawata dahhada.”
24 Sa gimbakee, hhawata may taataa haa iyoo dosi, hingigi ilagaasi haa hadee dosi, teꞌesii inay cada koinaa yoóti slaqwa leẽ tleehhidiyay.
25 Adaamu haa hadee dosi gonkoinaa haraa slaꞌay wanay, ilamuree see giyaa ariniriiba.