Tlaatleesoo
Tlehhinay gu raw haa khooroo
1
1 Teꞌesii tlaatleesooge, Iliitleemu yaa tleehhi raw haa khooroo. 2 Qatlaykeesii khooroo yaati kontaaba kalay, gimati idoo lensee yaa kontaaba. Kara khooroo goõ dagaati ilacuuy ha slagweedaa gu maꞌay ⁄oonage. Teꞌesii, Muuna gu Iliitleemu yaa wana, yaatii qomaaqona haa yaati tlakhaakhamidi rawaa gu maꞌayge.Baloo da leẽ: Cencee
3 Iliitleemu gi kaay tuba, “Da wane cencee.” Cencee yaagi khaydi. 4 Iliitleemu gi arimi tuba, cencee da hhoi. Teꞌesii gii deehhi cencee haa ⁄oona. 5 Gi eteedi cencee “Tleemaa,” ⁄oona gigi eteedi “Amasi.” Dagii khwayauudi, dagi heetlawaa tleehhidi, baloo da leẽ.
Baloo da cada: Raw
6 Iliitleemu gi kaay tuba, “Da wane mucu, maꞌay gu raw haa maꞌay gu hhapee, ma digii deehhi.” 7 Iliitleemu gi tleehhi mucukee, gii deehhi maꞌay guri rawaa kosi waaree haa maꞌay guri biraa kosi waaree. Dagi teesaaqay tleehhidi. 8 Gi eteedi daqatee, “Raw.” Dagii khwayauudi, dagi heetlawaa tleehhidi, baloo da cada.
Baloo da tami: Hiica⁄araa da Sluufa Hhapeego
9 Iliitleemu gi kaay tuba, “Maꞌay gu biraa gu rawge waaree hiikurunkuridiyee sliimaa, damaay ca⁄i hhapee da kaaruu.” Dagi teesaaqay tleehhidi. 10 Iliitleemu gi eteedi hhapee da kaaruu “Khooroo,” hiikurunkurimidu gu maꞌay gigi eteedi “Tlawa da didiri.” Ina gi arimi tuba, idadu hhanki gonkoinaa ti hhoinay.
11 Da hheꞌesi, Iliitleemu gi kaay tuba, “Hhapee tiꞌidiside sluufa haa baruũ goõ gu kooma pisagaroo. Kara hiica⁄aside khai gu boo⁄ee ⁄aamu gu kooma pisagaroo, baruũ sliimaa haa khai sliimaa, idoo paslaapasloo gi ilii slaqamisiyee.” Dagi teesaaqay tleehhidi, idoo giyaa ilii kaay gooay. 12 Hhapee gi tiꞌidisidi sluufa, baruũ goó laqwala pisagaroo, idoo paslaapasloo gi ilii slaqamisiyee, haa khai goó boo⁄ee ⁄aamu gu kooma pisagaroo, idoo paslaapasloo gi ilii slaqamisiyee. Iliitleemu gi arimi tuba, idadu hhanki gonkoinaa ti hhoinay. 13 Dagii khwayauudi, dagi heetlawaa tleehhidi, baloo da tami.
Baloo da cigahha: Letu haa Slehheẽ
14 Iliitleemu gi kaay tuba, “Da wane cencacuu daqa rawge, may deehhiri tleemaa haa amasi, ma laqaru gu diqimi paslaapasloo tleehhidiri, balalu haa koraraa. 15 Kara, na cencacuu tleehhidiyee rawge, may cencuudisiri khooroo.” Dagi teesaaqay tleehhidi. 16 Iliitleemu gi tleehhi cencacuu hhakee cada gu deni. Cencee da didiri may cencuudisidi tleemaa haa cencee da coko⁄i ma hiicencuudisidi amasi, slime gi tleehhi tica⁄eerii. 17 Gi qaasi cencacuu hhakee rawge, may cencuudisiri khooroo, 18 ma tawaaliniri tleemaa haa amasi, kara may deehhiri cencee haa ⁄oona. Iliitleemu gi arimi tuba, idadu hhanki gonkoinaa ti hhoinay. 19 Dagii khwayauudi, dagi heetlawaa tleehhidi, baloo da cigahha.
Baloo da kooani: Cira⁄oo haa Samaakii
20 Iliitleemu gi kaay tuba, “Tlawa da didiri hacide samaakii haa khulukhumbay waku gu slafa, kara raqoo wa⁄a gu cira⁄oo paslaapasloo tlayee daqeemoo goõ gu rawge.” 21 Inkoo, Iliitleemu gi tleehhi makay gu deni gu tlawa da didiri haa khulukhumbay goõ goó maꞌayge ibiida, gi hacisi tlawa da didiri, idoo paslaapasloo gi ilii slaqamisiyee. Kara gi tleehhi cira⁄oo goõ ilakhuukhuꞌusaraa haa idoo paslaapasloo gi ilii slaqamisiyee. Iliitleemu gi arimi tuba, idadu hhanki gonkoinaa ti hhoinay. 22 Teꞌesii gigi ⁄aafi, gi kaay tuba, “Khulukhumbay goõ goó maꞌayge ibiida, laqwala haa roogidaw, gi hacisiday maꞌay gu tlawa da didiri. Unkuray, cira⁄oo roogidaw khoorooge.” 23 Dagii khwayauudi, dagi heetlawaa tleehhidi, baloo da kooani.
Baloo da lahhoꞌo: Makay haa Heedi
24 Iliitleemu gi kaay tuba, “Hhapee hiica⁄aside idadu gu slafee ilakhuukhuꞌusaraa da idoo gi ilii slaqamisiyee, kuꞌunaanay, khulukhumbay goó hhumbaada hhapeege haa makay.” Dagi teesaaqay tleehhidi. 25 Inkoo, Iliitleemu gi tleehhi makay haa kuꞌunaanay paslaapasloo haa khulukhumbay goõ goó hhumbaada hhapeege, yaay ca⁄iyeei ilakhuukhuꞌusaraa haa idoo gi ilii slaqamisiyee. Iliitleemu gi arimi tuba, idadu hhanki gonkoinaa ti hhoinay.
26 Da hheꞌesi, Iliitleemu gi kaay tuba, “Tleehhanee heedi idoo ga ilii slanqasane dandiray, hagu tleehhanee kalay goori pahha, ma tawaalimi samaakii gu tlawa da didiri, cira⁄oo, makay, kuꞌunaanay haa khulukhumbay goõ goó hhumbaada khoorotii.” 27 Inkoo, Iliitleemu yaa tleehhi heedi gu ina loi slanqasa, gi tleehhi hhawata haa hadee. 28 Gigi ⁄aafi, gi kaay tuba, “Laqwala haa roogidaw, gi hacisiday khooroo, la qaasiday tawaaloo googunay. La tawaalintay samaakii gu tlawa da didiri, cira⁄oo haa khulukhumbay goõ goó khocee haa hhumbaadee khoorotii.”
29 Da hheꞌesi, Iliitleemu gi kaay tuba, “Yuꞌudiyaa, sanguũ hadisi baruũ goõ goó hiica⁄asa pisagaroo khoorotii sliimaa haa khai sliimaa goó boo⁄ee ⁄aamu gu kooma pisagaroo waꞌay kosii. Hatee na ⁄agoo dooguna tleehhita. 30 Inay see makay goõ gu khooroti, cira⁄oo goõ haa khulukhumbay goõ goó hhumbaada, maꞌaana makay haa khulukhumbay gu slafee, sanguũ hadisi baruũ goõ, ma ⁄agoo dooina tleehhiti.” Dagi teesaaqay tleehhidi. 31 Iliitleemu gi arimi idadu hhanki sliimaa giyaa tleehhi, gu lou gwaati hhoi hari khisla. Dagii khwayauudi, dagi heetlawaa tleehhidi, baloo da lahhoꞌo.