Malāngululo gha bhwene
2
Tukubha ughwe Tiito, ghwabha nolikulāngulula bhantu malāngululo gha bhwene. 2 Bhabhalile bhanabhaghoosi bhakekulu, bhabhe ^bhanakobhola kwijhughalalila, bhakanya masāla no bhutendeke. Kabhili, bhabhe bhatenda bhwene mu kwisigha kwabho, mu kutēha kwabho no mu kutuusya mwēgho kwabho.3 Teetyoe na bhanabhakeema bhakekulu, ghwabhalāngulula bhabhe na nsembo jhya kumutiikisya Kabhumba. Bhasibhi bhaghambanyi, bhasikolwi maalwa, bhalāngulule kwīla maghāmbo gha bhutendeke, 4 aleke bhabhe bhalikubhalāngulula bhanabhakeema bhahāla kutēha bhebhaabho na bhaana bhaabho. 5 Kabhili, bhakeema bhahāla, bhabhe ^bhanakobhola kwijhughalalila, bhabhe bhatendeke, bhakole milīmo mu ngo syabho, bhabhe bhantu bhasogha, bha kutiikisya bhebhaabho. Ghwabhalomba bhēele teetyo, aleke hasibhi muntu ghwa kulibhala fibhi Ighāmbo lyeke Kabhumba.
6 Teetyoe bhalughalugha naagho, ghwabhakabha bhabhe ^bhanakobhola kwijhughalalila. 7 Noghwe Tiito, mu maghāmbo ghonse, ubhe kwa kulōlela masogha. Mu malāngululo ghoobhe, ulāngisye bhwene no bhutendeke. 8 Malāngululo ghoobhe ghabhe gha bhwene, nositendwi fibhi ku bhantu. Haaho, kubha muntu nalikuhensa kukughāmba, ghaalōla nsonyi, bhukohela tyanabha ne ighāmbo lya kututenda fibhi.
9 Bhasya naagho, ghwabhalomba kubhala bhabhatiikisye bhasiibho bhusya ku ghonse, bhabhalyohye bhasihisyunkani nabho. 10 Kabhili bhasijhibhi, bhabhe bhesighiilweko bhwene, aleke milīmo jhyabho jhyonse jhibhasūle bhantu kutēha malāngululo gheke Kabhumba Kasābhula ghwetu.
11 Ubhe nolikulāngulula ghaagho maghāmbo, bhukohela Kabhumba ghalāngisya sighōngo syajhe sya kubhasābhula bhantu bhonse. 12 Seesyo sighōngo silikutulāngulula kubhutuna bhubhi ne iitama lya ha bhweleelo. Teetyo, mafuku gha kubha tuli ha bhweleelo haaha, tusibhi bhantu bha kutēha fintu fingi, tubhe bhantu ^bhanakobhola kwijhughalalila, bhakukabha bhamutiikisye Kabhumba. 13 Twīkale teetyo, mu kubha tuhembeele lilya ifuku isogha lya kuheleela kwajhe Jheesu Kiliisito bhwalokabha nalōleeke ne mpunda jhyajhe nkulu. Unyene gho Kabhumba ghwetu Mukulu, kabhili gho Kasābhula ghwetu. 14 Ghakafumyanga bhupanga bhwajhe aleke atusābhule kufuma mu bhubhi bhwetu bhonse no kutufūla aleke bhwene tubhe bhantu bhaajhe ^bhalikwihala kukola masogha.
15 Kansi, bhalāngulule bhahemba bheke Jheesu ghonse ghaagho. Bhasīipye mwanabhahana ku managha ghonse. Nasikutunguuli muntu ghoghonse.