Meekasi gha bhantu ^bhamwisighile Kabhumba
3
Ghwabha nolikubhesukisya bhantu akulinga bhabhe bhabhajhimbiike no kubhatiikisya bhakulu bhakulu na bhakanya managha. Bhabhe bhaswele kukola maghāmbo masogha ku bhantu. 2 Ghwabhalomba bhasimutuki muntu ghoghonse, bhasibhi bha masōola, bhabhe bhatendeke, bhabhe na nsembo nsogha jhya kwihulika na bhantu bhonse.3 Singa tu ufwe ukale tusyali kumwisigha Jheesu bhotukabheele, tukabheele bhangalangala, tutebhilwe na fintu fya ha bhweleelo. Tukabheele bhasya bha iitama ibhi ^lijhikenyie ne fintu fingi fya ha bhweleelo. Meekasi gheetu ghakabheele gha bhubhi ne ibhengwe. Bhantu bhakabheele bhatughājhile, nofwe bheene ku bheene tukabheele twighājhile. 4 Tukubha Kabhumba Kasābhula ghwetu, ghatulāngisya bhutendeke no kutēha kwajhe, ghatusābhula. 5 Teghakēlanga teetyo bhukohela bhotukabheele tulikukola masogha, ni sighōngo syajhe tue. Ghatufūla bhubhi bhwetu, kooko gho kufyalibhwa bhuhya. Kabhili ghatuheekesya meekasi mahya ku nsīla jhya Mwēgho Mulafu. 6 Kabhumba ghakatulentelanga Mwēgho ghwajhe ku bhwingi, kuhitila kwa Jheesu Kiliisito Kasābhula ghwetu. 7 Ghakakolanga teetyo ku sighōngo syajhe, aleke tupokeele bhupanga bhwa nfuku syonse, kobhe bhotwisighile.
8 Maghāmbo ghaagho ni gha bhwene. Ndikuhensa ughwe ughasimbaatisye, aleke bhonse bhamwisighile Kabhumba bhaghalōnde no kwifinda kukola masogha. Maghāmbo ghaagho ni masogha, bhukohela ghali na bhusabhaghala ku bhantu bhonse. 9 Tukubha ughwe Tiito, ghwaliijheka na maghāmbo gha kutambaana gha singalangala, kutiikisya masiina gha bhakulu bha kale, bhusama ne mpaka ku luhande lwa Kabhāngo keke Musa. Ghaagho ghonse teghali na bhusabhaghala bhobhonse. 10 Muntu ghwakubha nali kasonganyia, ghwamukabha lwa kusumbula no lwa bhubhili, kubha ghaabhula kukuhulika, mulēke abhe ghongwa. 11 Mānya kubhala, muntu kobhe ghoogho ghataajhika kabhili ghaajhīla fibhi, ni muntu mubhi, ghalikalila nyene.
Maghāmbo gha kutāahya
12 Mukubha namulaghiila Alitema kumoobhe ajhe Tikiko, ghwalifinda kwisa kumwane kunu ku lugho lwa Nikopooli, bhukohela kunu mbasile kwikalako mu liima lya mpeho. 13 Ghwalifinda kumufūnaanila Seena, ghulya kanya kabhāngo no Apolo. Ghwabhaha fyonse fya kubhafūnaanila mu nsīla, bhasiseehelwi na sintu. 14 Bhahemba bheneetu bheke Jheesu naagho, bhajhighe kukola masogha ku managha, aleke bhabhafūnaanile bhasanfi bha bhwene. Kubha bhaajhīla teetyo, meekasi ghaabho ghalokabha masogha gha kujhighwa.
15 Bhantu bhonse ^bhali hamwi nane haaha, bhalikukuposya.
Nonwe noghwe teetyoe, ghwabhaposya bheneetu bhonse bhotwisighile kumwi nabho.
Ndikusēegha kubhala sighōngo syeke Kabhumba sibhe kumwi namwe mwense.