Lupapulo lweke Paulo kwa
Tiito
Paulo alikumuposya Tiito
1
Lupapulo loolu nankalunyeghanga une Paulo, musya ghweke Kabhumba, muntengwe ghweke Jheesu Kiliisito. Ndaghiisilwe kubhalānga bhantu ^bhakasāaghulwa na Kabhumba bhabhe bhantu bhaajhe, akulinga ^bhamwisighe kabhili imbasīipye mu kwisigha kwabho no kubhumānya bhwene ^bhulakubhalombola mu kumutiikisya Kabhumba. 2 Bhoobho bhwene bhulikubhafūnaanila kwisigha kubha ti bhalopāta bhupanga bhwa nfuku syonse. Kabhumba asikotenda malami ghakabhutendanga bhoobho bhupanga no bhweleelo bhusyali kubhumbwa. 3 Liima lyakabheele nabhasile Kabhumba bholyakabhanga lyafīka, ghakalubhusyanga Ighāmbo lyajhe halafu. Ghakampanga kutangaasya leelyo Ighāmbo kwi ilaghi lyajhe Kabhumba Kasābhula ghwetu.4 Ndikukunyeghela ughwe Tiito, mwanaane ghwa bhwene bhukohela ghotwisighile ni ghumwi. Ndikusēegha kubhala sighōngo na maholo kufuma kwa Taata Kabhumba no kwa Jheesu Kiliisito, Kasābhula ghwetu, fibhe hamwi naghwe.
Mulīmo ghweke Tiito mu kalila ka Kileete
5 Bhonankafumanga kooko ku kalila ka Kileete, nankakulēkanga ughwe aleke ughabhiike fisogha maghāmbo ghandi ^ghakabheele ghasīibha, kumwi no kubhaalula bhaghosibhakulu bha kaniisa mu ngo syonse, kobhe bhonkabheele nankulomba.
6 Mughosimukulu ghoghonse ghwa kaniisa, ahenseelwe kubha muntu ghwa bhusila kubha nalikutendwa lyolyonse ibhi. Abhe na mukeema ghumwi,a bhaana bhaajhe bhabhe bhahemba bheke Jheesu, bhasibhi na bhusama ajhe bhasibhi na kahambaasya. 7 Bhukohela mughosimukulu ghwa kaniisa ni muntu ^ajhughalaliile kaniisa, ahenseelwe kubha muntu ghwa bhusila kutendwa mabhi, bhukohela ghaheebhwa mulīmo ghweke Kabhumba. Nasibhi muntu ghwa sitwi, nasibhi na sisila, nasikolwi maalwa, nasibhi ghwa masōola, kabhili nasibhi ghwa iitama ibhi lya kuhensa mahela. 8 Tukubha alikuhenselwa kubha na mwēgho ghwa kukōnka bhantu, abhe muntu ^atēhile matendeke, ghwa masāla, mutendeke, mughololoke mwēgho ^anakobhola kwijhughalalila nyene. 9 Abhe nanīghile fisogha Sikūla sya bhwene bhweke Jheesu Kiliisito, kobhe bhoghakalāngululwanga. Haaho bhwanakobhola kubhasīipya bhantu ku malāngululo gha bhwene, no kubhakabha ^bhalikughatuna ghaagho malāngululo.
10 Ndikukulomba teetyo, bhukohela bhaliho bhantu bhengi bhasili bhatendeke, bhalikutenda maghāmbo ghasili masogha, kabhili ni bha malami, bhalya bhalikulāngulula malāngululo ghaabho gha Sijhahudi ne nkana lya kuputa nkōpa. Bhaabho bhantu bhatunyisibhwe kulāngulula, 11 bhukohela bhalikulufya bhantu mu ngo singi. Bhalikulāngulula maghāmbo ghasili masogha, aleke bhapāte mahela ku nsīla mbi. 12 Ukale hakabheele no mughwelaghu ghumwi, Mukileete ghwa kumwabho bheene, ghakatendanga itye, “Bhakileete ni bha malami nfuku syonse, ni kobhe manywele mabhi, bhakanya kalya, bhakime!” 13 Maghāmbo ghaagha ni gha bhwene. Teetyo, ubhe nolikubhakalihila nkana bhaabho bhantu, aleke bhalōnde malāngululo gha bhwene. 14 Bhalēke kuhulikisya nsumuulilo sya kale sya Sijhahudi sisili no bhwene bhobhonse, na malaghi gha bhantu ^bhalikubhutuna bhwene.
15 Bhaabho bhantu bhalikulāngulula kubhala, filiho fintu fya musīlo. Tukubha une ndikutenda kubhala, ku bhantu ^bhali no mwēgho musogha ha mbele jhyeke Kabhumba, fintu fyonse ni fisogha. Tukubha, hatuhu sintu sisogha ku bhantu bhasili bhasogha, bhasili bhahemba bheke Jheesu bhukohela kulanganyia kwabho ne myēgho jhyabho jhibhumbiike bhubhi. 16 Bhalikutenda bheene kubha ti bhamujhinsi, tukubha fyobhalikukola ni fya kumutuna. Ni bhantu bhabhiihya kwa Kabhumba, tebhamutikiisye, kabhili te bhantu ^bhanamukolela mulīmo ghoghonse musogha.