Naomi alikumuhāna mukamwanaajhe
3
Ifuku limwi Naomi ghamutānyisya Lutu, “Teeti, mwanaane te mulīmo ghwanehi kukuhensela ha kwīkala, ghwajhīkala fisogha? 2 Nonwe ghooghu Bhoasi ghobhele nolikukolako milīmo hamwi na bhandi bhanabhakeema, te ghwa bhukwa bhwetu? Hulikisya! Bhwalelo mugholo alobha nalikuheha syahili jhyajhe ha luhya lwa kuhuulila. 3 Kansi, ughwe nyaagha, ghwalisīigha na mafuta manyunkilile, ghwafwala mwenda mulafu, kundi ghwajha ha luhya. Tukubha nosilubhusi kumwajhe mpaka ghahwa kulya no kunywa. 4 No kubha nokūngiile hwalojha mu kulaala, kubha ghaghōna ghwajha bhukebhuke, ghwafīka ghwafimbula mpambala syajhe.a Nonyene alokutānyisya lya kwīla.” 5 Lutu ghahindula, “Ghonse gholotenda nonkola.”Lutu ha luhya lweke Bhoasi ha kuhuulila
6 Kundi Lutu ghaajha mpaka ha luhya, ghakola ghonse ghoghakalombwanga na nyina bhukwe. 7 Bhoasi bhoghakabhanga ghakwisya kulya no kunywa, ghasangabhala, ghakajhanga ha bhwihi ne isinku lya syahili, ghalaala. Lutu naagho ghaajha ghalibhemba bhukebhuke, ghafīka ghafimbula mpambala ku bhulanfisya bhwa maghūlu gheke Bhoasi, ghalaala.
8 Bhufuku kati Bhoasi ghahalamuka, mukubha ghahīnduka kansi hali mwanamukeema aleele ku bhulanfisya bhwajhe. 9 Ghamubhasya, “Ughwe uli ghanyi?” Ghalikamuhindula, “Nine Lutu, musya ghoobhe. Nfimbile mwi ipapa lyobhe, bhukohela ughwe oghwe ghwamughana ghwetu ghwa kutukōnka.” 10 Ghamutānyisya ghaabhala, “Mwanaane, TAATA BHUSYA akupambulile. Bhuntu bhoghwalānsya bhwasumba no bhoghwakēlanga mu kusumbula. Bhukohela tukajha ku bhalughalugha bhatunsi ajhe bhapīina bhakutoole. 11 Kansi mwanaane sīkya mwēgho, nankukuhensela fyolikusamba. Bhukohela bhantu bhonse mu lugho bhajhinsi bhutendeke bhoobhe. 12 Ni bhwene, une ghone ghwa kukukōnka, tukubha hali no ghwamughana ghwa ha bhwihi anakukōnka kusumba une. 13 Kansi ughwe hembela bhufuku bhoobhu, mulāabho kubha ghaswa kukukōnka, fisogha. Ti ajhehi ghatuna, une ndokukōnka nankulahilila kwa TAATA BHUSYA nsinakutēbha. Laala mpaka mulāabho.” 14 Kundi Lutu ghalikalaala haaho ha bhulanfisya mpaka mulāabho, tukubha ghakabhuukanga kakingilima nasimānyiki, bhukohela Bhoasi akabheele ghaabhala, “Lisimānyiki ku bhantu kubhala ti hali mwanamukeema aleele ha luhya.” 15 Nasyali kubhuuka Bhoasi ghamutānyisya, “Ghānsa mwenda ghoobhe hansi.” Lutu ghaghānsa, Bhoasi ghaghōlelaho fisele mukaagha fya syahili, ghamutwika, Lutu ghaheleela ku lugho.
16 Lutu bhoghakabhanga ghafīka ha lugho, nyina bhukwe Naomi ghamubhasya, “Fyabhangako bhuti mwanaane kooko?” Kundi Lutu ghamutānyisya fyonse fyoghamwīlilanga Bhoasi. 17 Ghalōnsya ghaabhala, “Ghampanga ne fisele mukaagha fya syahili, ghaabhala, ‘Nosijhi kwa nyoko bhukwe mabhoko ghamwenga.’” 18 Kundi Naomi ghaabhala, “Nonwe mwanaane tuusya, uhembele lilakwisa. Bhoasi tyalakwīkala bhwalelo mpaka ghakwisilisya ghonse ghoghabhalanga.”