Bhoasi alikumuhyana Lutu
4
Kundi Bhoasi ghaajha ha musīgho ghwa lughoa ha kusangaanila, ghahembela. Kansi ghulya ghwamughana ghwa kumukōnka, ghoghakabhalanga Bhoasi, ghahita. Bhoasi ghamubhalila, “Jhisa hanu ghwamughana ghwane, ujhīkale.” Ghaajha ghafīka, ghajhīkala. 2 Bhoasi ghajhitaho bhaghosibhakulu ikumi bha mu lugho, ghabhabhalila, “Jhīkale haaha nomwe.” Bhajhīkala. 3 Kundi ghamutānyisya ghulya ghwamughana ghwa kukōnka, “Ghooghu Naomi akaheleesile hanu kufuma ku sihugho sya Mohabhu, alikuhensa kughūsya ibhāla ^likabheele lyeke ghwamughana ghwetu Ilimeleki. 4 Kundi nandōla sumbwa inkulombe ughwe, kubha nonalighūla ulighūle, na bhaabha bhaghosibhakulu na bhantu bhonse bhahulike. Kubha nolakulitwala, litwale. Kubha nosilakulitwala unombe, akukabha imānye. Bhukohela ughwe ghoghwe ghwa kusumbula none nanōnda mu nyuma.” Ghwamughana ghwajhe ghaabhala, “Nankulighūla.”5 Kundi Bhoasi ghaabhala, “Ifuku lya kughūla ibhāla kwa Naomi, gho ifuku lya kumuhyana no Lutu Mumohabhu mulekwa na Maloni, akulinga afuuke ghwa kuhyana isiina lyeke muhele no bhuhyana bhwajhe.” 6 Ghulya ghwamughana ghaabhala, “Kubha ni teetyo leelyo ibhāla lyampoota mānya imbiihye bhuhyana bhwane.b Kansi hyana ghwenyene, une nsilakukobhola.” 7 Ukale bhobhakabheele bhaajhīla mu sihugho sya Isilaheeli, kubha bhahensa kughūla no kukāabha, mpaka ghundi ghafuula nkwābho jhyajhe ghaheekesya mwinaajhe. Teetyo gho kutembeekesya sibhalwa mwi Isilaheeli. 8 Kundi ghulya ghwamughana ^akabheele ghwa kukōnka ghamulomba Bhoasi, “Ughwe ghūla ghwenyene.” Ghabha ghafuula nkwābho jhyajhe, ghaamuha.
9 Kundi Bhoasi ghabhatānyisya bhaghosibhakulu na bhantu bhonse bhakabheeleho kubhala, “Bhwalelo umwe ghomwe bhakalōla. Mulōle bhuli bhondikughūla kwa Naomi ghonse ^ghakabheele nsābho jhyeke Ilimeleki, Kilyoni no Maloni. 10 Namutwala no Lutu Mumohabhu mulekwa na Maloni, namuhyana abhe mukasyane. Kalaghano kaaka kalakusūla mughāna ne isiina lyeke muhele no bhuhyana bhwajhe fisitaajhiki mu bhamughana ghwajhe no mu lugho lwajhe. Bhwalelo umwe ghomwe bhakalōla.” 11 Gho mukubha bhalya bhaghosibhakulu na bhantu bhonse bhakabheeleho ha musīgho ghwa lugho bhabhala, “Ufwe ghofwe bhakalōla. SIFWE BHUSYA amulombole mukama ghoobhe abhe kobhe Laheli no Lea, bhaabho bhobhabhili bhakaghubhakanga lugho lwa Isilaheeli. Ghwapambulilwa nkana mu bhukwa bhwa Fulata, ghwabha na mpunda mu Bhetelehemu. 12 Ku bhaana bhwalobha ghakuha SIFWE BHUSYA, bhalofyalwa na ghooghu mukama ghoobhe, bhabha kobhe bhukwa bhweke Pelesi,c ghwa kufyalwa na Tamali no Jhuuda.”
13 Kundi Bhoasi ghabha ghamutwala Lutu, ghabha mukasi, ghamutoola. Bhoghakabhanga ghajhingilamo, SYE BHUSYA ghamupambulila Lutu ghajhimula, ghafyala mwana mughoosi. 14 Bhanabhakeema mu lugho bhamutānyisya Naomi, “Asīimwe SIFWE BHUSYA bhukohela tyakulēkile ghwengwa, ghakulentela bhwalelo ghwa kukukōnka. Ghabha ghwa mpunda mwi Isilaheeli. 15 Ughoogho ghwalokuha managha no kukukōnka mu bhukekulu. Mukamwanoobhe akutēhile ghafyala. Lutu kumoobhe ni kusumba bhaana ndwi bhaana bhaghoosi.” 16 Naomi ghamutwala ghulya mwana ghamulēla, ghamufūnaanila kutobhela. 17 Bhanabhakeema bhafitinkanyid bhabhala, “Naomi ali na mwana mughoosi.” Bhamwilikako Obhedi. Ghoogho gho sye ghweke Jheese, sye ghweke Daudi.
Obhedi nyinakulu ghweke mwami Daudi