Lutu 2

Kwimānya kweke Lutu no Bhoasi

Kansi Naomi akabheele no ghwamughana ghwajhe ghweke ibha najhitilwe Bhoasi, muntu mughosimukulu mutunsi, bhukwa bhweke Ilimeleki. 2 Ifuku limwi, Lutu Mumohabhu ghamutānyisya Naomi, “Ndikuhensa inje mu mabhāla inkasōlelesye fikosīibhila mu kusuughula. Hobhalobha bhanswēsya nahita mu nyuma jhyabho.” Naomi ghaabhala, “Kooko kajhe mwanaane.” 3 Lutu ghalikajha mwi ibhāla, nabhalōnsile bhalikusuughula ghajha ghasōla mu nyuma jhyabho fyobhalikujha bhaalēka. Kansi alikujha ghasōla bhusila kumānya ali mwi ibhāla lyeke Bhoasi, ghulya ghwa bhukwa bhweke Ilimeleki.

4 Ikunka telikakula, Bhoasi ghafīka kufuma ku Bhetelehemu, ghabhaposya ^bhalikusuughula, ghaabhala, “TAATA BHUSYA amilombole.” Nagho bhamuhindula, “SIFWE BHUSYA akupambulile.” 5 Bhoasi ghamubhasya mukulu ghwa bhakusuughula, “Ghoogho mukulwana ni ghwa ihe?” 6 Ghulya mukulu ^ajhughalalile bhakusuughula ghahindula, “Ni ghulya mukulwana Mumohabhu akeesile no Naomi kufuma ku sihugho sya Mohabhu. 7 Ghasēeghanga ti, ‘Inje mu nyuma jhyabho bhalikusuughula nendikusōlelesya.’ Ghajhīsanga mulāabho ghasīngwa mwi ibhāla, ghatamukanga fise tue mu mughanda.” 8 Kundi Bhoasi ghamubhalila Lutu, “Mwanaane hulikisya, nosijhi ghwasōlelesya mu ghandi mabhāla. No kubha nosifumi hanu teghwasōla tu mu leeli ibhālae hamwi na bhaabha bhakola milīmo bhaane bhanabhakeema. 9 Nokūngiile tu mwi ibhāla mobhalikusuughula, ghwajha nobhalōnsile tu mu nyuma jhyabho, nambalēsyanga bhalughalugha bhasikusanfi. Kubha ghwalōla silaka, ghwajha ghwakanywa mansi mu muhange ghobhatahanga bhaabho bhalughalugha.”

10 Kuhulika ghaagho Lutu ghajhinama hansi ghamupakila Bhoasi ghaabhala, “Ni sighanyi syasūla ghwandōlela sighōngo une munyēnyi?” 11 Bhoasi ghamuhindula kubhala, “Nkaghahulike ghonse ghokamwīlile nyoko bhukwe tangu ibhalo nasumalike. Kabhili nkahulike bhuli bhoghwakabhalēka bhakufyele ne sihugho syobhe mofuukile, ghwajhīsa mu kwīkala na bhantu bhosikabheele nojhinsi. 12 TAATA BHUSYA akulīhe ku ghaagha ghoghwakēela. Akupambulile nkana TAATA BHUSYA Kabhumba ghwa Bhesilaheeli ghoghwakakilimila mu mapapa ghaajhe.” 13 Lutu ghaabhala, “Taata bhusya, ghwanjīlila sighōngo sikulu nkana. Ghwansīkya mwēgho ghwantānyisya maghāmbo matendeke hamwi no kubha une nsinalingaana nenga tu no ghumwi mu bhakola milīmo bhoobhe bhanabhakeema.”

14 Mukubha bhasumbula kulya, Bhoasi ghamubhalila Lutu, “Koleela hanu ulye ibhu utwesye no mwi isubhwe.” Kundi Lutu ghajhīkala hamwi na bhakola milīmo, Bhoasi ghaamuha na kabhembo, ghaalya ghajhikuta fyanasīibha. 15 Kafumilo ka haaho Lutu ghabhuuka mu kujha ghasōlelesya, kundi Bhoasi ghabhakabha bhakola milīmo bhaajhe, “Mulēke akomenkanyie singa ha bhwihi na masinku, musimufwisi nsonyi. 16 No kubha mwajha mwahonyia aleke asōle musimukalihili.” 17 Kundi Lutu ghajhililika na mulīmo ghwajhe ghwa kusōlelesya lyasumwa lyatolobhela. Ghahuula syahili jhyajhe jhyakabheele ghakomenkanyia lyabhumbika ikubhulu limwi. 18 Ghatwala ghaajha ku lugho, nyina bhukwe ghaalōla bhoghasōlelesya. Kundi Lutu, filya fyoghakalyanga fyasīibha, ghaamuha.

19 Haaho nyina bhukwe ghamubhasya, “Ghwasōlelesyanga ihe bhwalelo? Ghwasōlelesyanga mwi ibhāla lyeke ghanyi? Apambulilwe ghakulōlelanga sighōngo.” Lutu ghamutānyisya nyina bhukwe kwabhele nalikukolela milīmo kubhala, “Konankolelanga milīmo bhwalelo ajhitilwe Bhoasi.” 20 Naagho Naomi ghamutānyisya mukamwanaajhe, “TAATA BHUSYA asilēkile kulānsya sighōngo syajhe ku bhali bhupanga na bhakahwa kufwa, amupambulile Bhoasi.” Mukubha kabhili ghaabhala, “Ghoogho muntu ni ghwamughana ghwetu ghwa ha bhwihi, gho mu bhalya bhali ne ntighili jhya kutukōnka.” 21 Lutu ghaabhala, “Kabhili ghanombanga, ‘Jhīkala hanue na bhakola milīmo bhaane mpaka isuughula lyahwa.’” 22 Kundi Naomi ghamubhalila Lutu, “Kansi mwanaane ni fisogha ulōndekane na bhaabho bhakola milīmo bhanabhakeema mwi ibhāla lyeke Bhoasi, bhukohela mu mabhāla gha bhandi bhakobhwele bhakujhejhefya.” 23 Kundi Lutu ghalōndekana na bhanabhakeema bhakola milīmo bheke Bhoasi kusuughulisya, lyasumwa isuughula lya ngano ne syahili lyahwa. Mafuku ghonse ghaagho akabheele najhīkeele na nyina bhukwe.