Lutu 1

SITAABHU SYEKE LUTU

Ilimeleki no mughāna ghwajhe bhalikutuluukila ku Mohabhu

Ukale, nfuku sya bhatwale ^bhakabheele bhajhimile mu sihugho sya Isilaheeli, mwakasūlikanga nsāla mu sihugho. Hakabhuukanga muntu ghumwi ghaafuma mu lugho lwa Bhetelehemu mu Jhuuda hamwi no mukasi na bhaana bhaajhe bhabhili, bhaajha mukafunisya mu sihugho sya Mohabhu. 2 Ghoogho muntu najhitilwe Ilimeleki no mukasi najhitilwe Naomi. Bhaana bhaabho bhabhili bhaghoosi, ghumwi najhitilwe Maloni, no ghundi Kilyoni. Ghoogho muntu no bhukwa bhwajhe bhakabheele Bhafulata kooko ku Bhetelehemu mu Jhuuda. Bhakajhanga mu sihugho sya Mohabhu mobhakēkala.

3 Ilimeleki ibha Naomi ghasumaalika, Naomi ghasīibha na bhaana bhaajhe bhabhili. 4 Bhaabho bhalughalugha bhatoola bhakeema Bhamohabhu, masiina ghaabho Holipa no Lutu. Jhyalikahita myaka kobhe ikumi, 5 Maloni no Kilyoni naagho bhasumaalika. Gho Naomi ghabha ghafwilwa ibha na bhaana bhaajhe bhabhili. 6 Mafuku ghalikalōndana Naomi ghabha ghahulika kubhala, SIBHO BHUSYA ghwa Bhesilaheeli ghabhapambulila bhantu bhaajhe mu sihugho ghabhaha fyakulya.

Matelekanyi gha kuheleela ku sihugho sya Isilaheeli

Kundi Naomi na bhamukamwanaajhe bhalikēla matelekanyi gha kuheleela ku sihugho sya Isilaheeli. 7 Bhabhuuka kufuma hobhakabheele bhēkeele, bhalōnda nsīla jhya kuheleela ku Jhuuda. 8 Mu nsīla Naomi ghabhalomba bhamukamwanaajhe, “Jhyāte muheleele mwense ku bhanyinenywe. TAATA BHUSYA abhe mutendeke kumwenyu kobhe bhutendeke bhomwakanjīlilanga une na bhakwane bhalya bhakasumaalika. 9 TAATA BHUSYA amipambulile, nsekonseko, mwatoolwa mwabha na ngo syenyu.” Kufuma haaho Naomi ghabhatāahya. Tukubha bheene bhapukula tu musōgha. 10 Bhabhala, “Lekehi! Tulakuheleela fwense ku lugho ku bhamughana ghoobhe.” 11 Naomi naagho ghaabhala, “Ale bhaana bhaane! Heleele. Teeti une inafyala kabhili bhaana bhaghoosi bha kumitoola? 12 Ale bhaana bhaane! Heleele ku lugho. Bhukohela une ndi mukekulu, nsinatoolwa kabhili. Ninga nantoolwa bhufuku bhoobhu nanafyala na bhaana bhaghoosi, 13 teeti, munabhahembela bhakule? Teeti, munakobhola kwīkala bhusila kutoolwa na bhandi bhaghoosi? Lekehi! Bhaana bhaane bhulanda bhombwene une, bhusunfile bhwakwenyu. TAATA BHUSYA ghandēkanyia.” 14 Haaho bhapukula tu musōgha kujha kulīla kabhili. Kundi Holipa ghamusukamila nyina bhukwe, ghamutāahya, ghaheleela ku lugho. Tukubha Lutu ghakalōndekananga naajhe nyina bhukwe. 15 Naomi ghamutānyisya, “Lutu, kūnga mwinoobhe ghaheleela ku bhakumwabho, ku mighābho jhyabho. Kansi noghwe mulōnde mwinoobhe.” 16 Lutu ghalikamuhindula,

“Nosindebhelesi inkulēke,

no kubha nosindēsi kulōndekana noghwe.

Hohonse holojha none hondojha,

holojhīkala hondojhīkala,

bhantu bhoobhe bhalobha bhantu bhaane,

no Kabhumba ghoobhe alakubha gho Kabhumba ghwane.

17 Holokafwila hondokafwila none,

haaho hondokasiikilwa.

TAATA BHUSYA ansūlile filalabhila fibhi nkana,

kubha nandekunkana noghwe.

Liilufu gho lilokatulekunkanyia.”

18 Naomi bhoghakalōlanga kubha ti Lutu ghabhalisya kulōndekana naajhe, ghakalēkanga kumulēsya. 19 Kundi bhonse bhobhabhili bhalikajha mpaka ku Bhetelehemu. Bhobhakabhanga bhafīka, lugho lonse bhabhelōlela. Bhanabhakeema bhalibhasya, “Ghooghu te Naomi?” 20 Naomi ghaabhala, “Musinjiti Naomi, njite Mala bhukohela Nyangasa ghakanfīsya hale. 21 Mu kufuma hanu, nkabheele na fintu fingi, tukubha bhwalelo TAATA BHUSYA ghanheleesya mabhoko ghamwenga. Mulakunjita bhuti Naomi kubha unyene TAATA BHUSYA ghambegha kahūnga, Nyangasa ghangunusya?”

22 Teetyo bhofyakabhanga Naomi no Lutu Mumohabhu mukamwanaajhe mu kufuma ku sihugho sya Mohabhu kuheleela ku Bhetelehemu. Mafuku ghobhakafīkilangamo he isuughula syahili.