Zhakubə kafiy mbə Shishem ta dzəmbə Betel
35
Liy hum kuma va ki, ma kə Hiyala kaa Zhakubə tə nahuti vici na: «Kafə, maɗiy dzəmə pi tsa har məndi vaa Betel a gha dzaa nziyŋa məɓa, nza gha ngati pi məɓa ta tara. Tə pi tsaa niy təzliree va kaa ngəŋa ghala vəghu tsaa niy hu gha va va zəməŋa Esaw,» kə.2 Ma kə Zhakubə kaa mbəzli kiy ghyi tsa ci lə kaa mbəzli kwasəbə gwanashi ki na: «Ɓantim hiyalahi nihuti mbəzli va mbə jipə ghuy, mbaʼ ghuy yaɓanti ghən tsa ghuy ta nza ɗewɗew kwa kuma Hiyala, nza ghuy mbarakən kubeŋer ghuy ɗewɗew ni. 3 Gumavam, a ghummə dzəmə Betel. Ta nga pi tsaa ta Hiyala dzee məɓa kaa Hyalaa niy zləɓavə cəʼwee va ghala vəghu tsaa niy nzee mbə ngəraʼu. Ya kwamaɓa niy dzayay, kwasəbee niy nza na,» kə. 4 Dzəghwa ghəshi ki, mbaʼ ghəshi ɓasanavə hiyalahi nihuti mbəzli və shi gwanashi, mbaʼ shi mbə sləməhiy niy nza mbə slimim shi kaa Zhakubə. Dza na mbaʼ liyshi ta fə dikə na va vəgha Shishem. 5 Kə Zhakubə lə ndərazhi ci ka dzashi ki. Dza Hiyala mbaʼ fambə hazləni mbə nefer mbəzli mbə məlməhiy dzar vəgha shi, tərəhə ntsaa nuw shi.
6 Dza Kar Zhakubə lə mbəzli kwasəbə gwanashi ki, mbaʼ ghəshi tsəhəshi mbə Luzə tə hiɗi ka Kanahaŋ, Luzə vay, ghənzə na Betel. 7 Dza na tiɓa mbaʼ ngati pi ta ta Hiyala, «El Betel» kə kaa har pi tsa va. Sa nzanay, tiɓa niy təzlita Hiyala kaa ngəci, ghəci mbə hu va zəmbəghiy Esaw.
8 Dzəghwa Debura mavaa niy nighə vaa dzəkən Rebeka ghənzə juwta, ɓəlahə mətita. Mbaʼ məndi lanti vəgha Betel, ta fə dikə na va. Dza Zhakubə mbaʼ fanati slən «Fəə wahə» kaa fə va.
9 Dzəghwa Hiyala mbaʼ zhiniy təzlita kaa Zhakubə liy hum sa səəkiy na tə hiɗi Padam Haram, mbaʼ təfanati miy. 10 Ma kə kaa ngəci na: «Zhakubə na slən tsa gha. Nanay, ka dza məndiy harəŋaa Zhakubə ghulaw. Izərayel dza slən tsa ghaa nza,» kə. Mbaʼ fanati slən Izərayel tsəgha ki. 11 Ma kə Hiyala kaa ngəci diɓa na: «Yən na Hyalaa guranti tə bərci. Ta ya ndərazhi dza gha ɗaŋ tərəŋu. Jijihiy hulfə mbəzli dza ghaa nza, ɗaŋ dza hulfəhi mbəzli ta səvəri mbə gha diɓa. Ta nza dza mezhizhə mbə jijihiŋa. 12 Hiɗiy niy ɓanavee va kaa kar Abəraham lə Izakiy, ta ndaŋashi dzee. Liy hum ghay, ta ɓanavə shi dzee kaa ndərazhi gha lə kaa jijihiŋa,» kə.
13 Ma sa kəɗanti Hiyala gəzə kuma lə Zhakubə ki na, mbaʼ zlay tə pi tsa gəzə ghəshi va kuma liy dzata. 14 Dzəghwa Zhakubə mbaʼ gariy haku tiɓa, mbaʼ shəkati in ti lə tay jiwu tsətsə. 15 Dzəghwa na mbaʼ fanati slən Betel kaa pi tsaa niy gəzəhu Hiyala va kuma li ti.
Rashel mətita mbə ya Benzhameŋ
16 Dza kar Zhakubə lə mbəzli kiy ghyi tsa ci, kafə ghəshi kafəshi mə Betel. Ma ghəshi ndəku lə məlmə Efərata na, mbaʼ Rashel yata. Lə ngəraʼu niy ya na. 17 Ma sa ya Rashel iyahə iyahə ki, ma kə maliy niy ya kaa ngəta na: «Ka dza her gha ma, zəghu zal kumavə gha diɓa,» kə. 18 Ma Rashel dza ta məti, sa yakəghwa na zəghu va ki na, mbaʼ fanati slən Ben-ʼuni, ɗi naa gəziy: zəghu mbəri. Ma kə diy kaa slən tsa ci na «Benzhameŋ» kə, ɗi naa gəziy: zəghu tar dəvə kwa bəzəmə. 19 Mbaʼ Rashel mətita tsəgha ki. Dza mbaʼ məndi liy vəgha kwal tsaa dzəmbə məlmə Efərata. Efərata vay, ghənzə na Betəlehem. 20 Dza Zhakubə gəgəɗə gəgəɗəy haku tə kuli nzə ta mbə məndiy sənata kuli nzə va. Tə haku tsa va ka məndiy sənata kuli Rashel paʼa ndatsə.
21 Dza Izərayelª lə mbəzli kiy ghyi tsa ci kafə ghəshi kafəshi mbaʼ dza liy ciki gamtaʼwal tsa ci taŋə kaa Migədal-Eder. 22 Ghala vəghu tsaa niy nza Izərayel tə hiɗi vay, a Ruben niy hənəhu həni lə Bilha, mali diy tar bəla, mbaʼ kuma va niy tsəhəta kwa sləmə Izərayel.
Məŋə lə bakə niy nza ndərazhiy zhər va Zhakubə. 23 Avanashi ndərazhiy zhər yanakə Leya: Ruben kwa taŋa zəghu Zhakubə, mbaʼ Shiməyuŋ, mbaʼ Levi, mbaʼ Zhuwda, mbaʼ Isakar, mbaʼ Zabuluŋ. 24 Avanashi ni yanakə Rashel: kar Zhuzefə ghəshi lə Benzhameŋ. 25 Avanashi ni Bilha maliy ghəranta sləni kaa Rashel: Kar Daŋ lə Neftali. 26 Avanashi ni Zilpa maliy ghəranta sləni kaa Leya: kar Gad ghəshi lə Aser. Ava tsəgha na ndərazhi Zhakubə yavə na tə hiɗi Padam Haram.
27 Dza Zhakubə mbaʼ zhəghəkəvay dzəvəgha diy Izakə tə hiɗi Maməre ndəku vəgha Kiryatə Arəba. Kiryatə Arba vay, ghənzə na Hebruŋ. A kar Abəraham mbaʼ Izakə niy nziyəhu nziy tiɓa. 28 Sa mənti Izakə piya bələku mbaʼ dəghəsə mətsəkə ghən kən na, 29 mbaʼ mətiy. Təruŋ niy hiy na tə hiɗi məti na. Mbaʼ dzaa kəsashi jijihiy kwa hiɗi. Dzəghwa ndərazhi ci, kar Esaw lə Zhakubə mbaʼ ghəshi lanti.