Ndərazhi Zhakubəə wa shiy tə mbəzli mbə məlmə Shishem
34
Ma tə nahuti vici ki na, mbaʼ Dina zha yanakə Leya va kaa Zhakubə kafəta ta tuwrə vəgha ghyehi tə hiɗi va. 2 Ghala vəghu tsa vay, Hamur ntsa mbə takə tsa ka Hivi niy sləkə na hiɗi va. A zəghu niy nza və Shishem kə məndi slən tsa ci. Dzəghwa zəghu va mbaʼ nata zha va, mbaʼ pəməhu dzaa hənəhu həni li, mbaʼ yaɗanti zha va tsəgha. 3 Ya tsəgha nzə kiy, mbaʼ ɓanavə nəfə tsa ci gwanay kaa Dina zha Zhakubə va, mbaʼ ɗiti tərəŋu, mbaʼ ɓəhu məhərəli nzə. 4 Ma kə Shishem kaa Hamur diy ki na: «Mbala ɗuwtəra Zha na, ee ɗi ta ɓə,» kə. 5 A Zhakubə niy favə a Shishem yaɗanti zha ci, kə məndi. Ma sa nzana kwamti ndərazhi ci lə dəmbəkə ki na, guŋəy ghəci nziyiy ka ndəghə səəkə tsa shi. 6 Dzəghwa Hamur diy Shishem mbaʼ dzaa kəsay Zhakubə ta gəzanci kuma. 7 Ma sa səəkəshi ndərazhi Zhakubə mbə ndəghu shiy kwamti ki na, mbaʼ ghəshi favə kumaa mənta va lə zhadəshi. Dəgharə tərəŋu ghəshi nata kuma va, mbaʼ nəfə tsa shi satiy tərəŋu dalala, sa nzana mbaʼ Shishem mənti kuma haʼu haʼu na mbə Izərayel tə sa hənəhu na həni lə zha Zhakubə. Gəla shi tsəgha niy, kar məndiy məni shiw. 8 Ma kə Hamur kaa ngəshi na: «A zəghwee Shishem ɗiti zha ghuy va, titihum ɓanavəm mali ti. 9 Mənti mashi ghummə, nza ghuy ɓəŋəy ghyehi ghuy, ghuy na, ka ɓə ni ghiy. 10 Nzəyŋuyim mbə ghiy. Shi ɗi ghuy pə ghuy məni tə hiɗi va. Ya timaɓa ɗi ghuyiy, ka la ghyi. Ya kwamaɓa ɗi ghuy dza na, ka dza, ya veher ɗi ghuy na, ka pa shi» kə.11 Ma kə Shishem kaa dəta lə kaa ngwardəta Dina na: «Məntəram uzə hur. Ya wa shi ɗuw ghuy mbə Dinay, ta ndaŋuy shi dzee. 12 Shiy ɗaŋ pə ghuy ɗuw vəya mbə zha va, ka ɗuw nihuti shiy ghənghən ghənghən. War Ndara ma ghuy, ya wa shi ɗuw ghuyiy, ta ndaŋuyshi dzee,» kə. 13 Dzəghwa ndərazhi Zhakubə ki, ka zləɓanshi kuma lə tsəhuli kaa kar Shishem ghəshi lə diy Hamur, sa nzana mbaʼ Shishem niy yaɗanti zhadəshi Dina. 14 Ma kə ghəshi kaa ngəshi na: «Ka mbay ghiy ɓanavə zhadəŋəy ka ntsaa slanti ma fəʼyasaw. Haʼu tsa dikə tsa dza naa nza kən ghiy. 15 Ka ghiy gha zləɓay, war ghuy zləɓavə na məniŋuy nja ghiy, mbaʼ slən zal tsa mbə ghuy slanti fəʼyasa. 16 Ma ghalaɓa kiy, a ghiy dzaa ndaŋuy ghyehi ghiy, ghiy na, ka ɓə ni ghuy ghyehi. A ghiy dzaa mbəə nziy lə ghuy mbaʼ ghummə zhəghəmmə ka hulfə mbəzli kutiŋ ni. 17 Kala zləɓavə kuma ghiy pə ghuy, mbaʼ ghuy slanti fəʼyasay, ta zhinəhu zha ghiy dza ghiy dzaŋəy,» kə ghəshi.
18 Mbaʼ kar Hamur lə zəghu ci Shishem zləɓavə kuma va. 19 Dza məgəla tsa va kiyaŋu kiyaŋu ghəci dzaa mananti kuma va, sa nzana tərəŋu ghəci niy ɗiti zha Zhakubə va. Ndə ka fa kuma məndi və niy nza na kiy ghyi tsa diy. 20 Dza kar Hamur lə zəghu ci Shishem mbaʼ ghəshi səəkəshiy dzəmiy dəghaa dzəmbə məlmə. Ma kə ghəshi kaa zhər mbə məlmə shi na: 21 «Wəzə na mbəzli ni lə ghummə. Ə kə ghəshi nziyshi tə hiɗi ghummə, ka dza ya kwamaɓa ɗi ghəshi, ka məni shi ɗi ghəshi. Ə pə ghummə ɓə ghyehi shi, ghummə kuraku na ka ɓanshi ni ghummə. 22 Nanzə kiy, ka dza mbəzli vaa zləɓa nziy lə ghummə ta nza ghummə ka hulfə mbəzli kutiŋ li shi, kala war zhər ghummə gwanashi slanti na fəʼyasa njasa nza ni shi va zhərəw. 23 Ə pə ghummə zləɓavə kuma shi va, nza ghəshi mbəə nziy lə ghyi tsa shi mbə ghummə. Ghalaɓay, shi ghummə dza dəmbeker shi lə shi vəshi gwanashiy nza,» kə ghəshi. 24 Ya wa ntsaa niy nza tiɓa miy dəghaa dzəmbə məlmə na, mbaʼ zləɓavə kuma kar Hamur va lə zəghu ci Shishem. Dza zhər mbə məlmə va gwanashi mbaʼ ghəshi slanti fəʼyasa.
25 Ma tə kwa mahəkana vici, mbəzli va mbə zəlghu zheher shi na, dza ndərazhi bakə mbə ndərazhi Zhakubə, kar Shiməyuŋ lə Levi ngwarmbəghəta Dina mbaʼ ghəshi ɓəɓəvə kafaʼi shi ta dəvə. Təhu ghəshi dzashiy dzəmbə məlmə kala gar dza her mbəzli vəshi. Dza ghəshi mbaʼ ghəshi bakwanti zhər mbəɓa gwanashi. 26 Lə kar Hamur ta ghəshi lə zəghu ci Shishem niy bakwanti ghəshi. Dza ghəshi mbaʼ ghəshi dzaa pəməhu Dina kiy ghyi tsa Shishem ka dzashi. 27 Dza nihuti ndərazhi Zhakubə mbaʼ ghəshi kərnanti bəku niy niy bekushi ma mbəzli. Dzəghwa ghəshi fer fer ghəshi panti shiy mbə məlmə va tə sa niy yaɗanti məndi zhadəshi. 28 Cəkeʼ ghəshi panti shiy niy nza mbə məlmə va lə ni kwamti gwaʼa. Kaʼ kaa teŋkesli lə kwiy, mbaʼ slay lə kwantəmcahi. 29 Kə ghəshi mbaʼ ghəshi pahu shi mbəzli va gwanashi, kəəsə kaa ndərazhi lə miʼi gwanashi, meʼe meʼe ghəshi pahu shiy niy nza kiy ghyeghyer.
30 Ma kə Zhakubə kaa kar Shiməyuŋ lə Levi na: «Vanaŋuy pəlakəra kuma. Sanay, ka dza mbəzli tə hiɗi ni, ka Kanan lə ka Perizə ɗi kuma yaw. Ta ɓasakənvashi dza ghəshiy dzəkənee. Ta mbara dza ghəshi, sa nzanay, jiwu na mbəzli ta səɗee. Ta zantəra dza ghəshiy dza lə ghyi tsee,» kə. 31 Ma kə kar Shiməyuŋ lə Levi na: «Na ka məndi zhəghəti zhaməŋəy nja mali kwa ghurghur na?» Kə ghəshi.