Kumə tsa kar Zhakubə lə Esaw
33
Ma Zhakubə mbə kafə tə pi tsa va ki, sa nə na nighə kə na, Esaw mbə səəkə lə mbəzli diwiy diwiy faɗə. Dza na mbaʼ tətəhaghwa ndərazhi kwa jipə kar Leya lə Rashel, mbaʼ mi,iy ghəranshi sləni va bakə ni. 2 Sa dza nay, mbaʼ fiy miʼiy ghəranshi sləni va lə ndərazhi shi tə kuma, ka nuwshi Leya lə ni nzə ndərazhi, ka kəray kar Rashel lə Zhuzefə. 3 Na na ci dəʼu ghən tsa ci ki na, mbaʼ dzay dzəti kuma shi, dza na tsəfəku tsəfəku tsəfəkuy paʼ tə hiɗi mbərfəŋ səɗa, gha naa tsəhə kwa kuma zəmbəghiy. 4 Sa nay Esaw na, dza na ka kəsli bali ta kumə li, sa kuməshi ghəshi na, dza na hutəm hutəməvə wəzə wəzə, kəlaʼu kəlaʼwaghwa wəri tsa ci kwa sa ci, kə ghəshi ka wahə bakanashi. 5 Sa nə Esaw nighə kə na, mbaʼ nashi miʼi lə ndərazhi, ma kə na: «Aa mbəzli kwasəbə gha ni shiki?» Kə. «Ndərazhi ɓanavə Hiyala lə wəzə hur tsa nzə kaa ndə sləni tsa gha na ghəshi,» kə Zhakubə.6 Dzəghwa miʼiy ghəranshi sləni va lə ndərazhi shi, kəətə ghəshi kəətəghəvashi mbaʼ ghəshi tsəfəkushi kwa kuma Esaw. 7 Dza Leya lə ni nzə ndərazhi kuraku kəətə ghəshi kəətəghəvashi, tsəfəku ghəshi tsəfəkushi, dza kar Zhuzefə lə Rashel kəətə ghəshi kəətəghəvashi, mbaʼ ghəshi tsəfəkushi kuraku. 8 Ma kə Esaw ki na: «Ta njaa ɗi gha lə dəmbəkə tsa kumayee va li gwanayaa?» Kə. Ma kə Zhakubə na: «Ta mbə ghaa məntəra wəzə hur, gha ntsee dikə tsa nə ya,» kə. 9 Ma kə Esaw na: «A shiy vəya tərəŋu zəmə, zlashi shi gha,» kə 10 Zhini ma kə Zhakubə na: «Awə na ghaw, mbaʼ pə ghaa ɗi mənɗa wəzə hurəy, titihu zləɓavə vəli mbə dəvee. Ta na navay lə wəzə hur kaʼwətəra gha, njasa kumətee lə Hiyala dəʼu ghən tsa nzə favee vəghee sa kumətee tsa lə gha. 11 Titihu zləɓavə vəlee va ghunashee mbəzli li kaa ngəŋa. Sa nzanay, a Hiyala məntəra wəzə hur, shiy tiɓa kala vəyaw,» kə.
Dza Zhakubə ka mbaɗə Esaw, mbaʼ dənahu ta ɓə shi va ki. 12 Ma kə Esaw ki na: «Kafəm a ghummə dzammə, yən dza naa ʼwaŋa kwal,» kə. 13 Ma kə Zhakubə kaa ngəci na: «A ntsee dikə tsa, a gha sənay kuɗəkuɗəshi na ndərazhi, zhini diɓa na, mbaʼ teŋkesli lə kwiy nza ndərazhi ti shi vəya, mbaʼ kə məndiy iyapanshi dza ya ta vici kutiŋiy, ta bəkuy dza dəmbəkə tsa va gwanay. 14 Əə cəʼuŋee a gha ʼwati kwal na gha ntsee dikə tsa. Na nee yən ndə sləni tsa ghay, nzee nuwŋa sahə geʼi lə dza dəmbəkə tsa kwa kumee tsa, lə dza ndərazhi kwasəbee ni, paʼa kee tsəhə vəgha gha mbə məlmə Seyir,» kə. 15 Ma kə Esaw na: «Ghənzə tsəghay, ta zlashi nihuti mbəzlee dzee kwasəbə gha,» kə. Ma kə Zhakubə na: «Tawa kiya ntsee dikə tsa, məntəra ma gha wəzə hur na sa ɗee gwaʼa tsəgha,» kə.
16 Fəcavata ki na, mbaʼ kar Esaw lə mbəzli ci zhashi zhəghwa kwal tsaa dzəmbə məlmə Seyir. 17 Ma Zhakubə na ci ki na, mbaʼ dzay dzəti pi tsa har məndi vaa Səwkut. Mbaʼ dzaa ngavə ciki tiɓa, mbaʼ daŋəti ceker kaa dəmbəkə tsa ci. Va tsəgha niy fanati na slən Səwkut kaa pi tsa va, ɗi naa gəziy: Ceker daŋə daŋə ni.
Zhakubə nziyiy lə ghyi tsa ci vəgha məlmə Shishem
18 Dzəghwa mbaʼ Zhakubə zhəghəkəvay tə hiɗi Padam-haram ki, mbaʼ tsəhiy kuriŋ mbə məlmə Shishem tə hiɗi Kanahaŋ. Dza na mbaʼ liy ghyi tsa ci ndəku vəgha məlmə va. 19 Məlmə Shishem vay, Hamur niy lati na. Dza Zhakubə ki, mbaʼ pavə pi tsa lati na va ghyi tsa ci ti, tə gəna kwa tsahi bələku va ndərazhi Hamur. 20 Dzəghwa na mbaʼ lati pi tiɓa ta ta Hiyala, mbaʼ fanati slən: «El, Hiyala Izərayel» kə.