32
Ma pəətə mekəshi ki na, dza Labanə mbaʼ kafiy, mbaʼ səkwamti ghyehi ci lə jijihiy, hutəm hutəm huhutəməvəshi, «nza ghuy nza,» kə kaa ngəshi, ka zhay jəghi.Zhakubə gumava ta kumə lə zəmbəghiy Esaw
2 Dzəghwa Zhakubə ka nuw lə kwal tsa ci na ci ki. Mbaʼ ka kwal Hiyala səəkəshi ta kumə li. 3 War sa nashi na na, dza na ka gəzə kuma zlaŋ zlaŋ, ma kə na: «Pətsa nziy Hiyala ti na sasa,» kə. Dza na mbaʼ fanati slən Mahanayim kaa pi tsa va.
4 Dzəghwa Zhakubə ki, mbaʼ ghunashi mbəzli tə kuma ci va zəmbəghiy Esaw. Zəmbəghiy tsa vay, dzar mbə gamba məlmə Edum, tə hiɗi har məndiy Seyir niy nza na lə nziy tsa ci. 5 Ma kə kaa ngəshi na: «Mbalam kəsayim Esaw, a pə ghuy taa ni ngəciy: “Zhakubə ndə sləni tsa gha ghunikəŋəy na, ma kiy: Kiy ghyi tsa Labanə niy nzee lə nziy tsee, mbaʼee nzay nza kiyɓa, na zhəghəkəvaree sana. 6 Lə slay na viya, mbaʼ kwantəmcahi, mbaʼ teŋkesli, mbaʼ kwiy. A ka sləniy zhər lə niy miʼi viya. Sanay, aa ghunashee mbəzli ta gəzaŋa, gha dikə tsee, ta mbə ghaa kaʼutəra wəzə,” kə, pə ghuy kaa ngəci,» kə kaa ngəshi.
7 Dza mbəzli va mbaʼ ghəshi dzaa gəziy kuma vaa səəkəshi. Ma kə ghəshi kaa Zhakubə na: «A ghiy kəsay zəməŋa Esaw, mbaʼ ghiy gəzanci kuma va. Mbə səəkə na ta kumə lə gha lə mbəzli bələku bələku faɗə,» kə ghəshi. 8 Sa favə Zhakubə tsəgha na, mbaʼ hazləni kəsəvə tərəŋu. Dza na mbaʼ təhəvəri mbəzli ci va bakə mbə, tsəgha teŋkesli lə kwiy, mbaʼ slay, mbaʼ ngeləwbahi. 9 «Ya ə dza Esaw pəsliy ta nahuti bəla vay, nza naa tərə va bəla mbəlita,» niy təkəti na.
10 Dzəghwa Zhakubə ki, ka cəʼu Hiyala, ma kə na: «A Hiyala kar jijira Abəraham lə Dirə Izakə, a Kwa sləkəpə, gha gəzara na: “Zhəghəvaa zhiti hiɗi gha, zhiti pi tsa yakəŋa məndi, ta məntəŋa kuma wəzə na dzee,” pə gha. 11 Wəzə tsa ka ghaa məniɗa gwanay yən ndə sləni tsa ghay, ya tsəgha mənɗa mee gar məniɗa ghay, kar ghaa bashi məntəraw. Taŋee həl Zhurdiŋəy, war gətee na saa niy nza ta dəvee gwaʼa tsəgha, sana kiy, lə vərəm mbəzli bakə zhəghəvee zhəkə. 12 Titihu, a cəʼuŋee a gha mbəlantəra va zəmərə Esaw, sa nzanay, ee hazləni vantaa ghəci səəkəə paslantəra, lə miʼee mbaʼ ndərazhee. 13 Zəzətiy dzəkən kumaa niy gəzəkəɗa gha va: “Ta məntəŋa wəzə hur dzee, ta yatəŋa jijihiŋa dzee ɗaŋ nja ndarghə kwa həl kala gar mbəratishi məndi,” pə gha niy ni,» kə.
14 Hi Zhakubə tə pi tsaa niy cəʼuti na va Hiyala ki. Dza na mbaʼ təravə nihuti mbə dəmbəkə tsa ci ta ɓə vəli ci kaa zəmbəghiy Esaw: 15 Kuyiy miʼi diwiy diwiy bakə mbaʼ besher bakəmətsəkə, mbaʼ teŋkesli diwiy diwiy bakə, mbaʼ gemim bakəmətsəkə, 16 mbaʼ ngeləwbahi lə ndərazhi ti shi mahkan mətsəkə, mbaʼ slayiy miʼi faɗəmətsəkə mbaʼ kəɓəhi məŋ, mbaʼ kwantəmcahiy miʼi bakəmətsəkə lə niy zhər məŋ. 17 Sa təratishi na ləngum ləngum ki na, dza na mbaʼ fambə ya tsamaɓa ləngum mbə dəvə ka sləni ci. Ma kə kaa ngəshi na: «ʼWatim kwal tə kumee. Lə ngula lə ngula kə kwa jipə ləngumhi va,» kə. 18 Ma kə Zhakubə kaa ntsaa ʼwa kuma lə kwataŋa ləngum ki na: «Sa ka zəmərə Esaw kumay lə gha ka ɗuw ghəci: “kuma dza ghaa? A ntsaa sləkəŋaa? Dəmbəkə tsa waa sa kwa kuma ghaa tsaa?” Kiy 19 “Shi ndə sləni tsa gha Zhakubə na ghəshi, kaa ngəŋa dza na li shi Esaw ntsa ghiy dikə tsa. Mbə səəkə na dəʼu ghən tsa ci liy hum ghiy,” pə gha dzaa ni ngəci,» kə.
20 Tsəgha ghəci gəzanakə kaa kwa baka, tsəgha kaa kwa mahəkana, zhini tsəgha kaa ya tsamaɓa ntsa liy hum ləngum dəmbəkə. A kə na: «Tsəgha pə ghuy dzaa ni kaa Esaw sa ka ghuy kumə li,» kə. 21 Ma pə ghuy dzaa ni ngəci diɓay: “Mbə səəkə na ndə sləni tsa gha Zhakubə dəʼu ghən tsa ci kuraku liy hum ghiy,” pə ghuy dzaa ni ngəci,» kə. Ma niy nə Zhakubə mbə zəzə kuma ciy: «Ta dəpəti nəfə tsa ci dzee lə vəli tə kumee na, ma liy hum kiy, nzee dzəghwa kuma ci. Nda nza naa kaʼutəra lə wəzə,» niy nə na. 22 Dza dəmbeker vəlanci na va kaa zəmbəghiy mbaʼ ghəshi ʼwati kwal. Ma ghəci na na ci na, mbaʼ nziyiy tə vərɗi va tə pi tsaa niy nziyshi ghəshi va.
Zhakubə mbə mbəzə lə Hiyala
23 Ma tə vərɗi va ta na, dza Zhakubə kafə kafiy, ɓasə ɓasəti kar miʼi ci va bakə ni lə ka sləni ci va bakə ni, mbaʼ ndərazhi ci va məŋə lə tan ni. Dza na dzəvəri tə pi tsa nza həl Yabukə bəŋw, taŋə taŋəghəshi. 24 Sa taŋəghəshi na na, dza na mbaʼ paghə shi ci gwanashi, 25 tərə war Zhakubə kutiy liy hum ki. Dza tsahuti ndə ka mbəzə li paʼa tə kəɗi pi. 26 Sa nighəti ntsa va ghəci kala mbay Zhakubə mbə mbəzə tsa va na, dza na mbaʼ sləvanti mbə ghula, mbaʼ Zhakubə wəlaɗiy. 27 Ma kə ndə mbəzə tsa va kaa Zhakubə na: «Pəlara ee dzara, sa nzanay, mbə kəɗi na pi,» kə. Ma kə Zhakubə na: «Tiɓa tepuw, ka pliŋee kala war gha təfətəra na miyəw,» kə. 28 Ma kə kaa Zhakubə na: «A slən tsa ghaa?» Kə. «Zhakubə na slən tsee,» kə. 29 Ma kə ngəci na: «Ka dza mbəzliy harŋa Zhakubə ghulaw, Izərayel na slən tsa gha, sa nzanay, a gha mbəzəhu mbəzə lə Hiyala mbaʼ lə ke ngəri, mbaʼ gha ushantishi,» kə.
30 Ma kə Zhakubə na: «Titihu əə cəʼuŋee, citəra slən tsa gha,» kə. Ma kə ntsa va na: «Ta wa ɗuw gha slən tseya?» Kə. Dza na mbaʼ təfanati miy tiɓa. 31 Dza Zhakubə mbaʼ fanati slən Peniyel kaa pi tsa va. Ɗi naa gəziy: «Pətsa kwa kuma Hiyala». Sa nzanay: «Ee nata Hiyala kwa mətsə nzə kala mətiree,» kə 32 Ghala vəghu tsaa taŋə Zhakubə Peniyeliy, mbə səəmə niy nza vici. Mbə cəgəzlaŋə ni nza na va ghula ci va niy wəlaɗita. 33 Va tsəgha zəmə ma ka Izərayel sliw tsaa dzəghwa tə pi tsa jakəva esler va mbə ghula paʼa ndatsə, sa nzanay, mbəɓa niy mənəy Zhakubə.