Ghava tsa Shiy 30

Ma sa nighəti Rashel kala ya ndərazhi ghənzə na, mbaʼ ʼwati hərhə va zhambəghəta va, ma kə kaa Zhakubə na: «Ə pə ghaa ya ndərazhi kwee, kala tsəghay, ta mətira dzee,» kə. 2 Sa gəzəkə na tsəgha na, mbaʼ nəfə tsa Zhakubə satiy dzəkən. «Hiyala makətəŋa na va ya ndərazhi, yən na Hiyala va na?» Kə kaa ngəta». 3 Ma kə Rashel na: «Ɓə Bila maliy ghəraɗa sləni na a ghuy həni li, nza ghənzə yakə ndərazhi, nzee mbərəhushi, ta mbee kumavə ndərazhi kuraku tə mbərkə ghənzə,» kə. 4 Dzəghwa na ki mbaʼ pəmanavə maliy ghəranta sləni va kaa Zhakubə, hi na li.

5 Dzəghwa Bila ki, mbaʼ ɓəvə hur, mbaʼ yanakə zəghu zal kaa Zhakubə. 6 Ma kə Rashel ki na: «A Hiyala məntəɗa kuma lə kwal tsa nzə, mbaʼ zləɓavə cəʼwee kuraku mbaʼ ndara zəghu,» kə, mbaʼ fanati slən Daŋ.

7 Zhəghwa Bila maliy ghəranta sləni va kaa Rashel, mbaʼ zhiniy ɓəvə hur, mbaʼ yanakə kwa baka zəghu kaa Zhakubə. 8 Ma kə Rashel na: «mbəzə tərəŋu mbəzəhwee lə zhamərə mbaʼee ushanti,» kə. Dza na mbaʼ fanati slən Neftali kaa zəghu va.

9 Ma sa nighəti Leya ghənzə garəti ya na, dza na mbaʼ ɓəvə Zilpa maliy ghəranta sləni, mbaʼ ɓanavə kaa Zhakubə ta nza ghənzə ka mali ci. 10 Dzəghwa Zilpa maliy ghəranta sləni va kaa Leya mbaʼ yanakə zəghu kaa Zhakubə. 11 Ma kə Leya na: «Ee gumara,» kə. Mbaʼ fanati slən Gad.

12 Zhəghwa Zilpa mbaʼ zhiniy yanakə kwa baka zəghu kaa Zhakubə. 13 Ma kə Leya na: «kutiy tsa va wəzə kənee ki, Nanay, ta harɗa dza miʼi ka mali vəshi vəshi na,» kə. Mbaʼ fanati slən Asher.

14 Dzəghwa Ruben tə nahuti vici, geʼi lə vəghu tsa ka məndiy sla Alkamari mbaʼ dzay dzəmti, ta dza ta pəla shi har məndiy Mandəragurə. Dza na mbaʼ səəkəə ɓanakəvəshi kaa Leya mbəghiy. Ma kə Rashel kaa Leya na: «Tavəra mandəragurə ɓəkəŋa zəghu gha va shi» kə. 15 Ma kə Leya kaa ngəta na: «Dawaŋa zara tsa zləghuhu gha va zhini ghaa ɗi ɓəhu mandəragurə ɓəkəra zəghwee na?» Kə. Ma kə Rashel na: «Tarashi na gha, nza gha mbərəhu hi vinə tsee ndatsə, tə mandəragurə zəghu gha va,» kə.

16 Ma hetihwer Zhakubəə dza ta tsəhə kiy ghyi sa səəkə na kwaməti na, mbaʼ Leya səvərita ta kumə li, ma kə kaa ngəci na: «Ndatsəy, ghum dza na ta hi, sa nzanay, ee pahu hi lə gha tə mandəragurə ɓəkəra zəghwee» kə. Hi ghəshi lə Zhakubə fəcava ki. 17 Dzəghwa Hiyala ki mbaʼ zləɓavə cəʼu Leya, mbaʼ ɓəvə hur, mbaʼ yanakə kwa cafa zəghu kaa Zhakubə. 18 Ma kə ki na: «A Hiyala ngavəra səɗee tə sa ɓanavee kwa ghəra slənee ka mali ci kaa zara,» kə. Mbaʼ fanati slən Isakar kaa zəghu va.

19 Zhəghwa Leya diɓa mbaʼ zhiniy ɓəvə hur mbaʼ yanakə kwa kwaŋa zəghu kaa Zhakubə. 20 Ma kə na: «A Hyalee ndara shi wəzə ni tə gəm. Nana kiy, ta fə dimə dza zaraa dzətee, sa nzanay, ndərazhi kwaŋ yanakee,» kə. Mbaʼ fanati slən Zabuluŋ. 21 Zhini na ki mbaʼ ɓəvə hur, baw yakə zha, mbaʼ fanati slən Dina.

22 Dzəghwa Hiyala ki, mbaʼ zəzətiy dzəkən Rashel, mbaʼ zləɓavə cəʼu nzə , mbaʼ zhəghəti ka mali kwa ya. 23 Dzəghwa na ki mbaʼ ɓəvə hur, baw yakə zəghu zal. Ma kə na «A Hiyala panti haʼu tsaa niy nza kənee,» kə. 24 Mbaʼ fanati slən Zhuzefə kaa zəghu va. Ma kə na: «Nza Kwa sləkəpə ndara tsahuti zəghu,» kə.

Zhakubə məniy ka ndə shiy.

25 Ma sa yakə Rashel Zhuzefə ki, ma kə Zhakubə kaa Labanə na: «Ndara kwal ee dzaraa jighi, dzəti niya hiɗi. 26 Pəmavəra ndərazhee lə miʼee va ndara gha tə sləni ghərahuŋee ee dzara. A gha sənata sləni ghərahuŋee wəzə wəzə,» kə. 27 Ma kə Labanə kaa ngəci na: «Titihu, zhəhurəti zhəhur tə ya. Tə mbərkə gha təfətəra Kwa sləkəpə miy, kə mbəreketee kaa ngəra. 28 Gəzara zhəmə dzee waŋa a gha zhiniy ghəraɗa sləni, ta watəŋa dzee,» kə. 29 Ma kə Zhakubə kaa ngəci na: «A gha sənay njasa ghərahuŋee sləni, a gha nay njasa məniy dəmbəkə tsa gha vəya. 30 Juw niy kəsaye dəmbəkə va gha. Ghala səəkəɗee dzakə ghyi tsa ghay, a Kwa sləkəpə təfətəŋa miy, tərəŋu ghəshi mətsəhəshi. Gar ghəra sləni nzee ta tsee ghyi nana kuraku ki,» kə. 31 Ma kə Labanə na: «Wa shi dzee waŋaa na kuma ɗuwee va gha?» Kə. Ma kə Zhakubə na: «Shiy tiɓa gha dzaa waraw. Kama na mbaʼ gha zləɓavə kuma dzee na ta gəzəŋay, ta zhini dzee ndəghu dəmbəkə tsa gha, ka nighəə dzəkən njasa kwataŋa va. 32 Ndatsəy, ta nuwanti dəmbəkə tsa gha dzee gwanay. Slən təmbəkə tsa dzee kəsay, lə deʼi ti, ya juw na, ya dikə na deʼi tsa vay, vəgha bəla dzee fiy. Ya ku na, kama deʼi ti, ya juw na, ya dikə na deʼi tsa vay, vəgha bəla dzee fiy. Ghəshi dza zhəmee nza. 33 Kwa kuma dzaa nza kiy, nza gha səəkə ta nighətishi, ta mbə ghaa sənay nda ndə dzərvə nzee. Mbaʼ pə gha dza kəsata ku kala deʼi ti ya juw, ya dikə mbə niya vay, na ghələhwee na nava. Ya təmbəkə dza ghaa kəsay, kala bərəzlizliy kiy, tsa ghəli ghəli tsaa tsava,» kə. 34 Ma kə Labanə na: «Tsəgha na, ee zləɓavə kuma gəzəkə gha va,» kə.

35 Fəcavata ki na, dza Labanə kaa besher, lə kwiy reherehe ni, ya ni nza deʼi ti shi, ya juw na ya dikə na, mbaʼ ni nza pay ti shi mbaʼ teŋkesli ngəri ngəri, kaʼ kanavəshi kaa ndərazhi ci. 36 Dza na mbaʼ dzaa pəməy ndərazhi ci va kərakə lə Zhakubə, gar mənti vici mahəkanə ndə, ta tsəhə tə pi tsa va, ndə kəə kafə tə pi tsa nza Zhakubə va. Ma Zhakubə ki na, ka makə tsaa tərə dəmbəkə tsa Labanə.

37 Dzəghwa Zhakubə mbaʼ kəəslivə getesli neɓekə ni tə ndərazhi divədivi nihuti fəhi ghənghən ghənghən mahəkanə, mbaʼ babalantishi dzar tə tsahuti pi, ta mbə pay pəəzli dzar ti shi. 38 Dza na ki, mbaʼ fəfiy getesli nza pay va ti shi kwa pi tsa ka dəmbəkəə sa yam, gar nashi dəmbəkə, ghəci mbə sa yam, sa nzanay, ghəshi mbə səəkə ta sa yam ka ghəshiy səl. 39 Ka dəmbəkəə dza ki na, ka səl kwa kuma getesli va, ma sa ka kwiy dza ki na, ka ya ʼwegeger reherehe ni, lə ni nza deʼi ti shi ya juw, ya dikə. 40 Ma teŋkesli na shi ki na, mbaʼ tərakəvərishi mbə kwiy. Dzəghwa na mbaʼ kaghəshi dzəghwa kuma teŋkesli nza deʼi ti shi lə ni ngəri ngəri mbə ni Labanə va teŋkesli, ka ghəshiy dza ki na, ka ya ndərazhi teŋkesli nza deʼi ti shi lə ni ngəri ngəri ni.

Mbaʼ yavə tsa ci dəmbəkə ka sa ci ki, kala dzavəɗi maa dzəmbə tsa Labanə. 41 Ghala vəghu tsa ka dəmbəkə tsa guləgul tsaa səl ki na, ka Zhakubəə dza bəm bəm fiy getesli va kwa pi tsa ka ghəshiy sa yam, ta mbə ghəshiy nighəshi, ghəshi mbə səl. 42 Nashi ma na ni liku liku ni dəmbeker mbə səl na, kala fəma getesli va ghəciy dzəghwa pi tsa va. Ghalaɓa ki na, ni slehəslehə ni ni Labanə, ma ni bəvə bəvə ni na, ni Zhakubə niva.

43 Dzəghwa ki, mbaʼ Zhakubə məniy ka ndə shiy tərəŋu. Ɗaŋ tərəŋu ghəci yavə teŋkesli, tsəgha kwiy. Ɗaŋ ka sləniy zhər lə niy miʼi mənishi və diɓa, tsəgha ngeləwbahi lə kwantəmcahi gwaʼa.